பொரளை என்.எம். பெரேரா மாவத்தையில் அமைந்துள்ள ஒரு வீட்டில் மிகவும் இரகசியமாக நடத்தப்பட்டு வந்த போலி ஆவணங்கள், தேசிய அடையாள அட்டைகள் மற்றும் வாகன இலக்கத் தகடுகளைத் தயாரிக்கும் நிலையம் ஒன்று குற்றப் புலனாய்வுத் திணைக்களத்தால் சுற்றிவளைக்கப்பட்டுள்ளது.
பெரிய அளவில் பணம் வசூலித்து நீண்ட காலமாக இயங்கி வந்த இந்த மோசடி தொடர்பாக கடந்த 06ஆம் திகதி மேற்கொள்ளப்பட்ட இந்த சுற்றிவளைப்பில் மூவர் கைது செய்யப்பட்டுள்ளனர்.இவ்வாறு கைது செய்யப்பட்ட சந்தேக நபர்கள் 54, 55 மற்றும் 59 வயதுடையவர்கள் ஆவர். அவர்கள் பொரளை, வலஸ்கல மற்றும் கோனபொல வீதி, கொடஹாலபிட்டிய ஆகிய பிரதேசங்களைச் சேர்ந்தவர்கள் என அடையாளம் காணப்பட்டுள்ளனர். இந்த குழுவில் காணிப் பதிவாளர் அலுவலகத்தில் பணிபுரியும் அலுவலக உதவியாளர், ஒரு தொழிலதிபர் மற்றும் ஒரு தொழிலாளி ஆகியோர் அடங்குவதாக பொலிஸார் தெரிவிக்கின்றனர். பொரளையில் உள்ள குறித்த வீடு சுற்றிவளைக்கப்பட்ட போது இரு சந்தேக நபர்கள் கைது செய்யப்பட்டனர். அவர்களிடம் மேற்கொள்ளப்பட்ட விசாரணைகளில் கிடைத்த தகவல்களின் அடிப்படையில், மற்றைய சந்தேக நபர் நுகேகொடை டெல்கந்த பிரதேசத்தில் கைது செய்யப்பட்டுள்ளார்.
குறித்த வீட்டில் இருந்து போலியாக தயாரிக்கப்பட்ட சுமார் 600 உத்தியோகபூர்வ முத்திரைகள் பாதுகாப்புப் பிரிவினரால் கைப்பற்றப்பட்டுள்ளன. அவற்றில் முக்கிய அரச திணைக்களங்கள், சமாதான நீதிபதிகள், நோட்டரி பப்ளிக், சட்டத்தரணிகள் மற்றும் பல்வேறு பதவிகளை வகிப்பவர்களின் முத்திரைகள் இருந்தமை உறுதி செய்யப்பட்டுள்ளது. அத்துடன், காணிப் பதிவாளர் அலுவலகத்திற்குச் சொந்தமான ஆவணப் பிரதிகள் அடங்கிய இரண்டு மூலக் கோப்புகள், நான்கு போலி தேசிய அடையாள அட்டைகள் மற்றும் இந்த மோசடி நடவடிக்கைகளுக்குப் பயன்படுத்தப்பட்ட மின்னணு உபகரணங்கள் மற்றும் ஒரு தட்டச்சு இயந்திரம் ஆகியவையும் விசாரணையாளர்களால் கண்டுபிடிக்கப்பட்டுள்ளன.
இந்த மோசடி மூலம் சம்பாதிக்கப்பட்டதாக சந்தேகிக்கப்படும் பதினைந்து இலட்சம் ரூபாய் பணமும் கைப்பற்றப்பட்ட பொருட்களில் அடங்கும். மேலும், குற்றச் செயல்களுக்குப் பயன்படுத்தப்பட்டதாகக் கூறப்படும் ஒரு மோட்டார் கார் மற்றும் ஒரு மோட்டார் சைக்கிளும் பொலிஸ் காவலில் எடுக்கப்பட்டுள்ளன. பொதுச் சொத்துச் சட்டத்தின் கீழ் வரும் குற்றங்களைச் செய்த குற்றச்சாட்டின் கீழ் சம்பந்தப்பட்ட சந்தேக நபர்கள் நீதிமன்றத்தில் ஆஜர்படுத்தப்படவுள்ளனர். குற்றப் புலனாய்வுத் திணைக்களத்தின் நிதி மற்றும் வர்த்தகக் குற்றப் புலனாய்வுப் பிரிவு இது தொடர்பான மேலதிக விசாரணைகளை மேற்கொண்டு வருகிறது.