கொழும்பு நகரில் உள்ள சில முக்கிய வீதிகளில் கடுமையான போக்குவரத்து நெரிசல் ஏற்படக்கூடும் என பொலிஸ் ஊடகப் பிரிவு அறிவித்துள்ளது. ஏனெனில், இம்முறை கொழும்பு புறக்கோட்டை மற்றும் பம்பலப்பிட்டி புதிய கதிரேசன் கோயில்களை மையமாக வைத்து நடைபெறும் 152வது வருடாந்த வேல் விழாவை முன்னிட்டு வீதி உலா வரும் வெள்ளித் தேர் பவனி நடைபெறவுள்ளது. இந்த ஊர்வலம் ஜூலை மாதம் 28 மற்றும் 31 ஆம் திகதிகளில் நடைபெறுவதால், குறித்த காலப்பகுதியில் சம்பந்தப்பட்ட வீதிகளைப் பயன்படுத்துவதைத் தவிர்த்து, முடிந்தவரை மாற்று வீதிகளைப் பயன்படுத்தி ஒத்துழைப்பு வழங்குமாறு சாரதிகள் மற்றும் பொதுமக்களிடம் பொலிஸார் விசேட வேண்டுகோள் விடுத்துள்ளனர்.
இந்த வெள்ளித் தேர் பவனியின் முதல் பயணம் ஜூலை 28 ஆம் திகதி காலை 7:30 மணியளவில் புறக்கோட்டை கடல் வீதியில் அமைந்துள்ள கதிரேசன் கோயிலில் இருந்து ஆரம்பமாகி, இரவு 8:30 மணி வரை பல்வேறு வீதிகள் வழியாக பம்பலப்பிட்டி புதிய கதிரேசன் கோயிலை சென்றடையும். ஊர்வலத்தின் பாதை கடல் வீதியில் தொடங்கி, காஸ்பா சந்தி, பிரதான வீதி, கான் சந்தி, Y.M.B.A. சந்தி, லேடன் பாஸ்டியன் வீதி, யோர்க் வீதி, பரோன் ஜயதிலக்க வீதி, ஜனாதிபதி வீதி, N.S.A. சந்தி, காலி மத்திய வீதி, காலிமுகத்திடல் சந்தி மற்றும் காலி வீதி வழியாக கொள்ளுப்பிட்டி சந்தி ஊடாக பம்பலப்பிட்டியை சென்றடைய திட்டமிடப்பட்டுள்ளது. கால அட்டவணைப்படி, காலை 10:30 மணி வரை ஊர்வலம் கடல் வீதி மற்றும் கைமன் கேட் வழியாக பிரதான வீதிக்கு செல்லும், பின்னர் காலை 11:30 மணி வரை பிரதான வீதி மற்றும் லேடன் பாஸ்டியன் வீதியில் பயணிக்கும். அதன்பிறகு, பிற்பகல் 1:00 மணி முதல் 3:00 மணி வரை ஜனாதிபதி வீதி வழியாக காலிமுகத்திடலை வந்தடையும் தேர் பவனி, பிற்பகல் 3:00 மணி முதல் 4:30 மணி வரை இந்திய உயர்ஸ்தானிகராலயம், சுற்றுலாத் திணைக்களம் மற்றும் அலரி மாளிகை வழியாக செல்ல திட்டமிடப்பட்டுள்ளது. அதன்பிறகு, மாலை 5:00 மணியளவில் காலி வீதியை வந்தடையும் ஊர்வலம், கொள்ளுப்பிட்டி மற்றும் பம்பலப்பிட்டி வழியாக பயணித்து இரவு 7:00 மணிக்கு கதிரேசன் கோயிலையும், இரவு 8:30 மணியளவில் அதன் இலக்கான பம்பலப்பிட்டி புதிய கதிரேசன் கோயிலையும் சென்றடையும்.
விழாவின் அடுத்த கட்டமாக, ஜூலை 31 ஆம் திகதி பம்பலப்பிட்டி புதிய கதிரேசன் கோயிலில் இருந்து மீண்டும் ஊர்வலம் ஆரம்பிக்கப்பட்டு, புறக்கோட்டை கடல் வீதியில் அமைந்துள்ள கதிரேசன் கோயிலை நோக்கிச் செல்லும். அன்றைய தினம் காலை 8:00 மணியளவில் ஆரம்பமாகும் இந்த ஊர்வலம் நள்ளிரவு 12:30 மணி வரை கொழும்பின் பிரதான வீதிகள் வழியாக வீதி உலா வரும். இது பம்பலப்பிட்டி கோயிலில் இருந்து புறப்பட்டு காலி வீதி வழியாக காலிமுகத்திடல் மைதானத்திற்கும், பின்னர் காலிமுகத்திடல் சென்ட்ரல் வீதி, சேதம் வீதி, யோர்க் வீதி, லேடன் பாஸ்டியன் வீதி, பிரதான வீதி, கடல் வீதி, கதிரேசன் வீதி, கிராஸ் வீதி, அண்டிவால் வீதி மற்றும் கைமன் கேட் வழியாக பயணித்து மீண்டும் புறக்கோட்டை புதிய கதிரேசன் கோயிலை சென்றடைய திட்டமிடப்பட்டுள்ளது.