லஞ்ச அல்லது ஊழல் குற்றச்சாட்டுகள் விசாரணை ஆணைக்குழுவால் முன்னாள் கடற்படைத் தளபதி அட்மிரல் ஆஃப் தி ஃப்ளீட் வசந்த கரன்னாகொட கைது செய்யப்பட்டுள்ளார்.
யோஷித ராஜபக்ஷவை கடற்படையில் இணைத்துக்கொள்ளும் போது, உரிய கல்வித் தகுதிகளை மாற்றியமைத்தமை மற்றும் அவர் உத்தியோகபூர்வமாக கடற்படையில் இணைவதற்கு முன்னரே பிரித்தானியாவின் ரோயல் கடற்படை அகடமியில் பயிற்சிக்கு அனுப்ப நடவடிக்கை எடுத்தமை ஆகிய விடயங்களை அடிப்படையாகக் கொண்டு இந்த கைது நடவடிக்கை மேற்கொள்ளப்பட்டுள்ளது.
யோஷித ராஜபக்ஷவை கடற்படை சேவையில் இணைத்துக்கொண்டமை மற்றும் அதன் பின்னர் அவரை வெளிநாட்டுப் பயிற்சிப் பாடநெறிகளுக்கு அனுப்பும் செயல்முறை தொடர்பில் லஞ்ச ஆணைக்குழுவால் மேற்கொள்ளப்பட்ட விரிவான விசாரணையின் போது இந்த முறைகேடுகள் தொடர்பான தகவல்கள் வெளியாகியுள்ளன.
விசாரணைத் தரவுகளின்படி, யோஷித ராஜபக்ஷ சம்பந்தப்பட்ட கடற்படை கெடட் பாடநெறிக்கு 2006 டிசம்பர் மாதத்தில் சேர்க்கப்பட்டுள்ளார். இருப்பினும், அதற்கு முன்னதாக, அதாவது 2006 செப்டம்பர் மாதத்திலேயே முன்னாள் கடற்படைத் தளபதி அவரை சம்பந்தப்பட்ட பிரித்தானிய கடற்படைப் பயிற்சிக்கு அனுப்ப உத்தியோகபூர்வமாக கோரிக்கை விடுத்திருப்பது தெரியவந்துள்ளது. மேலும், அவர் சேர்க்கப்பட்ட இந்த கெடட் பாடநெறிக்கான விண்ணப்பங்கள் கோரப்பட்டு, பத்திரிகை விளம்பரங்கள் கூட 2006 அக்டோபர் மாதத்தில் வெளியிடப்பட்டதாக விசாரணைகள் மூலம் மேலும் உறுதிப்படுத்தப்பட்டுள்ளது.