முன்னாள் அமைச்சர் விமல் வீரவன்சவினால் உச்ச நீதிமன்றத்தில் தாக்கல் செய்யப்பட்ட மேன்முறையீட்டு மனுவை உச்ச நீதிமன்றம் இன்று முழுமையாக நிராகரித்தது. "நத்த வெனுவட்ட அத்த" (பொய்க்குப் பதிலாக உண்மை) என்ற நூலை வெளியிட்டதன் மூலம் அறிவுசார் சொத்துரிமைச் சட்டம் மீறப்பட்டுள்ளது என கொழும்பு வர்த்தக உயர் நீதிமன்றம் வழங்கிய தீர்ப்புக்கு எதிராக இந்த மேன்முறையீடு தாக்கல் செய்யப்பட்டிருந்தது.
அதன்படி, ஜனதா விமுக்தி பெரமுனவின் பொதுச் செயலாளர் டில்வின் சில்வாவுக்கு ஒரு மில்லியன் ரூபாய் நஷ்டஈடு வழங்குமாறு வர்த்தக உயர் நீதிமன்றம் முன்னர் பிறப்பித்த உத்தரவை உச்ச நீதிமன்றம் உறுதி செய்தது.இந்தத் தீர்ப்புடன், உச்ச நீதிமன்றம் முன்னாள் அமைச்சருக்கு ஒரு சிறப்புத் தடை உத்தரவையும் பிறப்பித்தது. அதன்படி, சம்பந்தப்பட்ட நூலில் உள்ள ஜனதா விமுக்தி பெரமுன தொடர்பான ஆவணங்களை இனி அச்சிடுவது, விநியோகிப்பது அல்லது விற்பது முற்றிலும் தடைசெய்யப்பட்டுள்ளதுடன், அறிவுசார் சொத்துரிமைகளை மீறும் எந்தவொரு செயலிலும் ஈடுபட வேண்டாம் என்றும் பிரதிவாதிக்கு அறிவிக்கப்பட்டுள்ளது.
இந்த சட்ட நடவடிக்கை டில்வின் சில்வா கொழும்பு வர்த்தக உயர் நீதிமன்றத்தில் தாக்கல் செய்த வழக்கின் மூலம் தொடங்கியது. ஜனதா விமுக்தி பெரமுனவில் தான் இருந்தபோது கட்சியின் செயற்குழுவுக்கு முன்வைத்த கருத்துக்களையும், முன்மொழிவுகளையும் விமல் வீரவன்ச தனது நூலில் அத்துமீறி சேர்த்துள்ளதாக அவர் குற்றம் சாட்டினார். இதன் மூலம் தனது அறிவுசார் சொத்துரிமை மீறப்பட்டுள்ளதாக மனுதாரர் டில்வின் சில்வா நீதிமன்றத்தில் சுட்டிக்காட்டியிருந்தார்.
நீண்ட விசாரணைக்குப் பிறகு, 2019 ஜனவரி 11 அன்று கொழும்பு வர்த்தக உயர் நீதிமன்றத்தால் வெளியிடப்பட்ட தீர்ப்பில், "நத்த வெனுவட்ட அத்த" (பொய்க்குப் பதிலாக உண்மை) என்ற நூலில் உள்ள சம்பந்தப்பட்ட பகுதிகளின் உண்மையான உரிமை டில்வின் சில்வாவுக்கு சொந்தமானது என்று குறிப்பிடப்பட்டது. அந்த உயர் நீதிமன்ற உத்தரவுக்கு எதிராக தாக்கல் செய்யப்பட்ட மேன்முறையீட்டின் இறுதித் தீர்ப்பை உச்ச நீதிமன்ற நீதிபதி சோபித ராஜகருணா இன்று வெளியிட்டார்.