பெந்தோட்டை சுற்றுலா வலயத்தில் ஆகாயக் காட்சிகளைக் காணப் பயன்படுத்தப்படும் சிறிய பாராமோட்டர் விமானம் கடலில் வீழ்ந்ததில், அதில் பயணித்த 31 வயதுடைய லெபனான் நாட்டுப் பெண் ஒருவர் உயிரிழந்துள்ளார். நேற்று (29) மாலை 4.00 மணியளவில் பெந்தோட்டை கடற்கரையிலிருந்து சுமார் 600 மீட்டர் தொலைவில் உள்ள கடல் பகுதியில் இந்த துரதிர்ஷ்டவசமான விபத்து இடம்பெற்றுள்ளதாக பெந்தோட்டை பொலிஸார் தெரிவிக்கின்றனர்.
விபத்து இடம்பெற்றபோது விமானத்தை இயக்கிய கொலம்பிய நாட்டவரான மனில் இப்ராஹிம் என்ற விமானி உடனடியாக கடலில் குதித்து கரை நோக்கி நீந்தி தனது உயிரைக் காப்பாற்றிக் கொண்டார். இந்த விபத்துக்கு விமானத்தில் ஏற்பட்ட தொழில்நுட்பக் கோளாறே காரணம் என தற்போது சந்தேகிக்கப்படுகிறது.
சம்பவத்திற்குப் பிறகு காணாமல் போயிருந்த வெளிநாட்டுப் பெண்ணின் சடலம் சுமார் ஒன்றரை மணி நேரத்திற்குப் பிறகு கண்டுபிடிக்கப்பட்டுள்ளது. பேருவளை மரதான பிரதேசத்தைச் சேர்ந்த மீனவர்கள் சிலர் சிறிய படகுகள் மூலம் கடலுக்குச் சென்று இந்த சடலத்தைக் கண்டுபிடித்ததுடன், பின்னர் அது பேருவளை மரதான மீன்பிடித் துறைமுகத்திற்கு கொண்டுவரப்பட்டது.
கண்டுபிடிக்கப்பட்ட பெண்ணின் சடலம் தற்போது களுத்துறை நாகொட போதனா வைத்தியசாலையில் வைக்கப்பட்டுள்ளதுடன், விபத்தில் உயிர் தப்பிய கொலம்பிய விமானியும் அதே வைத்தியசாலையில் அனுமதிக்கப்பட்டு சிகிச்சை பெற்று வருகிறார். அளுத்கம பிரதேசத்தில் அமைந்துள்ள சுற்றுலா சேவை வழங்கும் நிறுவனத்திற்குச் சொந்தமான இந்த விமானம் வீழ்ந்த சம்பவம் தொடர்பில் பெந்தோட்டை பொலிஸ் நிலைய பொறுப்பதிகாரி அஜந்த புஷ்பகுமாரவின் தலைமையில் மேலதிக விசாரணைகள் நடைபெற்று வருகின்றன.
