மொராக்கோவிலிருந்து நூற்றுக்கணக்கான புலம்பெயர்ந்தோர் ஸ்பெயினுக்குச் சொந்தமான சியூட்டா (Ceuta) எல்லையைத் தாண்டி நுழைந்ததால் அந்நாட்டின் எல்லைப் பாதுகாப்புப் படையினர் பெரும் சிரமத்திற்கு உள்ளாகியுள்ளனர், இதனால் தேசிய அவசரநிலையை அறிவிக்க அதிகாரிகள் மீது அழுத்தம் கொடுக்கப்பட்டுள்ளது. ஏராளமானோர் கடல் வழியாக நீந்தி வந்து கடற்கரையில் இறங்குவதையும், வீதிகளில் சிதறிச் செல்வதையும் காட்டும் காட்சிகள் தற்போது ஊடகங்கள் மூலம் வெளியிடப்பட்டுள்ளன.
ஐரோப்பிய ஒன்றியத்திற்குச் சொந்தமான, ஆப்பிரிக்காவுடன் இணைக்கும் ஒரே நில எல்லைகள் ஸ்பெயினுக்குச் சொந்தமான சியூட்டா மற்றும் மெலிலா ஆகிய பகுதிகள் என்பதால், இந்த சட்டவிரோத குடியேற்றம் இரு நாடுகளுக்கும் இடையே அரசியல் ரீதியாக மிகவும் உணர்வுபூர்வமான பிரச்சினையாக மாறியுள்ளது.சியூட்டாவின் தலைவர் ஜுவான் ஜீசஸ் விவாஸ் (Juan Jesus Vivas) இதை ஒரு முழுமையான மனிதாபிமான மற்றும் சமூக அவசரநிலையாக அறிவித்துள்ளார், தற்போது சுமார் 60 புலம்பெயர்ந்தோர் இறந்து கடற்கரைக்கு அடித்து வரப்பட்டுள்ளதாகவும் தெரிவிக்கப்பட்டுள்ளது. அவரது தரவுகளின்படி, கடந்த சில நாட்களில் மட்டும் பெரியவர்கள் மற்றும் குழந்தைகள் உட்பட 1,500க்கும் மேற்பட்டோர் கடல் வழியாக வந்துள்ளனர், தற்போது அனைத்து தடுப்பு முகாம்களும் முழுமையாக நிரம்பிவிட்டன. ஒரு நாளைக்கு 200க்கும் மேற்பட்டோர் எல்லை வழியாக நுழைகிறார்கள் என்றும், பெற்றோர்கள் இல்லாமல் தனியாக வந்த சிறுவர்களுக்கான வசதிகள் அதன் அதிகபட்ச கொள்ளளவை விட சுமார் 2,400 சதவீதம் அதிகமாகிவிட்டன என்றும் திரு. விவாஸ் மேலும் தெரிவித்தார்.
ஸ்பெயினின் சோசலிச அரசாங்கம் ஆவணங்கள் இல்லாத ஐந்து லட்சம் புலம்பெயர்ந்தோருக்கு சட்டப்பூர்வ அந்தஸ்து வழங்க திட்டமிட்ட பிறகு இந்த பாரிய புலம்பெயர்ந்தோர் வருகை தொடங்கியது. இந்த பாதுகாப்பற்ற சூழ்நிலையை பாதுகாப்புப் படைகளால் கட்டுப்படுத்த முடியாததால், மிகவும் கோபமடைந்த ஸ்பெயின் குடிமக்கள் ஸ்பெயின் தேசியக் கொடிகளை ஏந்தி, புலம்பெயர்ந்தோரைத் திருப்பி அனுப்புவதற்காக வீதிகளில் இறங்கி அவர்களைத் துரத்துவதைக் காண முடிந்தது.
நிலைமையைச் சீர்செய்ய ஸ்பெயின் உள்துறை அமைச்சகம் விரைந்து செயல்பட்டு வருவதாகக் கூறுகிறது, அமைச்சர் பெர்னாண்டோ கிராண்டே-மார்லாஸ்கா (Fernando Grande-Marlaska) நிலைமையைக் கண்காணிக்க சியூட்டாவுக்குப் புறப்பட்டுள்ளார். மேலும், மொராக்கோ அரசாங்கமும் இந்த நிலைமையைக் கட்டுப்படுத்த பாதுகாப்புப் படைகளைப் பயன்படுத்தி ஸ்பெயினுடன் நெருக்கமாகச் செயல்படுவதாக ஸ்பெயின் அரசாங்கம் கூறுகிறது. இருப்பினும், ஸ்பெயினின் தேசிய காவல்துறை மற்றும் சிவில் பாதுகாப்புப் படையைப் பிரதிநிதித்துவப்படுத்தும் ஜுபோல் (Jupol) மற்றும் ஜுசில் (Jucil) தொழிற்சங்கங்கள் அரசாங்கத்தின் நடவடிக்கையை கடுமையாக விமர்சித்து, போதுமான மனித மற்றும் பௌதீக வளங்கள் இல்லாமல் அதிகாரிகள் கடும் அழுத்தத்தின் கீழ் பணியாற்றுவதாகக் கூறுகின்றன. மேலும், மொராக்கோ அரசியல் ஆதாயம் பெறுவதற்காக இந்த புலம்பெயர்ந்தோர் அழுத்தத்தை ஒரு தந்திரோபாயமாக வேண்டுமென்றே பயன்படுத்துகிறது என்றும் அவர்கள் குற்றம் சாட்டுகின்றனர்.
