தெஹிவளை நிசல செவன மயானத்திற்கு அருகில் ஒருவரை சுட்டு படுகாயப்படுத்தியமை மற்றும் கல்கிசை கோயில் வீதிப் பகுதியில் மற்றுமொருவரை சுட முயற்சித்தமை ஆகிய இரண்டு சம்பவங்களிலும் துப்பாக்கிதாரியை ஏற்றிச் சென்ற மோட்டார் சைக்கிளோட்டி மேல் மாகாண தென் குற்றப்பிரிவினரால் கைது செய்யப்பட்டுள்ளார். இவ்வாறு கைது செய்யப்பட்டவர் அத்திடிய, யசோராபுர பிரதேசத்தைச் சேர்ந்த 25 வயதுடைய இளைஞர் ஆவார்.
கடந்த ஜூலை 19ஆம் திகதி தெஹிவளை மயானத்திற்கு அருகில் டியோ ரக மோட்டார் சைக்கிளில் வந்த அடையாளம் தெரியாத இரு துப்பாக்கிதாரிகள் குருப்பு ஆராச்சிகே சுமித் ரூபசிங்க என்பவரை சுட்டு படுகாயப்படுத்திவிட்டு தப்பிச் சென்றிருந்தனர். அதற்கு இரண்டு நாட்களுக்குப் பிறகு, அதாவது ஜூலை 21ஆம் திகதி, கல்கிசை கோயில் வீதியில் உள்ள ஒரு வீட்டிற்குள் நுழைந்த அதே குழுவினர் டொன் முனசிங்க ஆராச்சிகே சமிந்த ஆனந்த என்பவரை சுட முயற்சி செய்து, அவரைத் தாக்கிவிட்டு தப்பிச் சென்றுள்ளதாக விசாரணைகளில் தெரியவந்துள்ளது.
கிடைத்த புலனாய்வுத் தகவலின் அடிப்படையில் செயற்பட்ட மேல் மாகாண தென் குற்றப்பிரிவு அதிகாரிகள் குழுவினர், தெல்கந்த பிரதேசத்தில் சுற்றிவளைப்பு மேற்கொண்டு, 7200 மில்லி கிராம் ஐஸ் போதைப்பொருளுடன் இந்த சந்தேகநபரை கைது செய்துள்ளனர். கைது செய்யப்பட்ட சந்தேகநபரிடம் மேற்கொள்ளப்பட்ட நீண்ட விசாரணைகளில், வெளிநாட்டில் தலைமறைவாக உள்ள ஒழுங்கமைக்கப்பட்ட குற்றவாளியும், பாரிய அளவிலான போதைப்பொருள் கடத்தல்காரருமான திசாநாயக்க முதலியன்சேலாகே அவிஷ்க ஏன் திசாநாயக்க அல்லது 'களுபோவில அவிஷ்க' என்பவரின் வழிகாட்டலின் பேரில் இந்த தாக்குதல்கள் ஏற்பாடு செய்யப்பட்டுள்ளமை தெரியவந்துள்ளது.
இந்த குற்றங்களுக்கு மோட்டார் சைக்கிளோட்டியாக பங்கேற்றதற்காக சந்தேகநபருக்கு இரண்டு இலட்சம் ரூபாய் பணம் கிடைத்துள்ளதுடன், அதில் எஞ்சியிருந்த 55,000 ரூபாய் பணமும் 3 கையடக்கத் தொலைபேசிகளும் பொலிஸ் பொறுப்பில் எடுக்கப்பட்டுள்ளன. சம்பவத்துடன் தொடர்புடைய பிரதான துப்பாக்கிதாரி, பயன்படுத்தப்பட்ட துப்பாக்கி மற்றும் மோட்டார் சைக்கிளை கைது செய்வதற்கான மேலதிக விசாரணைகள் நடைபெற்று வருகின்றன.
சந்தேகநபர் நீதிமன்றத்தில் ஆஜர்படுத்தப்பட்டு தடுப்புக்காவல் உத்தரவுகள் பெறப்படவுள்ளன. மேல் மாகாண தென் குற்றப்பிரிவின் பணிப்பாளர், உதவிப் பொலிஸ் அத்தியட்சகர் ஜனக குமாரவின் மேற்பார்வையின் கீழ், நிலையப் பொறுப்பதிகாரி, பொலிஸ் பரிசோதகர் இசுரு ஷாமிகவின் அறிவுறுத்தலின் பேரில், அலகு 01 இன் பொறுப்பதிகாரி, உப பொலிஸ் பரிசோதகர் பஸ்நாயக்க உள்ளிட்ட குழுவினர் மேலதிக விசாரணைகளை மேற்கொண்டு வருகின்றனர்.