ஜனாதிபதி செயலகத்துடன் இணைக்கப்பட்ட ஊழியர்களை தனிப்பட்ட பணிகளுக்காகப் பயன்படுத்தி, இருபத்தேழு இலட்ச ரூபாய்க்கும் அதிகமான அரச நிதியைத் தவறாகப் பயன்படுத்தியதாகக் கூறப்படும் குற்றச்சாட்டுகள் தொடர்பாக, ஐக்கிய தேசியக் கட்சியின் உப தலைவர் மற்றும் முன்னாள் அமைச்சருமான சட்டத்தரணி அகில விராஜ் காரியவசம் அவர்களை எதிர்வரும் ஆகஸ்ட் மாதம் 18 ஆம் திகதி வரை விளக்கமறியலில் வைக்குமாறு கொழும்பு பிரதான நீதவான் அசங்க எஸ். போதரகம் இன்று (05) உத்தரவிட்டார்.
இன்று காலை இலஞ்சம் அல்லது ஊழல் குற்றச்சாட்டுகள் விசாரணை ஆணைக்குழுவால் வாக்குமூலம் பதிவு செய்யப்பட்ட பின்னர் கைது செய்யப்பட்ட முன்னாள் அமைச்சர், கொழும்பு பிரதான நீதவான் நீதிமன்றத்தில் ஆஜர்படுத்தப்பட்டார். இரு தரப்பு சட்டத்தரணிகளின் வாதங்களைக் கருத்தில் கொண்ட பின்னர் இந்த உத்தரவு பிறப்பிக்கப்பட்டது.முன்னாள் ஜனாதிபதி ரணில் விக்கிரமசிங்கவின் பரவலாக்கப்பட்ட நிர்வாகம் தொடர்பான ஜனாதிபதியின் சிரேஷ்ட ஆலோசகராக 2022 ஆம் ஆண்டில் கடமையாற்றிய காலத்தில், தனது ஊழியர்களுக்காக எனக்கூறி நியமிக்கப்பட்ட நான்கு ஊழியர்கள் தொடர்பிலேயே இந்தக் குற்றச்சாட்டு சுமத்தப்பட்டுள்ளது. நியமிக்கப்பட்ட ஊழியர்களில் மூவர் ஜனாதிபதி செயலகத்தின் கடமைகளுக்காகப் பதிவாகாமல், குளியாப்பிட்டிய பிரதேசத்தில் உள்ள சந்தேகநபருக்குச் சொந்தமான தனியார் எரிபொருள் நிரப்பு நிலையத்தில் பணிக்கு அமர்த்தப்பட்டதாகவும், மற்றைய ஊழியர் ஒதுக்கப்பட்ட அலுவலகத்தில் எந்தவொரு கடமையிலும் ஈடுபடுத்தப்படாமல் அரச சம்பளம் மற்றும் கொடுப்பனவுகள் வழங்கப்பட்டதாகவும் அவருக்கு எதிராகக் குற்றச்சாட்டுகள் சுமத்தப்பட்டுள்ளன. இவ்வாறு அரச நிதியில் சம்பளம் மற்றும் கொடுப்பனவுகள் வழங்குவதன் மூலம் 2,768,836.14 ரூபா (27 இலட்ச ரூபாவுக்கு மேல்) அரசிற்கு நட்டத்தை ஏற்படுத்தி ஊழல் குற்றத்தைச் செய்தமை அவருக்கு எதிரான பிரதான குற்றச்சாட்டாகும்.
இலஞ்ச ஆணைக்குழு சார்பில் நீதிமன்றத்தில் ஆஜரான அதிகாரிகள், சம்பந்தப்பட்ட அமைச்சகங்கள் மற்றும் தற்காலிக ஊழியர்கள் ஜனாதிபதி செயலகத்தின் கடமைகளுக்காகப் பதிவாகாமல், குளியாப்பிட்டிய பிரதேசத்தில் உள்ள சந்தேகநபரின் தனியார் எரிபொருள் நிலையத்தில் பணிக்கு அமர்த்தப்பட்டதாகத் தெரிவித்தனர். மேலும், பிரதான சாட்சியாளர் முதலில் அளித்த வாக்குமூலத்திற்கு முரணாகப் பின்னர் சத்தியக் கடதாசி ஒன்றைச் சமர்ப்பித்ததன் பின்னணியில் ஏதேனும் செல்வாக்குச் செலுத்தப்பட்டிருக்கலாம் எனச் சந்தேகிக்கப்படுவதாகவும், சமர்ப்பிக்கப்பட்ட சில ஆவணங்கள் போலியாகத் தயாரிக்கப்பட்டவை என நம்பப்படுவதால், சந்தேகநபருக்குப் பிணை வழங்கப்பட்டால் விசாரணைகளுக்கு இடையூறு ஏற்படலாம் எனவும் ஆணைக்குழு சுட்டிக்காட்டியது.
அந்தக் கருத்துக்களுக்குப் பதிலளித்த பிரதிவாதி தரப்பு சட்டத்தரணி காமினி அல்விஸ், சம்பந்தப்பட்ட ஊழியர்கள் குளியாப்பிட்டிய எரிபொருள் நிலையம் அமைந்துள்ள கட்டிடத்தின் மேல் மாடியில் இயங்கி வந்த ஒருங்கிணைப்பு அலுவலகத்தில் பணிபுரிந்ததாகவும், அவர்கள் எரிபொருள் நிலையத்தில் கடமையாற்றவில்லை என்றும் குறிப்பிட்டார். அந்த ஊழியர்களின் வருகைப் பதிவேடுகளும் இலஞ்ச ஆணைக்குழுவிடம் ஒப்படைக்கப்பட்டுள்ளதால், எந்தவொரு நிபந்தனையின் கீழும் பிணை வழங்குமாறு சட்டத்தரணி கோரினார்.
சமர்ப்பிக்கப்பட்ட விடயங்களை விரிவாகக் கருத்தில் கொண்ட பிரதான நீதவான் அசங்க எஸ். போதரகம், சாட்சியாளர்களுக்கு அழுத்தம் கொடுக்கப்பட்டதாகவும், ஆவணங்கள் திரிபுபடுத்தப்பட்டதாகவும் ஆணைக்குழு சமர்ப்பித்த விடயங்களின் அடிப்படையில் பிணைச் சட்டத்தின்படி சந்தேகநபருக்குப் பிணை வழங்க முடியாது என்று சுட்டிக்காட்டினார். அதன்படி, சந்தேகநபரை எதிர்வரும் ஆகஸ்ட் 18 ஆம் திகதி வரை விளக்கமறியலில் வைக்குமாறு உத்தரவிட்ட நீதவான், பிரதிவாதி தரப்பு சமர்ப்பித்த வருகைப் பதிவேடுகள் தொடர்பாகவும் விசாரணை நடத்தி அடுத்த வழக்கு விசாரணையின்போது அறிக்கை சமர்ப்பிக்குமாறு இலஞ்ச ஆணைக்குழுவுக்கு உத்தரவிட்டார்.
இதற்கிடையில், வழக்கு விசாரணைக்கு வந்தபோது, பிரதிவாதி கூண்டில் இருந்த அகில விராஜ் காரியவசம் தனது சட்டத்தரணிகளுடன் உரையாடலில் ஈடுபட்டது நீதவானின் தீவிர கவனத்தை ஈர்த்தது. நீதிமன்ற நடவடிக்கைகளுக்கு இடையூறு விளைவிக்கும் இத்தகைய செயல்களுக்கு தனது நீதிமன்றத்தில் ஒருபோதும் இடமளிக்கப்படாது என வலியுறுத்திய நீதவான், அது குறித்து தனது கடுமையான எதிர்ப்பைத் தெரிவித்து சந்தேகநபருக்குக் கடுமையாக எச்சரித்தார்.