பயணிகள் போக்குவரத்து வாகனங்களில் உள்ள கட்டமைப்பு மற்றும் இயந்திரக் கோளாறுகளால் ஏற்படும் பாரிய வீதி விபத்துக்களைத் தவிர்த்து வீதிப் பாதுகாப்பை உறுதி செய்வதற்காக தயாரிக்கப்பட்ட 2026 ஆம் ஆண்டு இலக்கம் 03 மோட்டார் வாகன (பரிசோதனை) கட்டளை பாராளுமன்றத்தின் அங்கீகாரத்திற்காக சமர்ப்பிக்கப்படவுள்ளது. போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சரால் சமர்ப்பிக்கப்பட்ட இந்த யோசனைக்கு அமைச்சரவையின் அங்கீகாரம் கிடைத்துள்ளதுடன், மோட்டார் வாகனச் சட்டத்தின் கீழ் சம்பந்தப்பட்ட ஏற்பாடுகளை உள்ளடக்கிய அதிவிசேட வர்த்தமானி அறிவித்தல் 2026 மே மாதம் 19 ஆம் திகதி இலக்கம் 2489/22 இன் கீழ் வெளியிடப்பட்டுள்ளது.
மோட்டார் வாகனப் பரிசோதகர்களால் அண்மையில் மேற்கொள்ளப்பட்ட விசாரணைகளில், இயங்கும் வாகனங்களில் உள்ள பல இயந்திர மற்றும் கட்டமைப்பு குறைபாடுகள் அண்மையில் நடந்த பல விபத்துக்களுக்கு நேரடியாகக் காரணமாக அமைந்திருப்பது தெரியவந்துள்ளது. இந்த நிலைக்குத் தீர்வு காணும் வகையில், பயணிகள் போக்குவரத்து சேவைகள், பாடசாலை போக்குவரத்து சேவைகள், அலுவலக போக்குவரத்து சேவைகள் மற்றும் சிறப்பு பொழுதுபோக்கு பயணங்களுக்குப் பயன்படுத்தப்படும் வாடகை வாகனங்களின் இயக்கத் தகுதியைச் சரிபார்க்க முறையான மற்றும் உத்தியோகபூர்வ நடைமுறையை நிறுவுவதற்கான அவசரத் தேவையை அதிகாரிகள் அடையாளம் கண்டுள்ளனர்.
இவ்வாறு புதிதாக அறிமுகப்படுத்தப்படும் பரிசோதனை முறைமைக்கு, தேசிய போக்குவரத்து ஆணைக்குழு, மாகாண பயணிகள் போக்குவரத்து அதிகாரசபை மற்றும் இலங்கை போக்குவரத்து சபை ஆகிய நிறுவனங்களின் ஒழுங்குமுறைப்படுத்தலின் கீழ் இயங்கும் அனைத்து போக்குவரத்து சேவைகளும் உட்படுத்தப்படும்.