கடந்த 2020 ஆம் ஆண்டு முதல் 2025 ஆம் ஆண்டு வரையிலான ஐந்து வருட காலப்பகுதியில், இந்நாட்டிலிருந்து 3,791 விசேட வைத்தியர்கள் வெளிநாடுகளுக்குச் சென்றுள்ளதாக சுகாதார பிரதி அமைச்சர் வைத்தியர் ஹன்சக விஜேமுனி நேற்று முன்தினம் (06) பாராளுமன்றத்தில் வெளிப்படுத்தினார். இவ்வாறு நாட்டை விட்டு வெளியேறியவர்களில் பெரும்பாலானோர் தமது முதுகலை பட்டப்படிப்பு கல்வி நடவடிக்கைகளை பூர்த்தி செய்யும் நோக்குடன் வெளிநாடுகளுக்குச் சென்றுள்ளதாகவும், வெளிநாட்டு வேலைவாய்ப்புகளைப் பெறுதல், தமது துணைவருடன் வெளிநாடு செல்லுதல், பல்வேறு கல்வி நடவடிக்கைகள் மற்றும் மலட்டுத்தன்மைக்கான சிகிச்சைகளைப் பெறுதல் போன்ற பிற தேவைகளுக்காக ஏனையோர் வெளியேறியுள்ளதாகவும் பிரதி அமைச்சர் சுட்டிக்காட்டினார்.
இந்த ஆண்டு மாத்திரம் இதுவரை 280 வைத்தியர்கள் வெளிநாடுகளுக்குச் செல்வதற்காக விண்ணப்பங்களைச் சமர்ப்பித்துள்ளதாக அவர் சபையில் மேலும் கருத்துத் தெரிவித்தார். அத்துடன், 2020 ஆம் ஆண்டு முதல் 2026 ஜூன் மாதம் வரையிலான காலப்பகுதியில் 1,429 வைத்தியர்கள் வெளிநாடுகளுக்குச் செல்வதற்காக சம்பளமற்ற விடுமுறையை அங்கீகரித்துள்ளனர் என்றும், அவர்களில் 140 விசேட வைத்தியர்கள் இவ்வாறு சம்பளமற்ற விடுமுறையைப் பெற்று வெளிநாடுகளுக்குச் சென்றுள்ளதாகவும் பிரதி அமைச்சர் வெளிப்படுத்தினார்.
சேவையை விட்டு விலகிய மற்றும் பதவியை இராஜினாமா செய்த பின்னர் வெளிநாடுகளுக்குச் சென்ற வைத்தியர்கள் தொடர்பான தகவல்களைச் சமர்ப்பிக்க சுகாதார அமைச்சுக்கு இயலாமை உள்ளதாகவும் இங்கு தெரிவிக்கப்பட்டது. எவ்வாறாயினும், வைத்தியர்கள் நாட்டை விட்டு வெளியேறுவதைத் தடுக்கும் ஒரு நடவடிக்கையாக, அவர்களுக்கு இலங்கையில் சேவை செய்வதற்கு பொருத்தமான சூழலை உருவாக்குவதில் அரசாங்கம் விசேட கவனம் செலுத்தியுள்ளதாகவும், வைத்தியர்களின் கொடுப்பனவுகள், போக்குவரத்து மற்றும் தங்குமிட வசதிகளை மேம்படுத்த நடவடிக்கைகள் எடுக்கப்பட்டு வருவதாகவும், அது தொடர்பான புதிய யோசனைகள் ஆராயப்பட்டு வருவதாகவும் பிரதி அமைச்சர் மேலும் குறிப்பிட்டார்.