மகாவலி கங்கையின் நீர்மட்டம் வேகமாக உயர்ந்து வருவதால், நாவலப்பிட்டி, கம்பளை மற்றும் பேராதனை ஆகிய பிரதேசங்களில் சிறிய வெள்ளப்பெருக்கு ஏற்படும் அச்சுறுத்தல் உருவாகியுள்ளதாக அனர்த்த முகாமைத்துவ நிலையம் தெரிவித்துள்ளது.
கொத்மலை காமினி திசாநாயக்க நீர்த்தேக்கத்தின் நீர்மட்டம் உச்ச வரம்பை அண்மித்துள்ளதால், இன்று பிற்பகல் 3.00 மணி முதல் அதன் வான் கதவுகளைத் திறக்க நடவடிக்கை எடுக்கப்படும் என அனர்த்த முகாமைத்துவ நிலையத்தின் பணிப்பாளர் நாயகம் ஓய்வுபெற்ற மேஜர் ஜெனரல் சம்பத் கொட்டுவேகொட தெரிவித்தார்.
நீர்த்தேக்கத்தின் வான் கதவுகள் திறக்கப்படுவதால் மகாவலி கங்கையில் சேரும் நீரின் அளவு கணிசமாக அதிகரிக்கும் என்பதால், பஸ்பாகே கோரளய, கங்க இஹல கோரளய, உடபலாத்த, உடுநுவர, யடிநுவர மற்றும் கங்கவட்ட கோரளய ஆகிய பிரதேச செயலாளர் பிரிவுகளில் உள்ள பல தாழ்நிலப் பகுதிகளுக்கும் வெள்ள அபாயம் ஏற்பட்டுள்ளது.
அவசர அனர்த்த நிலைமையை எதிர்கொள்ளும் வகையில், சம்பந்தப்பட்ட ஆபத்தான பகுதிகளுக்கு முப்படையினர் மற்றும் பொலிஸ் குழுக்கள் ஏற்கனவே நியமிக்கப்பட்டுள்ளனர். தேவைக்கேற்ப அப்பகுதி மக்களை பாதுகாப்பான இடங்களுக்கு அனுப்ப தேவையான அனைத்து ஏற்பாடுகளும் செய்யப்பட்டுள்ளன.
ஏதேனும் அவசர விபத்து அல்லது அனர்த்த நிலைமை பதிவாகினால், அது குறித்து உடனடியாக 117 என்ற அவசர அழைப்பு இலக்கத்திற்கு அறிவிக்குமாறு அனர்த்த முகாமைத்துவ நிலையம் பொதுமக்களிடம் மேலும் கோரியுள்ளது.