இலங்கையின் நீதித்துறை அமைப்பின் செயல்திறனை மேம்படுத்துவதையும், வழக்கு தாமதங்களைக் குறைப்பதையும் நோக்கமாகக் கொண்ட முன்மொழியப்பட்ட கட்டமைப்பு சீர்திருத்தங்கள் அரசியலமைப்பிற்கு இணங்குவதாக சட்டமா அதிபர் உறுதிப்படுத்தியுள்ளார். அதன்படி, அரசியலமைப்பு, நீதித்துறை அமைப்புச் சட்டம் மற்றும் அரசு மற்றும் நீதித்துறை அதிகாரிகளின் ஓய்வூதிய கட்டளைச் சட்டம் ஆகிய சட்ட ஏற்பாடுகளை மாற்றுவதன் மூலம் இந்த புதிய சீர்திருத்தங்களை நடைமுறைப்படுத்த ஏற்பாடுகள் செய்யப்பட்டுள்ளன.
இந்த முன்மொழியப்பட்ட சட்ட மாற்றங்களின்படி, உச்ச நீதிமன்றம், மேன்முறையீட்டு நீதிமன்றம், உயர் நீதிமன்றம் அத்துடன் மாவட்ட மற்றும் நீதவான் நீதிமன்றங்களை பிரதிநிதித்துவப்படுத்தும் அனைத்து நீதிபதிகளின் ஓய்வூதிய வயது வரம்பு இரண்டு வருடங்கள் அதிகரிக்கப்படும். மேலும், மேன்முறையீட்டு நீதிமன்ற நீதிபதிகளின் எண்ணிக்கை 19 இலிருந்து 24 ஆகவும், உயர் நீதிமன்ற நீதிபதிகளின் எண்ணிக்கை 110 இலிருந்து 120 ஆகவும் அதிகரிக்க நடவடிக்கை எடுக்கப்பட்டுள்ளது.
வழக்குகள் குவியும் பிரச்சினைக்கு நடைமுறைத் தீர்வுகளை வழங்கும் வகையில், தற்போதுள்ள சிவில் மேன்முறையீட்டு உயர் நீதிமன்றத்திற்குப் பதிலாக இரண்டு உயர் நீதிமன்றங்கள் நிறுவப்பட்டுள்ளன. மேலும், வர்த்தக உயர் நீதிமன்றங்களின் எண்ணிக்கை 3 இலிருந்து 5 ஆகவும், குற்றவியல் வழக்குகளை விசாரிக்கும் உயர் நீதிமன்றங்களின் எண்ணிக்கை 8 இலிருந்து 11 ஆகவும் அதிகரிக்கப்பட்டுள்ளது. அத்துடன், முன்னாள் அமைச்சர்கள் பயன்படுத்திய பல உத்தியோகபூர்வ குடியிருப்புகள் நீதிமன்ற வளாகங்களாக மாற்றப்பட்டுள்ளன.
இலஞ்சம் தொடர்பான வழக்குகளை விரைவாக விசாரிப்பதற்காக கொழும்பு உயர் நீதிமன்றத்தின் இலக்கம் 06, 10 மற்றும் 11 ஆகிய அறைகளில் தினசரி வழக்கு விசாரணைகளை நடத்துவதற்கு வசதிகள் செய்யப்பட்டுள்ளன. அத்துடன், தெய்யந்தர, அகுணுகொலபெலஸ்ஸ, பிபில மற்றும் கல்கமுவ உள்ளிட்ட 8 பிரதேச நீதவான் நீதிமன்றங்களின் அதிகாரங்கள் மாவட்ட மட்டம் வரை விரிவுபடுத்தப்பட்டுள்ளன.
அதிகாரிகள் பற்றாக்குறை காரணமாக மூடப்பட்டிருந்த இரத்தினபுரி, கம்பஹா, அனுராதபுரம் மற்றும் அம்பாறை நீதிமன்றங்கள் மீண்டும் திறக்கப்பட்டுள்ளன. அத்துடன், புத்தளம், வெல்லவாய, ஹட்டன் மற்றும் வெலிசற ஆகிய பிரதேசங்களில் புதிய நீதிமன்றங்கள் நிறுவப்பட்டுள்ளன. மேலும், வழக்கு விசாரணைகளின் வேகத்தை அதிகரிப்பதை நோக்கமாகக் கொண்டு, அரசாங்க இரசாயன பகுப்பாய்வுத் திணைக்களத்திற்கு புதிய அதிகாரிகளை நியமிப்பதற்கும், நவீன தொழில்நுட்ப உபகரணங்களை வழங்குவதற்கும் ஏற்பாடுகள் செய்யப்பட்டு வருகின்றன.