இலங்கையின் புதிய அமெரிக்கத் தூதுவராக நியமிக்கப்பட்டுள்ள எரிக் மேயர் தனது கடமைகளை ஆரம்பிப்பதற்காக இலங்கைக்கு வந்துள்ளார். ஆகஸ்ட் 22ஆம் திகதி மாலை அவர் கொழும்பை வந்தடைந்ததாக இலங்கைக்கான அமெரிக்கத் தூதரகம் உறுதிப்படுத்தியுள்ளது.
திரு. மேயர் நாட்டின் 29வது அமெரிக்கத் தூதுவராகப் பணியாற்றவுள்ளார்.இலங்கைக்கான தூதுவராக நியமிக்கப்பட்டமை குறித்து தனது உற்சாகத்தை வெளிப்படுத்திய எரிக் மேயர், இலங்கையில் அமெரிக்காவைப் பிரதிநிதித்துவப்படுத்துவது தனக்குக் கிடைத்த ஒரு பெரிய மரியாதை என்று குறிப்பிட்டார். இரு நாடுகளுக்கும் இடையிலான வலுவான ஜனநாயக அடித்தளத்தை மேலும் வலுப்படுத்துவதாகவும், அமெரிக்க வணிகத் துறைக்கு புதிய வாய்ப்புகளை உருவாக்குவதாகவும், பொதுவான பாதுகாப்பு இலக்குகளை அடைவதாகவும் அவர் கூறினார். மேலும், இரு நாடுகளின் மக்களின் பொருளாதார செழிப்பை மேம்படுத்தும் வகையில் அமெரிக்க-இலங்கை இருதரப்பு கூட்டாண்மையை முன்னெடுத்துச் செல்வது தனது முக்கிய குறிக்கோள்களில் ஒன்று என்றும் அவர் சுட்டிக்காட்டினார்.
இலங்கையில் தனது கடமைகளை ஏற்றுக்கொள்வதற்கு முன்னர், எரிக் மேயர் நோர்வேயில் உள்ள அமெரிக்க தூதரகத்தில் பதில் தூதுவராகப் பணியாற்றினார். மேலும், அவர் அமெரிக்க இராஜாங்கத் திணைக்களத்தின் தெற்கு மற்றும் மத்திய ஆசிய விவகாரங்களுக்கான பணியகத்தில் சிரேஷ்ட பணியக அதிகாரியாகவும் கடமையாற்றியுள்ளார்.
