கடந்த ஆண்டு பகிடிவதை சம்பவம் தொடர்பில் கிழக்கு மண்டபத்தைச் சேர்ந்த ஆறு மாணவர்கள் கைது செய்யப்பட்டனர்

கிழக்கு பல்கலைக்கழகத்தின் திருகோணமலை வளாகத்தில் உள்ள உணவகத்தில் இடம்பெற்றதாகக் கூறப்படும் பகிடிவதை சம்பவம் தொடர்பில் வெகுசனத் தொடர்பு மற்றும் வணிக கற்கைகள் பீடத்தைச் சேர்ந்த ஆறு மாணவர்கள் குற்றப் புலனாய்வுத் திணைக்களத்தால் கைது செய்யப்பட்டுள்ளனர். 2022/23 கல்வி ஆண்டுக்கான குறித்த பீடத்தில் இணைந்த புதிய மாணவர்களுக்கு 2025 ஏப்ரல் 29 ஆம் திகதி பகிடிவதை செய்து பாலியல் ரீதியாக துன்புறுத்திய சம்பவம் தொடர்பில் இந்த நடவடிக்கை எடுக்கப்பட்டுள்ளது.

கிடைக்கப்பெற்ற முறைப்பாட்டின் அடிப்படையில் நீண்ட விசாரணைகளை மேற்கொண்டதன் பின்னர், குற்றப் புலனாய்வுத் திணைக்களத்தின் பகிடிவதை முறைப்பாட்டு விசாரணைப் பிரிவின் அதிகாரிகள் குழுவினால் இந்த கைது நடவடிக்கை மேற்கொள்ளப்பட்டுள்ளது.

இவ்வாறு கைது செய்யப்பட்டவர்களில் ஒரு மாணவியும் அடங்குவதாக குற்றப் புலனாய்வுத் திணைக்களம் உறுதிப்படுத்தியுள்ளது. குறித்த மாணவியும் ஐந்து மாணவர்களும் விரைவில் திருகோணமலை நீதவான் நீதிமன்றில் ஆஜர்படுத்தப்படவுள்ளனர்.