ஆறு வயது சிறுமி ஒருவர் புளியங்கொட்டை தொண்டையில் சிக்கியதால் துரதிர்ஷ்டவசமாக உயிரிழந்த செய்தி கலஹா, நிலம்ப பிரதேசத்தில் இருந்து பதிவாகியுள்ளது. இவ்வாறு உயிரிழந்தவர் ஒரே குடும்பத்தைச் சேர்ந்த இரட்டைச் சகோதரிகளில் ஒருவரான சனுதி லக்ஷானி என்ற சிறுமி ஆவார்.
சம்பவம் நடந்த அன்று சிறுமிகளின் தாய் வேலைக்குச் சென்றிருந்தார், தந்தையும் வெளியூர் ஒன்றில் சேவையில் ஈடுபட்டிருந்தார். மதிய உணவு உண்ணத் தயாரான வேளையில், கூரையில் இருந்த உடும்பைக் கண்டு பயந்த மூன்று சிறுமிகள் அருகில் உள்ள பெரியம்மாவின் வீட்டிற்குச் சென்றிருந்தனர். அங்கு புளியங்காயை சாப்பிட்டுக் கொண்டிருந்த 14 வயது மூத்த சகோதரி காஞ்சனா லக்ஷானியிடம் இருந்து உயிரிழந்த சிறுமியும் புளியங்காயைக் கேட்டு வாங்கி சாப்பிட்டுள்ளார்.
புளியங்கொட்டையை கையில் வைத்திருந்த சிறுமி சிறிது நேரத்தில் மூச்சுவிட முடியாமல் திணறத் தொடங்கியுள்ளார், மூத்த சகோதரியின் அலறல் சத்தத்துடன் சம்பவ இடத்திற்கு வந்த தாய் சிறுமியின் முதுகில் தட்டி மருத்துவமனைக்கு அழைத்துச் செல்ல நடவடிக்கை எடுத்துள்ளார். இருப்பினும், கடந்த 2ஆம் திகதி பிற்பகல் 3.00 மணியளவில் பேராதனை சிறிமாவோ பண்டாரநாயக்க விசேட சிறுவர் வைத்தியசாலையில் அனுமதிக்கப்பட்ட போதே சிறுமி உயிரிழந்திருந்தமை விசாரணைகளில் தெரியவந்துள்ளது.
பேராதனை போதனா வைத்தியசாலையின் திடீர் மரண விசாரணை அதிகாரி அமல் ஜயவர்தன முன்னிலையில் நடைபெற்ற மரண விசாரணையில், கலஹா பொலிஸ் நிலையத்தின் பொலிஸ் சார்ஜன்ட் ஜயதிலக்க சாட்சியங்களை வழிநடத்தினார். சிறுமியின் மரணம் சுவாசக் குழாயின் கீழ்ப்பகுதியில் ஏதேனும் ஒரு பொருள் சிக்கியதால் ஏற்பட்ட அடைப்பு காரணமாக நிகழ்ந்தது என பேராதனை போதனா வைத்தியசாலையின் விசேட சட்ட வைத்திய நிபுணர் ஆர்.பி. ஜயசூரிய மேற்கொண்ட பிரேத பரிசோதனையில் தீர்மானிக்கப்பட்டுள்ளது. மேலும், அடிப்படை முதலுதவி பற்றிய குறைந்தபட்ச அறிவு இருந்திருந்தால் இந்தச் சிறுமியின் உயிரைக் காப்பாற்றியிருக்க முடியும் என பேராதனை போதனா வைத்தியசாலையின் சட்ட வைத்திய அதிகாரி பாலித பண்டார சுபசிங்க மேலும் தெரிவித்தார்.
