லங்கா ஐ.ஓ.சி, சினோபெக் மற்றும் ஆர்.எம். பார்க் ஆகிய தனியார் எரிபொருள் நிறுவனங்கள் டீசல் விநியோகத்தை மட்டுப்படுத்த நடவடிக்கை எடுத்ததன் காரணமாக தீவு முழுவதும் எரிபொருள் நிரப்பு நிலையங்களுக்கு அருகில் கடும் நெரிசல் ஏற்பட்டுள்ளதாக பெற்றோலிய விநியோகஸ்தர்கள் சங்கம் தெரிவித்துள்ளது.
தற்போது தீவு முழுவதும் டீசல் விநியோக நடவடிக்கைகள் இலங்கை பெற்றோலியக் கூட்டுத்தாபனத்திற்கு சொந்தமான சுமார் 650 எரிபொருள் நிரப்பு நிலையங்களில் மட்டுமே சுறுசுறுப்பாக நடைபெறுவதாகவும் சங்கம் சுட்டிக்காட்டுகிறது.அரசாங்கம் எரிபொருள் விலைகளைக் குறைக்கும் போதெல்லாம், இந்த நிறுவனங்களும் தங்கள் விலைகளை அதற்கேற்ப குறைத்துள்ளன. இதன் மூலம் ஏற்படும் நிதி இழப்பை அரசாங்கம் ஈடுசெய்யும் என்று ஒரு ஒப்பந்தம் எட்டப்பட்டிருந்தாலும், உறுதியளிக்கப்பட்ட நிதியை அரசாங்கம் வழங்காததால், டீசல் விநியோகத்தை மட்டுப்படுத்த சம்பந்தப்பட்ட நிறுவனங்கள் நடவடிக்கை எடுத்துள்ளன.
இதன்படி, லங்கா ஐ.ஓ.சி நிறுவனத்திற்கு சொந்தமான 250 எரிபொருள் நிரப்பு நிலையங்கள், சினோபெக் எரிபொருள் நிரப்பு நிலையங்கள் 150 மற்றும் ஆர்.எம். பார்க் நிறுவனத்தின் 100 எரிபொருள் நிரப்பு நிலையங்கள் உட்பட சுமார் 500 எரிபொருள் நிரப்பு நிலையங்களில் டீசல் விநியோகம் ஏற்கனவே மட்டுப்படுத்தப்பட்டுள்ளதாக விநியோகஸ்தர்கள் சுட்டிக்காட்டுகின்றனர். டீசல் விநியோகம் தொடர்ந்து மட்டுப்படுத்தப்பட்டால், எதிர்காலத்தில் நாட்டில் கடுமையான எரிபொருள் நெருக்கடி ஏற்படக்கூடும் என்றும் அவர்கள் எச்சரிக்கின்றனர்.
எரிபொருள் கையிருப்பு மட்டுப்படுத்தப்படுவதற்கு எதிராக தமது எதிர்ப்பை வெளிப்படுத்தியுள்ள பெற்றோலிய விநியோகஸ்தர்கள் சங்கம், சம்பந்தப்பட்ட நிறுவனங்களின் அனைத்து விநியோகஸ்தர்களுக்கும் எரிபொருள் நிரப்பு நிலையங்களை தொடர்ச்சியாக இயக்கக்கூடிய ஒரு சாதகமான திட்டத்தை வகுக்குமாறு அறிவித்துள்ளது.
இதற்கிடையில், செப்டம்பர் 03 ஆம் திகதி முதல் அமுலுக்கு வரும் வகையில் ஆட்டோ டீசல் விநியோகத்தை மட்டுப்படுத்த லங்கா ஐ.ஓ.சி நிறுவனம் எடுத்த தீர்மானம் காரணமாக போக்குவரத்து, தொழில்துறை, நகர்ப்புற கட்டுமானம் உள்ளிட்ட பல அத்தியாவசிய பொருளாதாரத் துறைகளின் நடவடிக்கைகளுக்கு கடும் இடையூறுகள் ஏற்பட்டுள்ளதாக லங்கா ஐ.ஓ.சி விநியோகஸ்தர்கள் சங்கம் தெரிவித்துள்ளது. இந்த நிலைமை காரணமாக நுகர்வோர் பெரும் சிரமத்திற்கு ஆளாகியுள்ளனர் என்று சங்கம் லங்கா ஐ.ஓ.சி நிர்வாக இயக்குநருக்கு கடிதம் அனுப்பி சுட்டிக்காட்டியுள்ளது.
எரிபொருள் இல்லாததால் நுகர்வோர் மற்ற விநியோகஸ்தர்களை நாடினால், அந்த நுகர்வோரை மீண்டும் பெறுவது மிகவும் கடினமாக இருக்கும் என்றும், இது LIOC வலையமைப்பின் ஆட்டோ டீசல் விற்பனையை நீண்ட காலத்திற்கு பாதகமாக பாதிக்கும் என்றும் சம்பந்தப்பட்ட கடிதத்தில் மேலும் குறிப்பிடப்பட்டுள்ளது. எனவே, இது தொடர்பாக பொருத்தமான பொறிமுறையை உடனடியாக வகுத்துத் தருமாறு லங்கா ஐ.ஓ.சி விநியோகஸ்தர்கள் சங்கம் நிறுவன நிர்வாகத்திடம் கோரிக்கை விடுத்துள்ளது.