டிஜிட்டல் காப்பீட்டு அட்டைகள் தொடர்பாக பொலிஸ் மா அதிபரால் வழங்கப்பட்ட வழிகாட்டுதல்களைப் புறக்கணித்து சாரதிகளை அசௌகரியத்திற்கு உள்ளாக்கும் பொலிஸ் அதிகாரிகளுக்கு எதிராக கடுமையான ஒழுங்கு நடவடிக்கை எடுக்கப்படும் என பிரதிப் பொலிஸ் மா அதிபர் டபிள்யூ. பி.
ஜே. சேனாதிபதி தெரிவித்துள்ளார். ஊடகவியலாளர் சந்திப்பில் கலந்துகொண்டு கருத்து தெரிவித்த அவர், பாதுக்க மற்றும் கம்பஹா பொலிஸ் நிலையங்களில் சில அதிகாரிகள் டிஜிட்டல் காப்பீட்டு அட்டைகளை ஏற்க மறுத்ததாக தகவல்கள் கிடைத்துள்ளதாக சுட்டிக்காட்டினார்.காப்பீட்டு ஒழுங்குமுறை ஆணைக்குழுவின் அங்கீகாரம் பெற்ற 14 காப்பீட்டு நிறுவனங்களால் வழங்கப்படும் டிஜிட்டல் காப்பீட்டு அட்டைகள் உத்தியோகபூர்வமாக ஏற்றுக்கொள்ளப்பட வேண்டும் என 2026 மே மாதம் 05 ஆம் திகதி வெளியிடப்பட்ட R.T.M. 93 ஆம் இலக்க செய்தியின் மூலம் பொலிஸ் மா அதிபரால் அனைத்து பொலிஸ் நிலையங்களுக்கும் ஏற்கனவே அறிவுறுத்தல்கள் வழங்கப்பட்டுள்ளன. மேலும், 2006 ஆம் ஆண்டு இலக்கம் 19 இன் இலத்திரனியல் கொடுக்கல் வாங்கல் சட்டத்திற்கு இணங்க இந்த டிஜிட்டல் காப்பீட்டு அட்டைகளுக்கு முழுமையான சட்ட அங்கீகாரம் கிடைக்கும் என்றும் பிரதிப் பொலிஸ் மா அதிபர் குறிப்பிட்டார்.
ஒரு சாரதியிடம் தொடர்புடைய டிஜிட்டல் அட்டை பௌதீக ரீதியாக இல்லாத சந்தர்ப்பத்திலும், காப்பீட்டு பாதுகாப்பு செயலில் உள்ளதா என்பதை உறுதிப்படுத்த பொலிஸ் அதிகாரிகளுக்கு வசதிகள் செய்யப்பட்டுள்ளன. அதன்படி, *1338# சேவை மூலம், 1338 என்ற எண்ணுக்கு SMS அனுப்புவதன் மூலம் அல்லது 1338 அவசர அழைப்பு மையத்தை அழைப்பதன் மூலம் வாகன இலக்கம் அல்லது காப்பீட்டு இலக்கத்தை உள்ளிட்டு தொடர்புடைய தகவல்களைப் பெறலாம்.
ஏதேனும் ஒரு பொலிஸ் அதிகாரி டிஜிட்டல் காப்பீட்டு அட்டையை ஏற்க மறுத்தால், அது குறித்து அருகிலுள்ள பொலிஸ் நிலைய பொறுப்பதிகாரிக்கோ அல்லது 070 47 55 600 என்ற போக்குவரத்து தலைமையகத்தின் விசேட தொலைபேசி இலக்கத்திற்கோ முறைப்பாடு செய்ய பொதுமக்களுக்கு வாய்ப்பு வழங்கப்பட்டுள்ளது.
நாடு முழுவதும் உள்ள 607 பொலிஸ் நிலையங்களின் பொறுப்பதிகாரிகள் மூலம் அனைத்து அதிகாரிகளுக்கும் மீண்டும் அறிவுறுத்தல்கள் வழங்க நடவடிக்கை எடுக்கப்பட்டுள்ளதுடன், அதிகாரிகளின் விழிப்புணர்வை மேலும் அதிகரித்து, சாரதிகளுக்கு ஏற்படும் தேவையற்ற அசௌகரியங்களைத் தடுப்பதும், தொடர்புடைய நடைமுறையை முறையாக செயல்படுத்துவதும் இதன் முக்கிய நோக்கமாகும்.