ஸ்ரீலங்கன் விமான சேவைக்கு ஏர்பஸ் பயணிகள் விமானங்களை கொள்வனவு செய்யும் நடவடிக்கையின் போது இடம்பெற்றதாக கூறப்படும் பாரிய நிதி மோசடிகள் மற்றும் பணமோசடி தொடர்பில் மேற்கொள்ளப்பட்ட விசாரணைகள் தற்போது முழுமையாக நிறைவடைந்துள்ளதாக குற்றப் புலனாய்வுத் திணைக்களம் இன்று (14) நீதிமன்றத்திற்கு அறிவித்தது.
அதன்படி, இச்சம்பவம் தொடர்பாக நாடாளுமன்ற உறுப்பினர் நாமல் ராஜபக்ஷ உள்ளிட்ட சந்தேக நபர்களுக்கு எதிராக எதிர்காலத்தில் குற்றப்பத்திரிகை தாக்கல் செய்ய நடவடிக்கை எடுக்கப்படும் என இரகசியப் பொலிஸார் நீதிமன்றத்தில் தெரிவித்தனர். கொழும்பு கோட்டை நீதவான் பசன் அமரசேன முன்னிலையில் இந்த வழக்கு விசாரணைக்கு வந்தபோது இத்தகவல்கள் வெளியாகின.
இந்த வழக்கின் குற்றச்சாட்டுகளுக்கு உள்ளான நாடாளுமன்ற உறுப்பினர் நாமல் ராஜபக்ஷ, நீதிமன்றத்தால் விதிக்கப்பட்ட தலா 100 மில்லியன் ரூபாய் பெறுமதியான இரண்டு சரீரப் பிணைகளில் தற்போது விடுவிக்கப்பட்டுள்ளார்.
குற்றப் புலனாய்வுத் திணைக்களத்தால் முன்வைக்கப்பட்ட விடயங்களை பரிசீலித்த கோட்டை நீதவான், குறித்த வழக்கை மீண்டும் எதிர்வரும் நவம்பர் மாதம் 18ஆம் திகதி விசாரணைக்கு அழைக்க திகதி நிர்ணயித்தார். மேலும், குறித்த வழக்கு விசாரணைக்கு அழைக்கப்படும் தினத்தில் நாமல் ராஜபக்ஷ சிறையில் இருந்தால், அன்றைய தினம் அவரை நீதிமன்றத்தில் கட்டாயம் ஆஜர்படுத்த நடவடிக்கை எடுக்குமாறு நீதவான் சிறைச்சாலை அத்தியட்சகருக்கு மேலதிகமாக உத்தரவிட்டார்.