இருவரை மணந்த ஹேஷானுக்கு 6 மாத சிறைத்தண்டனை மற்றும் ஒரு லட்சம் ரூபாய் அபராதம்

 சட்டப்பூர்வமாக திருமணம் செய்துகொண்ட நிலையில், அந்த திருமணத்தை ரத்து செய்யாமல் மற்றொரு பெண்ணை திருமணம் செய்து பலதார மணம் புரிந்த ஒருவருக்கு ஹொரணை பிரதான நீதவான் சந்தன கலன்சூரிய அவர்களால் ஆறு மாத சிறைத்தண்டனை விதிக்கப்பட்டுள்ளது.

சம்பந்தப்பட்ட சிறைத்தண்டனைக்கு மேலதிகமாக, முதல் திருமணத்தின் மனைவிக்கு ஒரு லட்சம் ரூபாய் நஷ்டஈடு செலுத்துமாறும் பிரதிவாதிக்கு நீதவான் உத்தரவிட்டார். அந்த நஷ்டஈட்டை செலுத்தத் தவறினால், அவருக்கு மேலும் ஆறு மாத சிறைத்தண்டனை விதிக்கப்படும் என்றும் உத்தரவில் குறிப்பிடப்பட்டுள்ளது.

இவ்வாறு தண்டனை விதிக்கப்பட்டவர் புலத்சிங்கள, ஹல்வத்துறையைச் சேர்ந்த ஹேஷான் மதுசங்க என்பவராவார். இவர் இங்கிரிய பிரதேசத்தைச் சேர்ந்த ஒரு பெண்ணை திருமணம் செய்து சுமார் நான்கு வருடங்களாக அவருடன் வாழ்ந்து வந்துள்ளார். அந்த திருமணத்தின் மூலம் அவருக்கு இரண்டரை வயது குழந்தை ஒன்று இருப்பதும் நீதிமன்றத்தில் தெரியவந்துள்ளது.

முதல் திருமணம் சட்டப்பூர்வமாக இருக்கும்போதே, இவர் வேறு ஒரு பெண்ணை திருமணம் செய்து அவருடனும் வாழ்ந்து வந்துள்ளார். மேலும், இதற்கு முன்னர் ஒரு சிறுமியை பாலியல் துஷ்பிரயோகம் செய்த குற்றச்சாட்டு தொடர்பாக கொழும்பு மேல் நீதிமன்றத்தால் வழங்கப்பட்ட ஆறு மாத ஒத்திவைக்கப்பட்ட சிறைத்தண்டனையும் இவருக்கு இருந்ததாக வழக்கு விசாரணையின் போது தெரியவந்தது.

முதல் திருமணத்தின் மனைவி பொலிஸில் செய்த முறைப்பாட்டின் அடிப்படையில் சந்தேகநபர் கைது செய்யப்பட்டு நீதிமன்றத்தில் ஆஜர்படுத்தப்பட்டார். அங்கு பாதிக்கப்பட்ட தரப்புக்காக சட்டத்தரணி சாதனி திசாநாயக்க அவர்களும், பிரதிவாதி தரப்புக்காக சட்டத்தரணி இசாரா ருத்ரிகு அவர்களும் நீதிமன்றத்தில் வாதாடினர்.