டெய்ஸி பாட்டியின் மனநல மருத்துவ அறிக்கை கோரப்பட்டது

 முன்னாள் ஜனாதிபதி மஹிந்த ராஜபக்ஷவின் அத்தை திருமதி டெய்ஸி பொரஸ்ட் அவர்களுக்கு எதிராகத் தாக்கல் செய்யப்பட்டுள்ள வழக்கில் ஆஜராவதற்கு அவர் பொருத்தமான மனநிலையில் உள்ளாரா என்பதை உறுதிப்படுத்திக் கொள்வதற்காக மனநல மருத்துவ அறிக்கை ஒன்றைக் கோர கொழும்பு மேல் நீதிமன்றம் நேற்று (26) தீர்மானித்தது.

பணச் சலவை தடுப்புச் சட்டத்தின் கீழ் தாக்கல் செய்யப்பட்டுள்ள இந்த வழக்கு, கொழும்பு மேல் நீதிமன்ற நீதிபதி உதேஷ் ரணதுங்க முன்னிலையில் விசாரணைக்கு வந்தபோது, கொழும்பு பிரதான சட்ட வைத்திய அதிகாரிக்கு இந்த உத்தரவு பிறப்பிக்கப்பட்டது.

இங்கு, பிரதிவாதி சார்பில் ஆஜரான ஜனாதிபதி சட்டத்தரணி அனில் சில்வா, தனது கட்சிக்காரர் டிமென்ஷியா மற்றும் அல்சைமர் நோய்களால் பாதிக்கப்பட்டுள்ளதாகவும், இந்த நிலையில் அவருக்கு எதிராக வழக்கை நடத்துவது சட்டவிரோதமானது என்றும் நீதிமன்றத்தில் தெரிவித்தார். பிரதிவாதியின் இந்த வாதத்திற்கு பதிலளித்த, முறைப்பாடு சார்பில் ஆஜரான மேலதிக சொலிசிட்டர் ஜெனரல் ஜனக பண்டார, பிரதிவாதி வழக்கை எதிர்கொள்ளும் மனநிலையில் உள்ளாரா என்பதை விஞ்ஞான ரீதியாக உறுதிப்படுத்திக் கொள்வதற்காக கொழும்பு பிரதான சட்ட வைத்திய அதிகாரி ஊடாக ஒரு நிபுணர் மருத்துவ அறிக்கையைப் பெறுவது மிகவும் பொருத்தமானது என்று கோரினார்.

இந்த வழக்கு, 2012 மற்றும் 2015 ஆம் ஆண்டுகளுக்கு இடையில் 8 கோடி ரூபாய்க்கும் அதிகமான பணத்தை சட்டவிரோதமாக சம்பாதித்து, ரத்மலானை சிறிமல் உயன பிரதேசத்தில் 34.5 பேர்ச் காணியையும், தெஹிவளை பிரதேசத்தில் சொத்துக்களையும் வாங்கியது தொடர்பான குற்றச்சாட்டுகளை அடிப்படையாகக் கொண்டது. முன்னாள் ஜனாதிபதியின் மகன் யோஷித ராஜபக்ஷ மற்றும் டெய்ஸி பொரஸ்ட் ஆகியோருக்கு எதிராக சட்டமா அதிபர் இந்த வழக்கை தாக்கல் செய்துள்ளார். சம்பந்தப்பட்ட சொத்துக்களை வாங்க பயன்படுத்தப்பட்ட பணம் எவ்வாறு சம்பாதிக்கப்பட்டது என்பதை பிரதிவாதிகள் வெளிப்படுத்தத் தவறியதால், அவர்கள் பணச் சலவை தடுப்புச் சட்டத்தின் கீழ் குற்றம் செய்துள்ளதாக குற்றம் சாட்டப்பட்டுள்ளது.

இந்த வழக்கு முன்னர் விசாரணைக்கு வந்தபோது, பிரதிவாதியின் உடல்நிலையை உறுதிப்படுத்த 2017 ஆம் ஆண்டில் கங்கொடவில மாவட்ட நீதிமன்றத்தால் வழங்கப்பட்ட ஒரு உத்தரவை பிரதிவாதி தரப்பு சட்டத்தரணிகள் நீதிமன்றத்தில் சமர்ப்பித்திருந்தனர். இருப்பினும், அந்த மாவட்ட நீதிமன்ற உத்தரவு இந்த குற்றவியல் வழக்கிற்கு நேரடித் தொடர்பைக் கொண்டிருக்காததால், வழக்கை எதிர்கொள்ளும் அவரது திறனை மீண்டும் பரிசோதிப்பது அத்தியாவசியம் என்று மேலதிக சொலிசிட்டர் ஜெனரல் சுட்டிக்காட்டினார்.

இருதரப்பு வாதங்களையும் பரிசீலித்த மேல் நீதிமன்ற நீதிபதி, முறைப்பாட்டின் கோரிக்கைக்கு அனுமதி அளித்து, பிரதிவாதியின் மனநல நிலை குறித்த நிபுணர் அறிக்கையை வழங்குமாறு கொழும்பு பிரதான சட்ட வைத்திய அதிகாரிக்கு உத்தரவிட்டார். அந்த உத்தரவின் நகலை குற்றப் புலனாய்வுத் திணைக்களத்திற்கு வழங்குமாறு நீதிமன்றப் பதிவாளருக்கு அறிவுறுத்திய நீதிபதி, அடுத்த ஆண்டு ஜனவரி மாதம் 22 ஆம் திகதி வழக்கை மீண்டும் விசாரணைக்கு அழைக்கவும் திகதியிட்டார்.