தற்போதைய அனர்த்த நிலைமை காரணமாக நாடு முழுவதும் தடைப்பட்டுள்ள தொலைபேசி மற்றும் இணையத் தொடர்பு வலையமைப்புகள் நாளை (04) திகதியளவில் முழுமையாக வழமைக்குக் கொண்டுவரப்படும் என டிஜிட்டல் பொருளாதார பிரதி அமைச்சர் எரங்க வீரரத்ன தெரிவித்துள்ளார். அனர்த்தத்தால் பாதிக்கப்பட்ட மக்கள் தமது நண்பர்கள் மற்றும் உறவினர்களுடன் தகவல்களைப் பரிமாறிக்கொள்ள தகவல் தொடர்பு வசதிகள் அத்தியாவசியமாகியுள்ள இத்தருணத்தில்,
டிஜிட்டல் பொருளாதார அமைச்சு, தொலைத்தொடர்பு ஒழுங்குபடுத்தல் ஆணைக்குழு மற்றும் அனைத்து தொலைபேசி சேவை நிறுவனங்களும் இணைந்து இந்த நிலைமையை நிர்வகிக்க தீவிர முயற்சிகளை மேற்கொண்டு வருவதாக அவர் சுட்டிக்காட்டினார்.மண்சரிவுகள் மற்றும் வெள்ளப்பெருக்கு காரணமாக 11 இடங்களில் மாகாணங்களுக்கிடையேயான ஃபைபர் வலையமைப்பு துண்டிக்கப்பட்டிருந்த நிலையில், அமைச்சின் நேரடி தலையீட்டின் பேரில் அவற்றில் 09 இடங்கள் 24 மணி நேரத்திற்குள் குறுகிய காலத்தில் சரிசெய்ய நடவடிக்கை எடுக்கப்பட்டுள்ளது.
தற்போது அனைத்து மாகாணங்களையும் உள்ளடக்கும் வகையில் தொலைத்தொடர்பு வலையமைப்பு புதுப்பிக்கப்பட்டுள்ளதுடன், சில இடைப்பட்ட இடங்களைத் தவிர மற்ற அனைத்துப் பகுதிகளிலும் ஃபைபர் தொழில்நுட்பம் மூலம் தகவல் தொடர்பு பணிகள் வெற்றிகரமாக நடைபெறுகின்றன. அனர்த்த நிலைமை காரணமாக ஏற்பட்ட மின் தடங்கல்கள் மற்றும் ஃபைபர் கேபிள்களுக்கு ஏற்பட்ட சேதங்கள் காரணமாக 4000க்கும் மேற்பட்ட பிரதான பரிமாற்றக் கோபுரங்கள் செயலிழந்திருந்த போதிலும், அவற்றில் சுமார் 2800 கோபுரங்களை மீண்டும் செயற்படுத்த சம்பந்தப்பட்ட துறைகள் இதுவரை வெற்றி பெற்றுள்ளன.
மீதமுள்ள கோபுரங்களில் சுமார் 949 மின்சாரம் துண்டிக்கப்பட்டதால் செயலிழந்துள்ளதாகவும், அந்த இடங்களுக்குச் சென்று விரைவாக மின் வசதிகளை வழங்கி அவற்றைச் செயற்படுத்த முப்படையினரின் முழு ஆதரவுடன் தொலைத்தொடர்பு நிறுவனங்கள் செயற்பட்டு வருவதாகவும் பிரதி அமைச்சர் நேற்று (02) ஊடகங்களுக்கு கருத்துத் தெரிவித்தார். தற்போது நுவரெலியா, பதுளை, புத்தளம் மற்றும் வவுனியா மாவட்டங்களில் தகவல் தொடர்புப் பிரச்சினைகள் நிலவுகின்றன, குறிப்பாக கண்டி மற்றும் நுவரெலியா பகுதிகளில் குறிப்பிடத்தக்க தடங்கல்கள் கண்டறியப்பட்டுள்ளன.
எவ்வாறாயினும், நாளை காலைக்குள் நுவரெலியா மற்றும் புத்தளம் மாவட்டங்களில் 75% க்கும் அதிகமான தொடர்புகளை வழமைக்குக் கொண்டுவரவும், கண்டி மாவட்டத்தில் தற்போதுள்ள 65% கவரேஜை நாளைக்குள் 70% ஆக அதிகரிக்கவும் திட்டமிடப்பட்டுள்ளது.
கடந்த நவம்பர் 28 ஆம் திகதி அனர்த்த நிலைமை ஆரம்பித்தவுடன், குரல் அழைப்புகளை மேற்கொள்ள முடியாவிட்டால் குறுஞ்செய்தி (SMS) வசதியைத் தொடர தொழில்நுட்பத் தயார்நிலை இருந்தது, ஆனால் 29 ஆம் திகதியளவில் ஃபைபர் இணைப்புகள் பெரும்பாலும் வழமைக்குக் கொண்டுவரப்பட்டதால், அந்த மாற்று முறைமையின் தேவை எழவில்லை. தற்போது மொத்த தகவல் தொடர்பு வலையமைப்பில் 80% க்கும் அதிகமானவை வழமைக்குக் கொண்டுவரப்பட்டுள்ளன, மேலும் அடுத்த நாள் அது 100% ஆக நிறைவு செய்ய முடியும் என பிரதி அமைச்சர் எரங்க வீரரத்ன மேலும் நம்பிக்கை தெரிவித்தார்.
Tags:
News