இலங்கை வரலாற்றில் மிக மோசமான இயற்கை அனர்த்தமாக கருதப்படும் சுனாமி அனர்த்தத்திற்கு இன்று (26) 21 வருடங்கள் பூர்த்தியாகின்றன. இந்த துயர சம்பவத்தில் துரதிர்ஷ்டவசமாக உயிரிழந்த முப்பத்தையாயிரத்திற்கும் அதிகமான மக்களை நினைவுகூரும் வகையில், இன்று காலை 9.25 மணி முதல் 9.27 மணி வரை நாடு முழுவதும் இரண்டு நிமிட மௌனம் அனுஷ்டிக்க ஏற்பாடுகள் செய்யப்பட்டுள்ளன.
உயிரிழந்த மற்றும் காணாமல் போனவர்களை நினைவுகூரும் வகையில் பெயரிடப்பட்டுள்ள “தேசிய பாதுகாப்பு தினத்திற்கு” இணையாக, பிரதான நினைவேந்தல் நிகழ்வு காலி, பேராலிய சுனாமி நினைவுச் சின்னத்திற்கு அருகில் நடைபெறுகிறது. நாட்டின் தற்போதைய சமூக மற்றும் பொருளாதார நிலைமை அத்துடன் தித்வா சூறாவளியின் தாக்கத்தையும் கருத்தில் கொண்டு மாவட்ட மட்டத்தில் சர்வ மத நிகழ்ச்சிகளை நடத்தவும் திட்டமிடப்பட்டுள்ளது.
இந்த பயங்கர அனர்த்தம் காரணமாக ஐந்தாயிரத்திற்கும் அதிகமானோர் காணாமல் போனதுடன், நாட்டிற்கு பில்லியன் கணக்கான சொத்து சேதங்களும் ஏற்பட்டன. குறிப்பாக, சுனாமி அலையில் சிக்கி அழிந்த 3050 ஆம் இலக்க ரயில் எஞ்சினுடன் கூடிய ரயிலை நினைவுகூரும் வகையில், ரயில்வே பொது முகாமையாளர் உள்ளிட்ட உயர்மட்ட அதிகாரிகள் குழுவொன்று இன்று காலை 9.00 மணிக்கு பேராலிய ரயில் நிலையத்திற்கு வரவுள்ளது. அங்கு அவர்கள் நினைவுச் சின்னத்திற்கு மலரஞ்சலி செலுத்தி, துரதிர்ஷ்டவசமாக உயிரிழந்தவர்களுக்கு அஞ்சலி செலுத்துவார்கள்.
அனர்த்தத்தின் இருபத்தொரு வருட பூர்த்தியை முன்னிட்டு, பேராலிய சுனாமி ஹொங்கொன்ஜி நிலையத்தில் விசேட புண்ணியச் சடங்குகள் ஏற்பாடு செய்யப்பட்டுள்ளன. ஜப்பானின் பிரதான சங்கநாயக்கரும், இலங்கை மகாபோதி சங்கத்தின் தலைவருமான வண. பாணகல உபதிஸ்ஸ நாயக்க தேரரின் அனுசரணையின் கீழும், பேராலிய மலவன்ன ஸ்ரீ புஷ்பாராமதிபதி வண. மாவடவில சாந்த தேரரின் தலைமையில் இந்த மத அனுஷ்டானங்கள் இடம்பெறுகின்றன. மலவன்ன விகாரையின் புஷ்பாராம சங்கமித்தா குலங்கன சமிதிய, பஞ்ஞாவன்ச தஹம் பாடசாலை மற்றும் அனாகாரிக தர்மபால சுசரித பவுண்டேஷன் இணைந்து ஏற்பாடு செய்யும் இந்த புண்ணியச் சடங்குகள் இன்று காலை 7.00 மணிக்கு மகா சங்கரத்னத்திற்கு வழங்கப்படும் ஹில் தானத்துடன் ஆரம்பமாகவுள்ளன.
அத்துடன், 21 வருடங்களுக்கு முன்னர், அதாவது 2004 டிசம்பர் 26 ஆம் திகதி, சுனாமி அலை பேராலிய பிரதேசத்தை அடைந்த காலை 9.15 மணிக்கு, உயிரிழந்தவர்களை நினைவுகூரும் வகையில் தீபங்கள் ஏற்றப்படும். பின்னர், மாலை 4.00 மணிக்கு மலவன்ன புஷ்பாராமத்திலிருந்து பேராலிய ஹொங்கொன்ஜி நிலையம் வரை கிலன்பச மற்றும் மலர் ஊர்வலம் வீதி உலா வரும். அதனைத் தொடர்ந்து, மாலை 5.00 மணிக்கு வண. மொரவத்தே சுபோதி தேரரால் தர்ம தேசனை நடத்தப்படும், இந்த புண்ணியச் சடங்குகள் மாலை 6.00 மணிக்கு வண. மாவடவில சாந்த தேரரால் நடத்தப்படும் கிலன்பச பூஜையுடன் நிறைவடையவுள்ளன.