தெஹிவளை தேசிய மிருகக்காட்சிசாலையில் பல ஆண்டுகளாக கூண்டில் வாழ்ந்த வெள்ளை கைகளுடைய கிப்பன் இனத்தைச் சேர்ந்த குரங்கு ஒன்று கடந்த 18ஆம் திகதி உயிரிழந்துள்ளது. உயிரிழக்கும் போது சுமார் 22 வயதுடைய இந்த விலங்கின் மரணத்தை மிருகக்காட்சிசாலையின் பணிப்பாளர் நாயகம், கால்நடை மருத்துவர் சந்தன ராஜபக்ஷ உறுதிப்படுத்தினார். இந்த கிப்பன் குரங்கு 2006ஆம் ஆண்டு சர்வதேச விலங்கு பரிமாற்ற திட்டத்தின் கீழ் செக் குடியரசின் ஒஸ்ட்ராவா மிருகக்காட்சிசாலையிலிருந்து இலங்கைக்கு கொண்டு வரப்பட்ட கிப்பன் ஜோடிகளில் ஒன்றாகும். பல ஆண்டுகளாக அவை இரண்டும் ஒன்றாக வாழ்ந்தன, சுமார் ஒன்றரை வருடங்களுக்கு முன்பு அதன் துணை இறந்த பிறகு, இந்த கிப்பன் குரங்கு தனது கூண்டில் தனிமையில் வாழ்ந்து வந்தது. விலங்கியல் தரவுகளின்படி, இந்த வகை கிப்பன் குரங்கின் இயற்கையான அதிகபட்ச ஆயுட்காலம் சுமார் 25 ஆண்டுகள் ஆகும். அதன்படி, 22 வயதுடைய இந்த விலங்கு அதன் அதிகபட்ச ஆயுட்காலத்தை நெருங்கி, முதுமையில் உயிரிழந்துள்ளது என்பதை அவதானிக்கலாம். கடந்த 17ஆம் திகதி இந்த கிப்பன் குரங்கு நோய்வாய்ப்பட்டிருப்பது அவதானிக்கப்பட்டவுடன், மிருகக்காட்சிசாலையின் கால்நடை மருத்துவக் குழு உடனடியாக தேவையான சிகிச்சைகளை வழங்க நடவடிக்கை எடுத்தது. இருப்பினும், மருத்துவர்களின் முயற்சி பலனளிக்காமல் மறுநாள் விலங்கு உயிரிழந்தது. மரணத்திற்கான காரணத்தை துல்லியமாக கண்டறிய பிரேத பரிசோதனை நடத்தப்பட்டுள்ளது, ஆனால் அதன் அறிக்கைகள் இன்னும் கிடைக்கவில்லை என்று மிருகக்காட்சிசாலை அதிகாரிகள் தெரிவித்தனர்.