அனர்த்த முகாமைத்துவ மத்திய நிலையத்தினால் வெளியிடப்பட்ட சமீபத்திய நிலைமை அறிக்கையின்படி, 2025 டிசம்பர் மாதம் 02 ஆம் திகதி காலை 10.00 மணி நிலவரப்படி, தீவு முழுவதும் நிலவும் மோசமான வானிலை காரணமாக 407,594 குடும்பங்களைச் சேர்ந்த 1,466,615 பேர் பாதிக்கப்பட்டுள்ளனர். இந்த பேரழிவு நிலைமை காரணமாக, தீவு முழுவதும் ஏற்பட்ட மொத்த மரணங்களின் எண்ணிக்கை 410 ஆக உயர்ந்துள்ளதுடன், 336 பேர் காணாமல்போயுள்ளதாக உத்தியோகபூர்வமாக உறுதிப்படுத்தப்பட்டுள்ளது.
அறிக்கையின்படி, அதிக உயிரிழப்புகள் கண்டி மாவட்டத்திலேயே பதிவாகியுள்ளன, அங்கு 88 மரணங்களும் 150 காணாமல்போன சம்பவங்களும் இடம்பெற்றுள்ளன. பதுளை மாவட்டத்தில் 83 மரணங்களும் 28 காணாமல்போன சம்பவங்களும் பதிவாகியுள்ளன, நுவரெலியா மாவட்டத்தில் 75 மரணங்களும் 62 காணாமல்போன சம்பவங்களும் இடம்பெற்றுள்ளன. அத்துடன், குருநாகல் மாவட்டத்தில் 52 மரணங்களும், புத்தளம் மாவட்டத்தில் 27 மரணங்களும், மாத்தளை மற்றும் கேகாலை மாவட்டங்களில் முறையே 24 மற்றும் 22 மரணங்களும் பதிவாகியுள்ளதாக அனர்த்த முகாமைத்துவ மத்திய நிலையம் தெரிவித்துள்ளது.
அதிக எண்ணிக்கையிலான மக்கள் புத்தளம் மாவட்டத்திலேயே பாதிக்கப்பட்டுள்ளனர், அந்த எண்ணிக்கை 271,206 ஆகும். கொழும்பு மாவட்டத்தில் 269,403 பேரும், கம்பஹா மாவட்டத்தில் 205,189 பேரும் பாதிக்கப்பட்டுள்ளனர்,
மன்னார் மாவட்டத்திலும் 127,269 பேர் பாதிக்கப்பட்டுள்ளதாக தெரிவிக்கப்பட்டுள்ளது. இரத்தினபுரி, குருநாகல் மற்றும் யாழ்ப்பாணம் போன்ற மாவட்டங்களிலும் கணிசமான மக்கள் இந்த மோசமான வானிலை நிலைமைகளால் பாதிக்கப்பட்டுள்ளனர்.
இடம்பெயர்ந்த மக்களுக்காக தீவு முழுவதும் 1,441 பாதுகாப்பு மையங்கள் அமைக்கப்பட்டுள்ளன, தற்போது 64,483 குடும்பங்களைச் சேர்ந்த 233,015 பேர் அந்த மையங்களில் தங்க வைக்கப்பட்டுள்ளனர். புத்தளம் மாவட்டத்தில் மட்டும் 40,821 பேர் பாதுகாப்பு இடங்களில் உள்ளனர், அத்துடன் கம்பஹா மற்றும் கொழும்பு மாவட்டங்களிலும் இருபதாயிரத்திற்கும் அதிகமானோர் பாதுகாப்பு மையங்களுக்கு அனுப்பப்பட்டுள்ளனர்.
வீடுகள் மற்றும் சொத்துக்களுக்கு ஏற்பட்ட சேதங்களைப் பொறுத்தவரை, தீவு முழுவதும் 565 முழுமையான வீட்டுச் சேதங்களும் 20,271 பகுதியளவு வீட்டுச் சேதங்களும் பதிவாகியுள்ளன. பதுளை மாவட்டத்தில் அதிகபட்சமாக 269 முழுமையான வீட்டுச் சேதங்கள் பதிவாகியுள்ளன, அத்துடன் குருநாகல் மற்றும் கம்பஹா மாவட்டங்களிலும் கணிசமான வீட்டுச் சேதங்கள் ஏற்பட்டுள்ளன. இந்த நிலைமை அறிக்கை அனர்த்த முகாமைத்துவ மத்திய நிலையத்தின் பணிப்பாளர் நாயகம் சார்பாக தேசிய ஒருங்கிணைப்பு அதிகாரி லெப்டினன்ட் கமாண்டர் என்.கே.என்.ஐ விஜேசிங்க அவர்களால் வெளியிடப்பட்டுள்ளது.
Tags:
Trending