பூஸ்ஸ அதி உயர் பாதுகாப்பு சிறைச்சாலையில் தடுத்து வைக்கப்பட்டுள்ள விசேட வகை குற்றவாளிகள் குழுவொன்று, சிறை கண்காணிப்பாளரைத் தாக்குவதற்கு முன்னர், சிறைச்சாலையில் பொருத்தப்பட்டிருந்த 63 பாதுகாப்பு கமெராக்களை (CCTV) முழுமையாக அழித்துள்ளதாக பொலிஸ் விசாரணைகளில் தெரியவந்துள்ளது. சந்தேகநபர்கள் துடைப்பங்கள், விளக்குமாறுகள் மற்றும் கற்களைப் பயன்படுத்தி
கமெரா அமைப்பைத் தாக்கி இந்த சேதங்களை ஏற்படுத்தியுள்ளதாக ரத்கம பொலிஸார் தெரிவிக்கின்றனர்.பொலிஸார் குறிப்பிடுவதன்படி, இந்த மோதலுக்கு உடனடி காரணம், சிறைச்சாலையில் தடுத்து வைக்கப்பட்டுள்ள 'பியூம் ஹஸ்திக' என்ற ஒழுங்கமைக்கப்பட்ட குற்றவாளியின் திருமணம் ஆகும். சிறைச்சாலைக்குள் உரிய அனுமதியுடன் அவரது திருமணம் பதிவு செய்யப்பட்டிருந்தாலும், அதற்காக அதிகாரிகளுக்கும் மற்ற கைதிகளுக்கும் விருந்து நடத்த விடுத்த கோரிக்கையை சிறை கண்காணிப்பாளர் நிராகரித்ததால், கைதிகள் கோபமடைந்து இவ்வாறு வன்முறையாக நடந்துகொண்டுள்ளனர்.
கடந்த 07ஆம் திகதி மதிய உணவு விநியோகிக்கப்பட்டபோது, சிறை அறைகளில் இருந்து வெளியே வந்திருந்த கைதிகளைப் பரிசோதிப்பதற்காக சிறை கண்காணிப்பாளர் சம்பவ இடத்திற்குச் சென்றபோது இந்தத் தாக்குதல் இடம்பெற்றுள்ளது.
அப்போது, இரண்டு கைதிகள் நடத்திய தாக்குதலில் சிறை கண்காணிப்பாளரின் முகத்திலும் மூக்கிலும் காயங்கள் ஏற்பட்டுள்ளன. திருமண விருந்து தொடர்பான பிரச்சினைக்கு மேலதிகமாக, விசேட பிரிவில் உள்ள கைதிகளை பாதுகாப்பு கமெராக்கள் செயலில் உள்ள வேறு அறைகளுக்கு மாற்ற எடுத்த முயற்சியும் இந்தத் தாக்குதலுக்குக் காரணமாக அமைந்துள்ளதாக விசாரணைகளில் தெரியவந்துள்ளதுடன், ரத்கம பொலிஸார் சம்பவம் தொடர்பில் மேலதிக விசாரணைகளை மேற்கொண்டு வருகின்றனர்.
Tags:
News