“திட்வா” சூறாவளியின் தாக்கத்தால் நாடு முழுவதும் ஏற்பட்ட வெள்ளம் மற்றும் மண்சரிவுகள் போன்ற இயற்கை அனர்த்தங்களால் உயிரிழந்தவர்களின் சடலங்கள் தொடர்பான திடீர் மரணப் பரிசோதனைகளுக்காக அரசாங்கத்தால் வழங்கப்படும் எந்தவொரு கொடுப்பனவையும் பெற்றுக்கொள்ள வேண்டாம் என அகில இலங்கை திடீர் மரணப் பரிசோதகர்கள் சங்கம் தீர்மானித்துள்ளது.
அவசர அனர்த்த நிலைமையின் காரணமாக அரசாங்கத்திற்கு ஏற்பட்டுள்ள பாரிய செலவுகள் மற்றும் அழுத்தங்களைக் கருத்தில் கொண்டும், மக்களின் இயல்பு வாழ்க்கையை மீண்டும் கட்டியெழுப்பும் வேலைத்திட்டத்திற்கு ஆதரவாகவும் இந்த மனிதாபிமான முடிவு எடுக்கப்பட்டதாக சங்கத்தின் தலைவர் அனுர ஹேரத் தெரிவித்தார்.கடந்த நாட்களில் பெய்த கடும் மழையுடன் கண்டி, மாத்தளை, நுவரெலியா, குருநாகல் மற்றும் பதுளை உள்ளிட்ட பல மாவட்டங்களில் அதிக எண்ணிக்கையிலான மரணங்கள் பதிவாகியுள்ளன. இந்த மரணங்களை உறவினர்களிடம் விரைவாக ஒப்படைப்பதற்காக மரணப் பரிசோதகர்கள் பெரும் அர்ப்பணிப்புடன் செயற்பட்டுள்ளனர். குறிப்பாக, ஹங்குரன்கெத்த, உடுதும்பர மற்றும் நாவலப்பிட்டிய போன்ற பகுதிகளில் மண்சரிவுகளால் வீதிகள் தடைபட்டு போக்குவரத்து ஸ்தம்பிதமடைந்திருந்த போதிலும், மரணப் பரிசோதகர்கள் 20 முதல் 25 கிலோமீட்டர் தூரம் வரை நடந்தே சென்று தமது கடமைகளை நிறைவேற்றியதாக தலைவர் நினைவுபடுத்தினார்.
வழமையாக ஒரு திடீர் மரணப் பரிசோதனைக்காக அரசாங்கத்தால் ஒரு குறிப்பிட்ட கொடுப்பனவு செலுத்தப்படும் என்றாலும்,
நாடு எதிர்கொண்டுள்ள இக்கட்டான சூழ்நிலையில், பெரும்பாலான உறுப்பினர்களின் விருப்பத்தின் பேரில் இந்த அனர்த்த மரணங்களுக்கான பணத்தைப் பெற்றுக்கொள்ள வேண்டாம் என தீர்மானிக்கப்பட்டுள்ளது. தமது உயிரைப் பணயம் வைத்து பாதிக்கப்பட்ட மக்களுக்கு சேவை செய்த மரணப் பரிசோதகர்களின் இந்தச் செயல் பாராட்டப்பட வேண்டிய ஒரு முன்மாதிரி என்றும் அனுர ஹேரத் மேலும் தெரிவித்தார்.
Tags:
News