தேசிய மக்கள் சக்தியின் இரத்தினபுரி மாவட்ட பாராளுமன்ற உறுப்பினர் சாந்த பத்மகுமாரவுடன் ஏற்பட்ட தாக்குதல் சம்பவம் தொடர்பில் குற்றம் சாட்டப்பட்ட சூரியகந்த பொலிஸ் நிலையத்தில் கடமையாற்றிய பொலிஸ் கான்ஸ்டபிளின் சேவை இடைநிறுத்தப்பட்டுள்ளது. இந்த சம்பவம் தொடர்பான மேலதிக விசாரணைகள் முடிவடையும் வரை இந்த இடைநிறுத்தம் அமுலில் இருக்கும்.
பொலிஸ் வட்டாரங்கள் தெரிவிக்கின்றன.சம்பந்தப்பட்ட சம்பவம் தொடர்பில் மூன்று குற்றச்சாட்டுகளின் கீழ் கைது செய்யப்பட்ட கான்ஸ்டபிள் நீதிமன்றத்தில் ஆஜர்படுத்தப்பட்ட பின்னர் பிணையில் விடுவிக்கப்பட்டுள்ளார்.
சம்பவம் தொடர்பான பொலிஸ் விசாரணைகளின்படி, கடந்த 20ஆம் திகதி இரவு 08.40 மணியளவில் கடமையை முடித்துவிட்டு வீடு திரும்பிக்கொண்டிருந்த தன்னை, களுங்கல விகாரைக்கு அருகில் அமைச்சர் உட்பட குழுவினர் தாக்கி மோட்டார் சைக்கிளை கடத்திச் சென்றதாக சம்பந்தப்பட்ட கான்ஸ்டபிள் 119 மத்திய நிலையம் ஊடாக கொலன்ன பொலிஸில் முறைப்பாடு செய்திருந்தார். ஆனால், அதே நாள் இரவு 10.10 மணியளவில் முறைப்பாடு செய்த பாராளுமன்ற உறுப்பினர் சாந்த பத்மகுமார, தான் கார் ஒன்றில் பயணித்துக் கொண்டிருந்தபோது, சம்பந்தப்பட்ட கான்ஸ்டபிள் மோட்டார் சைக்கிளை குறுக்கே நிறுத்தி வீதியை மறித்து தன்னை தாக்க முயன்றதாகக் குறிப்பிட்டுள்ளார்.
இந்த சம்பவம் குறித்து கருத்து தெரிவித்த சப்ரகமுவ மாகாணத்திற்கு பொறுப்பான சிரேஷ்ட பிரதி பொலிஸ் மா அதிபர் மஹிந்த குணரத்ன, அமைச்சர் தாக்கியதாக கான்ஸ்டபிள் கூறிய போதிலும், சட்ட மருத்துவ அறிக்கையின்படி உடலில் எந்த ஒரு தாக்குதலுக்கான அடையாளமும் இல்லை என்று தெரிவித்தார். மேலும், மோட்டார் சைக்கிள் கடத்தப்பட்டதாக கான்ஸ்டபிள் முறைப்பாடு செய்த போதிலும், பொலிஸ் குழுக்கள் சம்பவ இடத்திற்கு சென்றபோது மோட்டார் சைக்கிள் அங்கேயே காணப்பட்டதால், கான்ஸ்டபிள் ஒரு பொய்யான முறைப்பாட்டை செய்தாரா என்பது குறித்து சந்தேகம் எழுவதாக சிரேஷ்ட பிரதி பொலிஸ் மா அதிபர் சுட்டிக்காட்டியுள்ளார்.
எவ்வாறாயினும், சம்பவத்திற்குப் பிறகு வைத்தியசாலையில் அனுமதிக்கப்பட்ட கான்ஸ்டபிளின் சுவாசத்தில் மதுவின் வாசனை இருந்ததாக மருத்துவ அறிக்கைகள் தெரிவிக்கின்றன, மேலும் அவரது இரத்த மாதிரிகள் மேலதிக பரிசோதனைக்காக அரச இரசாயன பகுப்பாய்வாளரிடம் சமர்ப்பிக்க பொலிஸார் நடவடிக்கை எடுத்துள்ளனர். சம்பவம் தொடர்பில் அத்துமீறி வழிமறித்தல், குற்றவியல் ரீதியான அச்சுறுத்தல் மற்றும் குற்றவியல் ரீதியான பயமுறுத்தல் ஆகிய குற்றச்சாட்டுகளின் கீழ் கான்ஸ்டபிள் கைது செய்யப்பட்டு எம்பிலிபிட்டிய நீதவான் நீதிமன்றத்தில் ஆஜர்படுத்தப்பட்டார், அங்கு நீதவான் திலின யூ. பீரிஸ் சந்தேகநபரை இரண்டு இலட்சம் ரூபாய் சரீரப் பிணையில் விடுவிக்க உத்தரவிட்டார்.