ஐக்கிய அரபு அமீரகத்தின் (UAE) ஜனாதிபதி ஷேக் முகமது பின் சயீத் அல் நஹ்யான், 105 நிமிட மிகக் குறுகிய உத்தியோகபூர்வ விஜயமாக இந்தியாவுக்கு வருகை தந்தார். இந்த விஜயம் இரு நாடுகளுக்கும் இடையிலான இராஜதந்திர உறவுகளில் ஒரு புதிய பரிமாணத்தை ஏற்படுத்தியது. புதுடெல்லியின் பாலம் விமான நிலையத்திற்கு வருகை தந்த அமீரக ஜனாதிபதியை வரவேற்பதற்காக, இந்தியப் பிரதமர் நரேந்திர மோடி, வழக்கமான இராஜதந்திர நெறிமுறைகளை (Protocol) கூட ஒதுக்கி வைத்துவிட்டு, விமான நிலையத்திற்கே வந்து வரவேற்றது ஒரு சிறப்பான நிகழ்வாகும்.
பிரதமர் மோடி தனது "X" கணக்கில் ஒரு பதிவை இட்டு, தனது சகோதரரை வரவேற்பதற்காக தான் தனிப்பட்ட முறையில் விமான நிலையத்திற்கு வந்ததாகக் குறிப்பிட்டார்.இந்தக் குறுகிய காலப்பகுதியில், இரு தலைவர்களுக்கும் இடையே மிக முக்கியமான பேச்சுவார்த்தைகள் நடைபெற்றன. பாதுகாப்பு மற்றும் வர்த்தகத் துறைகள் உட்பட 9 முக்கிய ஒப்பந்தங்கள் கையெழுத்திடப்பட்டன. இந்திய வெளியுறவுச் செயலாளர் விக்ரம் மிஸ்ரி குறிப்பிடுகையில், இந்த விஜயம் கால அளவில் குறுகியதாக இருந்தாலும், உள்ளடக்கம் ரீதியாக மிகவும் சக்திவாய்ந்ததாகவும் பயனுள்ளதாகவும் இருந்தது என்றார். அபுதாபி மற்றும் துபாய் அரச குடும்ப உறுப்பினர்கள், அத்துடன் பல மூத்த அமைச்சர்கள் மற்றும் அதிகாரிகள் இந்த தூதுக்குழுவில் இடம்பெற்றிருந்தமை, இந்தியாவுடனான உறவுகளுக்கு ஐக்கிய அரபு அமீரகம் அளிக்கும் முக்கியத்துவத்தை தெளிவாக எடுத்துக்காட்டுகிறது. 2022 இல் ஜனாதிபதியாகப் பதவியேற்ற பிறகு ஷேக் முகமது பின் சயீத் இந்தியாவுக்கு மேற்கொண்ட மூன்றாவது விஜயம் இதுவாகும்.
புதுடெல்லியில் உள்ள பிரதமர் இல்லத்தில் நடைபெற்ற சந்திப்பின் போது, நரேந்திர மோடி அவர்கள், அமீரக ஜனாதிபதிக்கும் அவரது குடும்பத்தினருக்கும் இந்திய கலாச்சாரத்தை பிரதிபலிக்கும் பல மதிப்புமிக்க பரிசுகளை வழங்கினார். குஜராத்தில் தயாரிக்கப்பட்ட மிக நுணுக்கமான வேலைப்பாடுகளுடன் கூடிய மர ஊஞ்சல் ஒன்றும், தெலுங்கானாவில் தயாரிக்கப்பட்ட வெள்ளிப் பெட்டியில் வைக்கப்பட்ட காஷ்மீர் பஷ்மினா சால்வை ஒன்றும் ஜனாதிபதிக்கு பரிசளிக்கப்பட்டன. மேலும், ஜனாதிபதியின் தாயார் ஷேக்கா பாத்திமா பின்ட் முபாரக் அவர்களுக்காக ஒரு சிறப்பு பஷ்மினா சால்வையும், உயர்தர காஷ்மீர் குங்குமப்பூவும் பரிசுகளாக வழங்கப்பட்டன.
இரு நாடுகளுக்கும் இடையிலான பொருளாதார உறவுகளும் இந்த சந்திப்பின் போது மேலும் வலுப்பெற்றன. தற்போது, ஐக்கிய அரபு அமீரகம் இந்தியாவின் மூன்றாவது பெரிய வர்த்தகப் பங்காளியாக மாறியுள்ளது. இரு நாடுகளுக்கும் இடையிலான வருடாந்திர வர்த்தக மதிப்பு இந்திய ரூபாய் 6 லட்சம் கோடிக்கு மேல் எனத் தெரிவிக்கப்பட்டுள்ளது. எரிசக்தி விநியோகம், உள்ளூர் நாணயங்களைப் பயன்படுத்தி பரிவர்த்தனை செய்யும் வழிமுறைகள் மற்றும் இருதரப்பு முதலீட்டு ஒப்பந்தங்கள் மூலம் இந்த பொருளாதார பிணைப்பு மேலும் விரிவடைந்துள்ளது. கச்சா எண்ணெய், ரத்தினங்கள், நகைகள், உணவுப் பொருட்கள் மற்றும் பொறியியல் பொருட்கள் உள்ளிட்ட பல துறைகளில் இந்த வர்த்தக உறவுகள் பரவியுள்ளன.
