சமூக ஊடகங்களில் வேகமாகப் பகிரப்பட்ட ஒரு காணொளியின் காரணமாக, இந்தியாவின் கேரள மாநிலத்தில் 42 வயதுடைய ஒருவர் தற்கொலை செய்துகொண்ட சோகமான செய்தி வெளியாகியுள்ளது. ஒரு பெண் பேருந்தில் தனக்கு அத்துமீறி நடந்துகொண்டதாகக் குற்றம்சாட்டிப் பதிவுசெய்யப்பட்ட காணொளி இணையத்தில் வெளியானதைத் தொடர்ந்து இந்த துரதிர்ஷ்டவசமான சம்பவம் நிகழ்ந்துள்ளது என்று ஆரம்பகட்ட விசாரணைகளில் தெரியவந்துள்ளது.
காவல்துறை அறிக்கைகளின்படி, இறந்தவர் கோவிந்தபுரம் பிரதேசத்தைச் சேர்ந்த தீபக் என அடையாளம் காணப்பட்டுள்ளார். ஞாயிற்றுக்கிழமை காலை அவரது வீட்டில் உள்ள ஒரு அறையில் இந்த மரணம் நிகழ்ந்துள்ளது.ஞாயிற்றுக்கிழமை காலை 7 மணியளவில் தீபக்கின் பெற்றோர் அவரை எழுப்ப முயன்றனர், ஆனால் அறையிலிருந்து எந்தப் பதிலும் இல்லை. தொடர்ந்து கதவைத் தட்டியும் பதில் இல்லாததால், அண்டை வீட்டார்களின் உதவியுடன் கதவை உடைத்து அறைக்குள் நுழைந்தனர். அங்கு தீபக் தூக்கிட்டு தற்கொலை செய்துகொண்ட நிலையில் காணப்பட்டார். இந்த காட்சி குடும்ப உறவினர்களையும் அண்டை வீட்டாரையும் பெரும் அதிர்ச்சிக்குள்ளாக்கியது. பின்னர், சம்பவம் குறித்து காவல்துறைக்கு தகவல் தெரிவிக்கப்பட்டதுடன், சடலம் பிரேத பரிசோதனைக்காக அனுப்பப்பட்டுள்ளது.
இந்த துயர சம்பவத்திற்கு மிக அண்மையான காரணம் சமூக ஊடகங்களில் வைரலான ஒரு காணொளி என்று தகவல்கள் வெளியாகியுள்ளன. நெரிசலான பேருந்தில் பயணிக்கும்போது சம்பந்தப்பட்ட நபர் தனக்கு (ஜாக் அடித்ததாகக் கூறப்படும்) அத்துமீறிய தொல்லை கொடுத்ததாக ஒரு பெண் அந்தக் காணொளியில் குற்றம்சாட்டியிருந்தார். பையனூர் ரயில் நிலையத்தில் இருந்து பேருந்து நிலையம் வரை பயணிக்கும்போது இந்த காட்சிகள் பதிவு செய்யப்பட்டுள்ளதாகவும், இணையத்தில் வெளியிடப்பட்ட பிறகு 20 லட்சத்திற்கும் (2 மில்லியனுக்கும்) அதிகமான முறை பார்க்கப்பட்டதாகவும் தெரிவிக்கப்பட்டுள்ளது. காணொளி வெளியானதைத் தொடர்ந்து சமூக ஊடகப் பயனர்களிடமிருந்து இறந்தவருக்கு எதிராக கடுமையான விமர்சனங்களும் அவதூறுகளும் எழுந்தன.
சம்பந்தப்பட்ட காணொளி வைரலானதைத் தொடர்ந்து தீபக் கடுமையான மன அழுத்தத்தில் இருந்ததாக அவரது பெற்றோரும் உறவினர்களும் தெரிவிக்கின்றனர். இணையத்தில் ஏற்பட்ட அவதூறுகள், கேலி கிண்டல்கள் மற்றும் சமூக எதிர்ப்பு ஆகியவற்றைத் தாங்க முடியாமல் அவர் பெரும் அதிர்ச்சியில் இருந்ததாக குடும்பத்தினர் கூறுகின்றனர். அவர் தனது வாழ்நாள் முழுவதும் எந்தவிதமான சண்டைகளிலும் ஈடுபடாதவர் என்றும் அவர்கள் வலியுறுத்துகின்றனர். இணையத்தில் பிரபலமடையும் நோக்கில் தங்கள் மகனின் நற்பெயருக்கு களங்கம் ஏற்படுத்தப்பட்டுள்ளதாக இறந்தவரின் பெற்றோர் குற்றம்சாட்டுகின்றனர். சட்டரீதியான விசாரணை இல்லாமல் சமூக ஊடகங்கள் மூலம் வழங்கப்பட்ட தீர்ப்பே இந்த மரணத்திற்கு காரணம் என்ற கருத்து நிலவுகிறது. காவல்துறை இது குறித்து மேலதிக விசாரணைகளை மேற்கொண்டு வருகிறது.