கொழும்பில் உள்ள ஆர். பிரேமதாச மைதானத்தில் இன்று நடைபெற்ற தீர்மானமிக்க மூன்றாவது ஒருநாள் சர்வதேச கிரிக்கெட் போட்டியில் இலங்கையை 53 ஓட்டங்களால் தோற்கடித்து இங்கிலாந்து அணி வெற்றி பெற்றதுடன், 3 போட்டிகள் கொண்ட ஒருநாள் தொடரை 2-1 என்ற கணக்கில் கைப்பற்றியது.
நாணய சுழற்சியில் வென்று முதலில் துடுப்பெடுத்தாடிய இங்கிலாந்து அணி, நிர்ணயிக்கப்பட்ட 50 ஓவர்கள் முடிவில் 3 விக்கெட்டுகளை இழந்து 357 ஓட்டங்கள் என்ற பிரமாண்டமான ஓட்ட எண்ணிக்கையை பதிவு செய்தது. இதில் ஜோ ரூட் மற்றும் ஹாரி ப்ரூக் ஆகியோர் பெறுமதிமிக்க சதங்களை அடித்து இன்னிங்ஸை பலப்படுத்தினர். ஆட்டமிழக்காமல் 111 ஓட்டங்கள் எடுத்த ஜோ ரூட் மற்றும் 66 பந்துகளில் 11 பவுண்டரிகள் மற்றும் 9 சிக்ஸர்களுடன் 136 ஓட்டங்கள் குவித்த ஹாரி ப்ரூக் ஆகியோர் நான்காவது விக்கெட்டுக்காக 113 பந்துகளில் 191 ஓட்டங்கள் சேர்த்தனர். இவர்களைத் தவிர, ஜேக்கப் பெத்தேல் 65 ஓட்டங்கள் எடுத்து இன்னிங்ஸுக்கு பலம் சேர்த்தார்.
358 ஓட்டங்கள் என்ற கடினமான வெற்றி இலக்கை துரத்திய இலங்கை அணி, 46.4 ஓவர்கள் முடிவில் அனைத்து விக்கெட்டுகளையும் இழந்து 304 ஓட்டங்களை மட்டுமே எடுக்க முடிந்தது. இலங்கை இன்னிங்ஸுக்காக பவன் ரத்நாயக்க 121 ஓட்டங்கள் குவித்து சிறந்த இன்னிங்ஸை விளையாடினார். ஆரம்ப துடுப்பாட்ட வீரர் பத்தும் நிஸ்ஸங்க அரை சதம் அடித்து பங்களிப்பு செய்த போதிலும், ஏனைய துடுப்பாட்ட வீரர்கள் சோபிக்கத் தவறியதால் வெற்றி பெற அவர்களுக்கு வாய்ப்பு கிடைக்கவில்லை.
இங்கிலாந்துக்காக சிறப்பாக பந்துவீசிய இடது கை சுழற்பந்து வீச்சாளர் லியாம் டாவ்சன் 48 ஓட்டங்களுக்கு 2 விக்கெட்டுகளை வீழ்த்தினார். மேலும் மூன்று பந்துவீச்சாளர்கள் தலா 2 விக்கெட்டுகளை வீழ்த்தி இலங்கை இன்னிங்ஸை வீழ்த்த பங்களிப்பு செய்தனர். போட்டியின் சிறந்த வீரர் விருது ஹாரி ப்ரூக்கிற்கு வழங்கப்பட்டதுடன், தொடர் முழுவதும் 247 ஓட்டங்கள் குவித்து சிறப்பாக செயல்பட்ட ஜோ ரூட் தொடரின் சிறந்த வீரராக முடிசூட்டப்பட்டார்.
இரு நாடுகளுக்கும் இடையிலான 3 போட்டிகள் கொண்ட இருபதுக்கு - 20 தொடரின் முதல் போட்டி எதிர்வரும் ஜனவரி 30ஆம் திகதி வெள்ளிக்கிழமை கண்டி பல்லேகல சர்வதேச கிரிக்கெட் மைதானத்தில் நடைபெற உள்ளது.
