கொழும்பு கோட்டையில் உள்ள இலங்கை மத்திய வங்கியின் பழைய கட்டிட வளாகத்தில் பொருத்தப்பட்டிருந்த மின்னல் கடத்தி அமைப்பிலிருந்து 41 இலட்சத்திற்கும் அதிகமான பெறுமதியுடைய செப்பு கம்பிகள் ஒரு குழுவினரால் திருடப்பட்டுள்ளதாக கொழும்பு கோட்டைப் பொலிஸார் தெரிவித்துள்ளனர். 16 மாடிகளைக் கொண்ட ஒன்றோடொன்று இணைக்கப்பட்ட மூன்று கட்டிடங்களின் மேற்பகுதியை மூடும் வகையில் பயன்படுத்தப்பட்ட சுமார் 288 மீட்டர் நீளமுள்ள செப்பு கம்பிகள் இவ்வாறு காணாமல் போயுள்ளன. அவற்றின் மொத்த மதிப்பு ரூபா 41,03,568 என மதிப்பிடப்பட்டுள்ளது.
இது தொடர்பாக மத்திய வங்கியின் முகாமைத்துவத் திணைக்களத்தைப் பிரதிநிதித்துவப்படுத்தும் பணிப்பாளர் ஒருவர் கடந்த 27ஆம் திகதி கோட்டைப் பொலிஸில் உத்தியோகபூர்வமாக முறைப்பாடு செய்துள்ளார். குறித்த முறைப்பாட்டின்படி, இந்த பாரிய திருட்டு 2026 ஜனவரி 15ஆம் திகதிக்கும் 2026 பெப்ரவரி 27ஆம் திகதிக்கும் இடைப்பட்ட காலப்பகுதியில் நடந்திருக்கலாம் என மேலும் சந்தேகிக்கப்படுகிறது.
கிடைத்த முறைப்பாட்டின்படி, கோட்டைப் பொலிஸ் நிலைய பொறுப்பதிகாரி, பிரதான பொலிஸ் பரிசோதகர் திலீப சி. பெரேரா தலைமையிலான குற்றப் புலனாய்வுப் பிரிவினர் இச்சம்பவம் தொடர்பில் விரிவான விசாரணைகளை ஆரம்பித்துள்ளனர். இந்த விசாரணைகளில், இந்த பழைய கட்டிட வளாகத்தின் வெளிப்புறப் பூச்சு வேலைகளுக்காக கடந்த 2025 மார்ச் மாதம் ஒரு வெளி ஒப்பந்தம் வழங்கப்பட்டிருந்தது தெரியவந்துள்ளது. காணாமல் போன மின்னல் கடத்தி கேபிள் அமைப்பும் இந்த மூன்று கட்டிடங்களின் மேற்பகுதியை மூடும் வகையில் பயன்படுத்தப்பட்ட ஒன்று என்பதும் அங்கு உறுதிப்படுத்தப்பட்டுள்ளது.
இதுவரை மேற்கொள்ளப்பட்ட பொலிஸ் விசாரணைகளின்படி, இந்த குற்றச் செயலுடன் மத்திய வங்கியின் உள் ஊழியர்களுக்கு எவ்வித தொடர்பும் இல்லை என்றும், இது முற்றிலும் வெளிநபர்கள் குழுவினரால் மேற்கொள்ளப்பட்டது என்றும் தகவல்கள் தெளிவாகி வருவதாக ஒரு சிரேஷ்ட பொலிஸ் அதிகாரி தெரிவித்தார். இத்துடன் தொடர்புடைய அனைத்து சந்தேக நபர்களையும் மிக விரைவில் சட்டத்தின் பிடியில் கொண்டு வர முடியும் என்றும் அந்த அதிகாரி மேலும் நம்பிக்கை தெரிவித்தார்.