உலக சுகாதார ஸ்தாபனம், கொங்கோ ஜனநாயகக் குடியரசு மற்றும் உகாண்டாவில் தற்போது பரவி வரும் எபோலா தொற்றுநோயை, சர்வதேச கவனம் தேவைப்படும் ஒரு பொது சுகாதார அவசரநிலையாக 2026 மே 17 அன்று அறிவித்துள்ளது. இது COVID-19 போன்ற உலகளாவிய தொற்றுநோயாக இன்னும் வளர்ச்சியடையவில்லை என்றாலும், இதை எதிர்கொள்ள உலகளாவிய ஒருங்கிணைந்த விரைவான பதில் தேவை என்பதை இது அதிகாரப்பூர்வமாக வலியுறுத்துகிறது.
அண்டை நாடுகளுக்கு இதனால் ஏற்படக்கூடிய ஆபத்து குறித்து கவனம் செலுத்திய உலக சுகாதார ஸ்தாபனத்தின் பணிப்பாளர் நாயகம் டெட்ரோஸ் அதானோம் கெப்ரேயெசஸ் (Tedros Adhanom Ghebreyesus) அவர்கள், சர்வதேச எல்லைகளை மூடாமல் இந்த நிலைமையைக் கட்டுப்படுத்த நடவடிக்கை எடுக்குமாறு அறிவுறுத்தியுள்ளார்.மே மாத நடுப்பகுதிக்குள் இந்த வைரஸால் பாதிக்கப்பட்டதாக சந்தேகிக்கப்படும் 300க்கும் மேற்பட்ட நோயாளிகள் பதிவாகியுள்ளனர். இவர்களில் பெரும்பாலானோர் கொங்கோவைச் சேர்ந்தவர்கள், மேலும் இரண்டு இறக்குமதி செய்யப்பட்ட நோயாளிகள் உகாண்டாவில் அடையாளம் காணப்பட்டுள்ளனர். இதுவரை 80 முதல் 88 வரையிலான இறப்புகள் பதிவாகியுள்ளன. இந்த நோயாளிகளில் பெரும்பாலானோர் மருத்துவ சிகிச்சை பெறுவதற்கு முன்பே சமூகத்தில் இறந்துள்ளனர் என்பது பெரும் கவலைக்குரிய விடயமாகும். இம்முறை பரவி வருவது எபோலா வைரஸ் வகைகளில் அரிதான ஒன்றான புண்டிபுகியோ (Bundibugyo) வைரஸ் ஆகும். பொதுவாகக் காணப்படும் சையர் (Zaire) வகையைப் போல இதற்கு இன்னும் அங்கீகரிக்கப்பட்ட தடுப்பூசியோ அல்லது குறிப்பிட்ட சிகிச்சை முறையோ கண்டறியப்படவில்லை. இந்த வைரஸின் இறப்பு விகிதம் பொதுவாக 25% முதல் 40% வரை இருக்கும்.
இந்த தொற்றுநோய் முக்கியமாக கொங்கோவின் வடகிழக்கு இட்டுரி (Ituri) மாகாணத்தை மையமாகக் கொண்டு பரவியுள்ளது. இது எல்லைகளைக் கடந்து இடம்பெயரும் சுரங்கத் தொழிலாளர்கள் அதிகம் வசிக்கும் ஒரு கடினமான பகுதியாகும். அப்பகுதியில் நிலவும் ஆயுத மோதல்கள் மற்றும் இடம்பெயர்ந்த மக்கள் காரணமாக சுகாதார சேவைகள் கடுமையாக பாதிக்கப்பட்டுள்ளன. நோயாளிகள் ஏற்கனவே உகாண்டாவின் தலைநகரான கம்பாலாவுக்கும், கொங்கோவின் தலைநகரான கின்ஷாசாவுக்கும் பயணம் செய்துள்ளதாக சந்தேகிக்கப்படுகிறது. பாதிக்கப்பட்டவரின் உடல் திரவங்கள் மூலம் பரவும் இந்த வைரஸின் அறிகுறிகள் வெளிப்பட 2 முதல் 21 நாட்கள் வரை ஆகும் என்பதும், கடினமான பகுதிகளில் முறையான சுகாதார கண்காணிப்பு செயல்முறை இல்லாததும் நோயின் இரகசியமான பரவலுக்கு கடுமையான ஆபத்தை ஏற்படுத்துகிறது.
நிலைமையைக் கட்டுப்படுத்த உலக சுகாதார ஸ்தாபனமும் ஆப்பிரிக்க நோய் கட்டுப்பாடு மற்றும் தடுப்பு மையமும் (Africa CDC) இணைந்து விரைவான நடவடிக்கைகளை எடுத்து வருகின்றன. இதற்காக 500,000 டாலருக்கும் அதிகமான அவசர நிதியுதவியும், மருத்துவ நிபுணர்கள், பாதுகாப்பு உடைகள் (PPE) மற்றும் ஆய்வக வசதிகளும் வழங்கப்பட்டுள்ளன. இதற்கு முன்னரும் 17 சந்தர்ப்பங்களில் எபோலா தொற்றுநோய்களை வெற்றிகரமாக எதிர்கொண்ட கொங்கோவும் உகாண்டாவும், தற்போது எல்லைகள் மற்றும் மருத்துவமனைகளில் நோயாளிகளைப் பரிசோதித்தல் மற்றும் தனிமைப்படுத்துதல் நடவடிக்கைகளை தீவிரப்படுத்தியுள்ளன. தென் சூடான் போன்ற அண்டை நாடுகளுக்கு இதனால் அதிக ஆபத்து உள்ளது. இந்த கொடிய வைரஸிலிருந்து பாதுகாக்க நோயாளிகளைத் தனிமைப்படுத்துதல், தொடர்புகளைக் கண்டறிதல் மற்றும் பாதுகாப்பாக சடலங்களை அடக்கம் செய்தல் போன்ற சுகாதார நடைமுறைகளை கடுமையாகப் பின்பற்றுவது அத்தியாவசியம் என்று அதிகாரிகள் சுட்டிக்காட்டுகின்றனர்.
