பதுளை போதனா வைத்தியசாலையில் காணாமல் போன மயக்க மருந்து நிபுணர் வைத்தியர் பிரபாத் தயா ரத்னவின் உடல் லொக்கல்லாஓயா வனப்பகுதியில் உள்ள ஒரு பாறையின் மீது நேற்று (24) காலை கண்டுபிடிக்கப்பட்டுள்ளது. கண்டி பிரதேசத்தைச் சேர்ந்த 49 வயதுடைய இரண்டு பிள்ளைகளின் தந்தையான இவர், கினிகத்ஹேன பிரதேசத்தின் பூர்வீகக் குடிகளில் ஒருவர்.
கடந்த 23ஆம் திகதி காலை பதுளை போதனா வைத்தியசாலையின் சத்திரசிகிச்சை கூடத்தில் கடமைகளில் ஈடுபட்ட பின்னர் வைத்தியர் காணாமல் போயுள்ளார். அன்றைய தினம் காலை 10.00 மணியளவில் அவரது கையடக்கத் தொலைபேசியும் செயலிழந்துள்ளது. இது தொடர்பில் மேற்கொள்ளப்பட்ட தேடுதல்களில், பாதுகாப்பு கமரா காட்சிகளின் ஊடாக அவரது கார் மஹியங்கனை நோக்கிச் செலுத்தப்பட்டமை அவதானிக்கப்பட்டது. அன்றைய தினம் இரவு பதுளை - மஹியங்கனை பிரதான வீதியில் 17ஆம் மைல்கல் பிரதேசத்தில் கைவிடப்பட்டிருந்த காரை மஹியங்கனைப் பொலிஸார் கண்டுபிடித்தனர்.
காட்டு யானைகள் நடமாடும் அப்பகுதியில் பொலிஸார், இராணுவம் மற்றும் வனவிலங்கு அதிகாரிகள் இணைந்து மேற்கொண்ட கூட்டுத் தேடுதல் நடவடிக்கையின் போது, கார் இருந்த இடத்திலிருந்து சுமார் 800 மீட்டர் தொலைவில் உள்ள வனப்பகுதியில் ஒரு பாறையின் மீது தலைகீழாகக் கிடந்த வைத்தியரின் உடல் கண்டுபிடிக்கப்பட்டது. உடலில் இருந்து இரத்தம் வெளியேறியிருந்ததுடன், அவர் பயன்படுத்தியதாக சந்தேகிக்கப்படும் பல மருந்து மாத்திரைகளும் அருகில் கண்டுபிடிக்கப்பட்டன.
இந்த மரணம் தற்கொலையாக இருக்கலாம் என பொலிஸார் சந்தேகிக்கின்றனர். அவர் ஒரு குறிப்பிட்ட நோய்க்கு சிகிச்சை பெற்று வந்தவர் என்பதும் தெரியவந்துள்ளது. வைத்தியரின் மனைவி மற்றும் குடும்பத்தினர் சடலத்தை அடையாளம் காண வந்திருந்தனர். அவர்கள் கூறியபடி, கடந்த காலத்தில் அவர் ஒரு தனிப்பட்ட பிரச்சனை காரணமாக மன உளைச்சலில் இருந்துள்ளார். இரண்டு பிள்ளைகளின் தந்தையான இந்த வைத்தியர் நீண்டகாலமாக மன அழுத்தம் மற்றும் மன உளைச்சலுக்காக மருந்துகளை உட்கொண்டு வந்துள்ளார். அவரது உடலுக்கு அருகில் அது தொடர்பான மூன்று வகையான மருந்து மாத்திரைகளும் கண்டுபிடிக்கப்பட்டுள்ளன. அவர் அதிகப்படியான மருந்துகளை உட்கொண்டு தற்கொலை செய்து கொண்டிருக்கலாம் என்ற சந்தேகம் எழுந்துள்ளது.
மஹியங்கனை பதில் நீதவான் எஸ். கோவின்ன நேற்று மாலை சம்பவ இடத்திற்கு வந்து களப் பரிசோதனை மேற்கொண்டார். சடலத்தை மஹியங்கனை ஆதார வைத்தியசாலைக்கு கொண்டு சென்று சட்ட வைத்திய அதிகாரியால் பிரேத பரிசோதனை நடத்தி நீதிமன்றத்திற்கு அறிக்கை சமர்ப்பிக்குமாறு பொலிஸாருக்கு உத்தரவிட்டார்.
கேகாலை உட்பட பல வைத்தியசாலைகளில் கடமையாற்றிய திறமையான மற்றும் பணிவான வைத்தியராக அறியப்பட்ட பிரபாத் தயா ரத்னவின் மரணம் தொடர்பில் ஊவா மாகாணத்திற்குப் பொறுப்பான சிரேஷ்ட பிரதிப் பொலிஸ் மா அதிபர் மகேஷ் சேனாரத்ன உட்பட உயர் பொலிஸ் அதிகாரிகளின் அறிவுறுத்தலின் பேரில் மஹியங்கனைப் பொலிஸ் நிலைய பொறுப்பதிகாரி தலைமையிலான குழுவினர் மேலதிக விசாரணைகளை மேற்கொண்டு வருகின்றனர்.
