நீதிமன்ற நீதிபதிகளின் ஓய்வு பெறும் வயதை நீட்டிப்பது பொருத்தமற்றது என்று கூறி, மூன்று பிரிவுகளின் மகாநாயக்க தேரர்கள் ஜனாதிபதிக்கு அனுப்பியதாகக் கூறப்படும் கடிதம் குறித்து தனக்குத் தெரியாது என்று அமைச்சரவைப் பேச்சாளர் அமைச்சர் வைத்தியர் நளிந்த ஜயதிஸ்ஸ தெரிவித்தார். அமைச்சரவைத் தீர்மானங்களை அறிவிக்கும் ஊடகவியலாளர் சந்திப்பில் ஊடகவியலாளர்கள் எழுப்பிய கேள்விகளுக்கு பதிலளிக்கும் போது அமைச்சர் இதைத் தெரிவித்தார்.
அமைச்சரும் நீதி அமைச்சர் ஹர்ஷண நாணயக்காரவும் மல்வத்து, அஸ்கிரி மற்றும் ராமன்ய பிரிவுகளின் மகாநாயக்க தேரர்களை சந்தித்து 22வது அரசியலமைப்புத் திருத்தம் குறித்த அரசாங்கத்தின் நிலைப்பாட்டை விளக்கினர் என்று அமைச்சர் குறிப்பிட்டார். நீதிமன்றங்களில் குவிந்துள்ள வழக்குகளை திறம்பட முடித்து மக்களுக்கு நிவாரணம் வழங்குவதே அரசாங்கத்தின் முக்கிய நோக்கம் என்று அவர்களுக்கு சுட்டிக்காட்டப்பட்டதுடன், அந்த செயல்முறை தொடர்பாக மகாநாயக்க தேரர்களுக்கு எந்த எதிர்ப்பும் இல்லை என்றும் தெளிவுபடுத்தப்பட்டது.
இந்த அரசியலமைப்புத் திருத்தம் ஒரு நீதிபதியை மட்டுமே இலக்காகக் கொண்டு செய்யப்படுகிறதா என்று மல்வத்து மற்றும் அஸ்கிரி மகாநாயக்க தேரர்கள் விசாரித்ததாக அமைச்சர் கூறினார். இது ஒரு தனிநபரை இலக்காகக் கொண்ட திருத்தம் அல்ல என்றும், அனைத்து நீதிமன்ற நீதிபதிகளின் ஓய்வு பெறும் வயதை அதிகரிக்க நடவடிக்கை எடுக்கப்படும் என்றும் அரசாங்கத்தின் சார்பில் தெளிவுபடுத்தப்பட்டது. அதன்படி, 22வது அரசியலமைப்புத் திருத்தத்தின் மூலம் உச்ச நீதிமன்றம் மற்றும் மேன்முறையீட்டு நீதிமன்ற நீதிபதிகளின் ஓய்வு வயது அதிகரிக்கப்படும் என்றும், நீதித்துறை சேவைச் சட்டத்தை திருத்துவதன் மூலம் மாவட்ட நீதிமன்றங்கள் உட்பட அனைத்து நீதிமன்ற நீதிபதிகளின் ஓய்வு வயதை நீட்டிக்க நடவடிக்கை எடுக்கப்படும் என்றும் சுட்டிக்காட்டப்பட்டது.
ஒரு மணி நேரத்திற்கும் மேலாக நடைபெற்ற இந்த கலந்துரையாடல்களில், மல்வத்து மகாநாயக்க தேரரும் சுமார் 20 ஆண்டுகளாக ஒரு வழக்கை எதிர்கொண்டு வருவதாக அமைச்சரிடம் தெரிவித்தார். சாதாரண மக்கள் 12 முதல் 20 ஆண்டுகள் வரை நீண்ட காலம் வழக்குகளை எதிர்கொள்ள வேண்டியிருப்பதால், நீதித்துறை அமைப்பின் செயல்திறனை மேம்படுத்துவதற்காக செய்யப்படும் திருத்தங்கள் குறித்து யாருக்கும் எதிர்ப்பு இல்லை என்றும் அமைச்சர் சுட்டிக்காட்டினார். நேற்று அமைச்சரவைக் கூட்டம் நடைபெற்றதால், அமரபுர பிரிவின் மகாநாயக்க தேரரை சந்திக்க வாய்ப்பு கிடைக்கவில்லை என்றும் அமைச்சர் வைத்தியர் நளிந்த ஜயதிஸ்ஸ மேலும் தெரிவித்தார்.