TM App எனப்படும் மொபைல் செயலி சட்டவிரோத பிரமிட் திட்டத்தை செயல்படுத்தி அதை ஊக்குவித்துள்ளது இலங்கை மத்திய வங்கியால் நடத்தப்பட்ட ஒரு சிறப்பு விசாரணையில் தெரியவந்துள்ளது. 1988 ஆம் ஆண்டு இலக்கம் 30 (திருத்தப்பட்ட) வங்கிச் சட்டத்தின் 83(இ) பிரிவின்படி இந்த விசாரணை நடத்தப்பட்டுள்ளதுடன், மத்திய வங்கியின் நிதி நுகர்வோர் உறவுகள் திணைக்களத்தால் வெளியிடப்பட்ட பொது அறிவிப்பில் இது தொடர்பான தகவல்கள் குறிப்பிடப்பட்டுள்ளன.
சம்பந்தப்பட்ட கண்டுபிடிப்புகளின்படி, வங்கிச் சட்டத்தின் கீழ் நாட்டில் தடைசெய்யப்பட்ட நிறுவனங்கள் மற்றும் பயன்பாடுகளின் பட்டியலில் TM App செயலியும் புதிதாக சேர்க்கப்பட்டுள்ளது. இந்த சமீபத்திய புதுப்பித்தலுடன், மத்திய வங்கியால் தடைசெய்யப்பட்ட நிறுவனங்கள் மற்றும் பயன்பாடுகளின் மொத்த எண்ணிக்கை தற்போது 26 ஆக உயர்ந்துள்ளது.
TM App செயலியுடன், Qnet\/Questnet, MTFE, OnmaxDT, Fruugo Oline, Beecoin App, Windex Trading, Smart Win Entrepreneur மற்றும் Infinity Rover (Pvt) Ltd ஆகிய நிறுவனங்கள் மற்றும் பயன்பாடுகளும் தடைசெய்யப்பட்ட பட்டியலில் சேர்க்கப்பட்டுள்ளன. இலங்கையில் செயல்படும் இத்தகைய தடைசெய்யப்பட்ட பிரமிட் திட்டங்கள் குறித்து பொதுமக்கள் தொடர்ந்து விழிப்புடன் இருக்க வேண்டும் என்றும், இது குறித்து பொதுமக்கள் தீவிரமாக அறிந்திருக்க வேண்டும் என்றும் அந்த அறிவிப்பு மேலும் வலியுறுத்துகிறது.