ஹோமாகம, கொடகம பிரதேசத்தில் நடத்தப்பட்டு வந்த வாகன விற்பனை நிலையம் ஊடாக வாகனங்களை வாங்குபவர்களையும் விற்பவர்களையும் ஏமாற்றி சுமார் ஐந்து கோடி ரூபா மோசடி செய்ததாக குற்றம் சாட்டப்பட்ட அதன் உரிமையாளரை இன்று (25) வரை விளக்கமறியலில் வைக்க ஹோமாகம பதில் நீதவான் பிரியங்கா மத்துமபதபெந்தி உத்தரவிட்டார். இவ்வாறு சிறையில் அடைக்கப்பட்டவர் மஹபத்தகே சாமர ஹவந்த என்ற சந்தேகநபர் ஆவார்.
இச்சம்பவம் தொடர்பில் பாதிக்கப்பட்ட சுமார் 15 பேர் மீகொட பொலிஸ் நிலையத்தில் செய்த முறைப்பாடுகளின் அடிப்படையில் சந்தேகநபர் கைது செய்யப்பட்டு நீதிமன்றத்தில் ஆஜர்படுத்தப்பட்டுள்ளார்.இதற்கு முன்னர் ஒரு சந்தர்ப்பத்தில், மீகொட பொலிஸ் நிலையத்தின் குற்றப் புலனாய்வுப் பிரிவின் பொறுப்பதிகாரி சந்தேகநபரின் வாகனத்தை மறித்து கைது செய்ய முயற்சித்தபோது, சந்தேகநபர் அந்த பொலிஸ் அதிகாரியை மோதிவிட்டு தப்பிச் செல்ல முயன்றுள்ளார். அதன்படி, கொலை முயற்சி குற்றச்சாட்டு உட்பட பொலிஸார் நீதிமன்றத்தில் தகவல்களை சமர்ப்பித்துள்ளனர். மேலும், கொடுக்கப்பட்ட முறைப்பாடுகள் தொடர்பில் வாக்குமூலம் அளிப்பதற்காக மீகொட பொலிஸ் நிலையத்திற்கு வருமாறு அறிவிக்கப்பட்ட போதிலும், சந்தேகநபர் சுமார் 3 மாதங்களாக பொலிஸ் நிலையத்திற்கு வரவில்லை என தெரிவிக்கப்பட்டுள்ளது. இதன் காரணமாக, குறித்த மோசடிகளுக்கு உடந்தையாக இருந்த குற்றச்சாட்டின் பேரில் சந்தேகநபரின் மனைவி மற்றும் விற்பனை நிறுவனத்தின் முகாமையாளர் கைது செய்யப்பட்டு நீதிமன்றத்தில் ஆஜர்படுத்தப்பட்ட பின்னர் செப்டம்பர் 01 ஆம் திகதி வரை விளக்கமறியலில் வைக்கப்பட்டுள்ளனர்.
நீதிமன்றத்தில் வெளிப்படுத்தப்பட்ட தகவல்களின்படி, சந்தேகநபர் வாராந்த பத்திரிகைகளில் வெளியிடப்படும் வாகன விற்பனை விளம்பரங்களில் உள்ள தொலைபேசி எண்களுக்கு அழைப்பு விடுத்து, குறித்த வாகனங்களை இரண்டு வாரங்களுக்குள் விற்பனை செய்து தர முடியும் என்று கூறி தனது இடத்திற்கு வரவழைத்துள்ளார். பின்னர், அந்த வாகனங்கள் விற்பனைக்கு உள்ளதாக தானே பத்திரிகை விளம்பரங்களை வெளியிட்டு, அவற்றை வாங்க வரும் வாங்குபவர்களுக்கு அசல் உரிமைப் புத்தகம் இல்லாமல் ஒரு குறிப்பிட்ட தொகையை குறைத்து வாகனத்தை விற்றுள்ளார். உரிமைப் புத்தகம் வழங்கப்பட்ட பின்னர் மீதமுள்ள தொகையை செலுத்துமாறு வாங்குபவர்களுக்கு அறிவித்து, அசல் உரிமையாளருக்கு தெரியாமல் குறித்த வாகனங்களை சந்தேகநபர் விற்பனை செய்துள்ளதாக பொலிஸார் வெளிப்படுத்தினர்.
வாகனங்களை விற்பனை செய்த பின்னர், அதன் அசல் உரிமையாளர்களுக்கு ஒரு சிறிய தொகையை கணக்கில் வரவு வைத்து, அதை ஒரு முற்பணமாக மட்டுமே காட்டி அவர்களையும் ஏமாற்றியுள்ளதாக பொலிஸார் நீதிமன்றத்தில் தெரிவித்தனர். இந்த பண மோசடிகள் தொடர்பாக ஹோமாகம சிறப்பு மோசடி விசாரணைப் பிரிவுக்கு சுமார் 150 மில்லியன் ரூபா பெறுமதியான முறைப்பாடுகள் கிடைத்துள்ளதாகவும் பொலிஸார் மேலும் தெரிவித்தனர்.
மீகொட பொலிஸ் நிலையப் பொறுப்பதிகாரி பொலிஸ் பரிசோதகர் தினுக வீரசிங்கவின் அறிவுறுத்தலின் பேரில், சிறு முறைப்பாடுகள் பிரிவின் பொறுப்பதிகாரி பொலிஸ் பரிசோதகர் ஜயவிக்ரம, உப பொலிஸ் பரிசோதகர் ருசிரு, பொலிஸ் சார்ஜன்ட் (44552) சமன், பொலிஸ் கான்ஸ்டபிள்களான (92518) லக்மால் மற்றும் (102009) சங்கல்ப ஆகிய அதிகாரிகள் இது குறித்து மேலதிக விசாரணைகளை மேற்கொண்டு வருகின்றனர்.