காலமான பிரபல மாடல் சூலா பத்மேந்திரா அம்மையாரின் உடல் தற்போது பொதுமக்களின் அஞ்சலிக்காக பொரளை ஜயரத்ன மலர்சாலையில் வைக்கப்பட்டுள்ளதுடன், அவரது இறுதிச் சடங்குகள் இன்று (02) பிற்பகல் நடைபெறவுள்ளன. பொரலஸ்கமுவ பிரதேசத்தில் வசித்து வந்த 45 வயதான ஒரு பிள்ளைத் தாயான இவர், கடந்த 31ஆம் திகதி பிலியந்தலை, தும்போவில, கங்காராம வீதியில் அமைந்துள்ள ஒரு வர்த்தகரின் வீட்டில் படுக்கையில் உயிரிழந்த நிலையில் கண்டெடுக்கப்பட்டார்.
இன்று நடைபெற்ற இறுதிச் சடங்குகளின் போது அரசியலுடன் தொடர்புடையவர் எனக் கூறப்படும் அந்த வர்த்தகரும் ஒரு பெரிய பூங்கொத்துடன் வந்து, அவர் முன் உணர்வுபூர்வமாக துக்கம் தெரிவித்தமை குறிப்பிடத்தக்கது.பொலிஸ் விசாரணைகளில் தெரியவந்துள்ளபடி, உயிரிழந்த மாடல் பத்தரமுல்லை வோட்டர்ஸ்ஏஜில் ஏற்பாடு செய்யப்பட்டிருந்த ஒரு நிகழ்வில் கலந்துகொண்ட பின்னர், அன்றைய தினம் அதிகாலை 5.00 மணியளவில் சம்பந்தப்பட்ட வர்த்தகருடன் பிலியந்தலையில் உள்ள அவரது வீட்டிற்கு வந்துள்ளார். பின்னர் அவர் அங்குள்ள ஒரு அறையில் தூங்கியதாகக் கூறப்படுகிறது.
அன்றைய தினம் நண்பகல் 12.45 மணியளவில் அவரை எழுப்ப முயற்சித்த போதிலும், எந்தப் பதிலும் இல்லாததால் 1990 சுவசரிய ஆம்புலன்ஸ் சேவை அழைக்கப்பட்டது. அங்கு வந்த சுகாதார ஊழியர்கள் பரிசோதித்த பின்னர் அவர் உயிரிழந்துவிட்டதாக உறுதிப்படுத்தினர். அவர் தூங்கிய படுக்கை விரிப்பில் இரத்தக் கறையும் காணப்பட்டதால், சம்பந்தப்பட்ட வர்த்தகர் இது குறித்து பிலியந்தலை பொலிஸில் முறைப்பாடு செய்துள்ளார். அந்த முறைப்பாட்டைச் செய்ய வர்த்தகருடன் சூலாவின் தாயும் பொலிஸ் நிலையத்திற்குச் சென்றார். மரணம் நிகழ்ந்த விதம் இன்னும் அறிவிக்கப்படவில்லை.
இந்த திடீர் மரணம் தொடர்பில் நேற்று (01) திறந்த தீர்ப்பு வழங்கப்பட்டதாகவும், அவரது உடலில் உள் அல்லது வெளி காயங்கள் எதுவும் கண்டறியப்படவில்லை எனவும் மேலதிக விசாரணைகள் தேவை எனவும் அதில் குறிப்பிடப்பட்டிருந்தது. சம்பவம் தொடர்பான மேலதிக தகவல்களை வெளிக்கொணர்வதற்காக பிலியந்தலை பொலிஸார் விசாரணைகளை மேலும் முன்னெடுத்து வருகின்றனர்.
