தீவு முழுவதும் நிலவும் மோசமான காலநிலை காரணமாக 17 மாவட்டங்கள் பாதிக்கப்பட்டுள்ளன. கடந்த 10 நாட்களில் 31 பேர் உயிரிழந்துள்ளதாக அனர்த்த முகாமைத்துவ நிலையம் தெரிவித்துள்ளது. இந்த உயிரிழப்புகளில் அதிகபட்சமாக ஊவா மாகாணத்தில் 18 பேரும், சப்ரகமுவ மாகாணத்தில் 7 பேரும், மத்திய மாகாணத்தில் 4 பேரும் உயிரிழந்துள்ளதாக தெரிவிக்கப்பட்டுள்ளது.
குறிப்பாக பதுளை மாவட்டத்தில் கந்தகெட்டிய, ஹேகொட, மடோல்சிம உள்ளிட்ட பல பகுதிகளில் ஏற்பட்ட மண்சரிவுகளினால் பலர் உயிரிழந்துள்ளதுடன், மேலும் பலர் காணாமல் போயுள்ளதாக பதுளை மாவட்ட அனர்த்த முகாமைத்துவ நிலையம் தெரிவித்துள்ளது.அத்துடன், நுவரெலியா வலப்பனை பிரதேசத்தில் இரண்டு வீடுகள் மண்சரிவில் புதையுண்டதில் நால்வர் உயிரிழந்துள்ளனர். கண்டி மாவட்டத்தில் பத்தஹேவாஹெட்ட மற்றும் உடுதும்பர பிரதேசங்களில் நால்வர் காணாமல் போயுள்ளதாக மாவட்ட செயலாளர்கள் உறுதிப்படுத்தியுள்ளனர். மொத்தமாக 79 பிரதேச செயலாளர் பிரிவுகளில் உள்ள 1,158 குடும்பங்களைச் சேர்ந்த 4,008 பேர் பாதிக்கப்பட்டுள்ளதுடன், 10 பேர் காயமடைந்துள்ளனர்.
தற்போது நிலவும் ஆபத்தான சூழ்நிலைகள் காரணமாக 41 குடும்பங்களைச் சேர்ந்த 131 பேர் பாதுகாப்பு மையங்களுக்கு அனுப்பப்பட்டுள்ளதாக அனர்த்தப் பிரிவுகள் சுட்டிக்காட்டியுள்ளன.
கனமழை காரணமாக பல வீதிகளில் போக்குவரத்து கடுமையாகப் பாதிக்கப்பட்டுள்ளது. பொலன்னறுவை - மட்டக்களப்பு பிரதான வீதி மனாம்பிட்டிய கல்லெல்ல பிரதேசத்தில் வெள்ளத்தில் மூழ்கியதால் தற்காலிகமாக மூடப்பட்டுள்ளது. அத்துடன், கொழும்பு - கண்டி வீதி நேற்று இரவு முதல் மூடப்பட்டுள்ளது. நுவரெலியா - கம்பளை பிரதான வீதியில் உள்ள கரடி எல பிரதேசத்தில் பாறைகள் உருளும் அபாயம் காரணமாக அந்த வீதியும் தற்காலிகமாக மூடப்பட்டுள்ளது. மத்திய மாகாணத்தில் பல வீதிகள் ஆபத்தான நிலையில் உள்ளதால் சாரதிகள் மிகுந்த அவதானத்துடன் செயற்படுமாறு எச்சரிக்கப்பட்டுள்ளது.
இதற்கிடையில், மொனராகலையிலிருந்து கொழும்பு நோக்கிச் சென்ற பேருந்து ஒன்று கும்புகன ரங்கா ஹோட்டலுக்கு அருகில் வெள்ளத்தில் சிக்கியது. எனினும், பொலிஸாரும் பிரதேசவாசிகளும் டிராக்டர்களைப் பயன்படுத்தி அதில் இருந்த 23 பயணிகளையும் பாதுகாப்பாக மீட்டனர். மேலும், 1902 ஆம் ஆண்டு கட்டப்பட்டு தற்போது பயன்பாட்டில் இல்லாத பென்தர பழைய பாலம் நேற்று இரவு முழுமையாக இடிந்து விழுந்துள்ளதாக தெரிவிக்கப்பட்டுள்ளது. வளிமண்டலவியல் திணைக்களத்தின்படி, இன்று காலை 24 மணிநேரத்தில் அதிகபட்ச மழைவீழ்ச்சியாக 300.1 மில்லிமீட்டர் மட்டக்களப்பு ரூகம் பிரதேசத்தில் பதிவாகியுள்ளது.
Tags:
Trending