நீர்ப்பாசன திணைக்களத்தின் நீரியல் மற்றும் அனர்த்த முகாமைத்துவப் பிரிவினால் 2025 நவம்பர் 28 ஆம் திகதி அதிகாலை 3:30 மணிக்கு வெளியிடப்பட்ட தரவு அறிக்கைகளின்படி, நாட்டின் பல பிரதான ஆற்றுப் படுகைகளில் கடும் மழைவீழ்ச்சியுடன் வெள்ள நிலைமைகள் அதிகரித்து வருகின்றன.
களனி ஆற்றின் மேல் படுகைகளில் பெய்த கடும் மழைவீழ்ச்சி காரணமாக கித்துல்கலை பிரதேசத்தில் 227.0 மில்லிமீட்டர் மழைவீழ்ச்சி பதிவாகியுள்ளதுடன், இது தற்போது பாரிய வெள்ள அபாய நிலையை எட்டியுள்ளது. அத்துடன், களனி ஆற்றின் கிளை நதிகளான சீதாவக்க ஆறு தெரணியகல பிரதேசத்திலும், குருக்கொட ஓயா ஹொலொம்புவ பிரதேசத்திலும் பாரிய வெள்ள அபாய நிலைகளை எட்டியுள்ளதோடு, நீர்மட்டங்கள் மேலும் அதிகரித்து வருவதாக அவதானிக்கப்பட்டுள்ளது. களனி ஆற்றின் கீழ் பிரதேசங்களான நாகலகம் வீதி மற்றும் ஹன்வெல்ல பிரதேசங்கள் தற்போது எச்சரிக்கை மட்டத்தில் (Alert Level) உள்ளன. கிளென்கோஸ் பிரதேசத்தில் நீர்மட்டம் சிறிய வெள்ள நிலைமை வரை உயர்ந்துள்ளது.மகாவலி ஆற்றை அண்மித்தும் குறிப்பிடத்தக்க மழைவீழ்ச்சி பதிவாகியுள்ளது. பேராதனை நீர் அளவீட்டில் 234.5 மில்லிமீட்டர் மழைவீழ்ச்சியும், நாவலப்பிட்டி பிரதேசத்தில் 208.3 மில்லிமீட்டர் மழைவீழ்ச்சியும் பதிவாகியுள்ளன. இந்த கடும் மழை காரணமாக பேராதனை மற்றும் நாவலப்பிட்டி ஆகிய இடங்களில் நீர்மட்டம் பாரிய வெள்ள அபாய எல்லையைத் தாண்டி மேலும் உயர்ந்து வருகிறது. மாணிக்க கங்கையின் கதிர்காமம் பிரதேசத்தை அண்மித்தும் நீர்மட்டம் பாரிய வெள்ள அபாய நிலையை எட்டியுள்ளதுடன், அது மேலும் அதிகரிக்கும் போக்கைக் காட்டுகிறது. மல்வத்து ஓயா படுகையில் பதிவான 264.2 மில்லிமீட்டர் மிக அதிக மழைவீழ்ச்சி காரணமாக தந்திரமலை பிரதேசத்தில் நீர்மட்டம் பாரிய வெள்ள அபாய நிலையை எட்டியுள்ளதுடன், நீர்மட்டம் மேலும் உயர்ந்து வருகிறது.
தெதுரு ஓயா மற்றும் மா ஓயா ஆகியவற்றை அண்மித்தும் வெள்ள அபாயம் உயர் மட்டத்தில் இருப்பதாக அறிவிக்கப்பட்டுள்ளது. தெதுரு ஓயாவின் மொரகஸ்வெவ நீர் அளவீடு பாரிய வெள்ள அபாய நிலையை காட்டுகிறது. மா ஓயாவின் கிரிஉல்ல பிரதேசமும் பாரிய வெள்ள அபாய மட்டத்தில் உள்ளது.
மா ஓயாவின் படல்கம பிரதேசமும், அத்தனகலு ஓயாவின் தூனமலை பிரதேசமும் தற்போது சிறிய வெள்ள நிலைமையைப் பதிவுசெய்கின்றன. அந்த இடங்களிலும் நீர்மட்டங்கள் உயர்ந்து வருகின்றன. யான் ஓயாவின் ஹொரோவ்பொத்தான பிரதேசத்தில் 223.3 மில்லிமீட்டர் மழைவீழ்ச்சி பதிவாகியுள்ளதுடன், அது சிறிய வெள்ள நிலைமை வரை அதிகரித்துள்ளது. மா ஓயா படுகையின் முகுணு ஓயா யாகவெவ பிரதேசத்திலும் சிறிய வெள்ள நிலைமை பதிவாகியுள்ளது.
களு கங்கையின் குட கங்கையை அண்மித்த மில்லகந்த பிரதேசத்தில் நீர்மட்டம் எச்சரிக்கை மட்டத்தை எட்டியுள்ளது. ஆனால் களு கங்கையின் ஏனைய பிரதேசங்கள் சாதாரண மட்டத்தில் உள்ளன. நிலவளா கங்கையின் தல்கஹகொட பிரதேசம் சிறிய வெள்ள மட்டத்தில் உள்ளது. பாணதுகம பிரதேசத்தில் நீர்மட்டம் எச்சரிக்கை மட்டத்தில் இருந்தபோதிலும், அது தற்போது குறைந்து வருகிறது. வலவே கங்கையின் மொரகெட்டிய பிரதேசம் எச்சரிக்கை மட்டத்தில் உள்ளதுடன், நீர்மட்டம் உயர்ந்து வருகிறது. கிரிந்தி ஓயாவின் தனமல்வில பிரதேசம் சிறிய வெள்ள மட்டத்தில் இருந்தபோதிலும், அது தற்போது குறைந்து வருவதாக நீர்ப்பாசன திணைக்களத்தின் தரவு அறிக்கைகள் தெரிவிக்கின்றன.
Tags:
Trending