தற்போது நிலவும் மோசமான வானிலை காரணமாக பதுளை மாவட்டத்தில் 6 இடங்களில் ஏற்பட்ட மண்சரிவுகளில் சிக்கி நான்கு பேர் உயிரிழந்துள்ளதாக பதுளை மாவட்ட செயலகம் உறுதிப்படுத்தியுள்ளது.
பதுளை மாவட்ட செயலாளர் பண்டுக்க அபேவர்தன தெரிவிக்கையில், இந்த அனர்த்த நிலை காரணமாக மேலும் ஒன்பது பேர் காணாமல் போயுள்ளதாகவும், அவர்களைத் தேடும் பணிகள் தொடர்ச்சியாக முன்னெடுக்கப்பட்டு வருவதாகவும் தெரிவித்தார்.
இலங்கைக்கு தென்கிழக்கே நிலவிய குறைந்த அழுத்தப் பிரதேசம் தற்போது ஒரு தாழமுக்கமாக வலுப்பெற்றுள்ளதுடன், அது மட்டக்களப்பிலிருந்து 210 கிலோமீட்டர் தென்கிழக்கே மையம் கொண்டுள்ளது.
இந்த தாழமுக்கப் பகுதி அடுத்த 12 மணித்தியாலங்களுக்குள் மேலும் வலுப்பெற்று ஆழமான தாழமுக்கமாக மாறி, வடக்கு திசையை நோக்கி வடமேற்கு திசையில் நகர அதிக வாய்ப்புள்ளதாக வளிமண்டலவியல் திணைக்களம் எச்சரித்துள்ளது.
இந்த வானிலை அமைப்பின் தாக்கத்தால் வடமத்திய மற்றும் வடமேல் மாகாணங்களுக்கும் அத்துடன் திருகோணமலை மாவட்டத்திற்கும் 200 மில்லிமீட்டருக்கும் அதிகமான மிக பலத்த மழை எதிர்பார்க்கப்படுகிறது. மேலும், மணிக்கு 60-70 கிலோமீட்டர் வேகத்தில் பலத்த காற்று வீசக்கூடும்.
நீர்ப்பிடிப்புப் பிரதேசங்களில் பெய்யும் அதிக மழை காரணமாக, தெதுரு ஓயா மற்றும் கும்பக்கன் ஓயா அண்டிய தாழ்நிலப் பகுதிகளில் அடுத்த சில மணித்தியாலங்களுக்குள் அதிக வெள்ளப்பெருக்கு ஏற்படும் அபாயம் உள்ளதாக நீர்ப்பாசனத் திணைக்களம் அறிவித்துள்ளது.
மேலும், மல்வத்து ஓயா, நீல்வலா கங்கை, களனி கங்கை, பதுளு ஓயா, மகாவலி கங்கை, மகா ஓயா மற்றும் கலா ஓயா ஆகிய ஆற்றுப் படுகைகளில் நீர்மட்டம் அதிகரித்து வருவதால், அப்பகுதிகளில் வசிக்கும் மக்கள் வெள்ள அபாயம் குறித்து மிகுந்த அவதானத்துடன் இருக்குமாறு அறிவுறுத்தப்படுகிறார்கள்.
நிலவும் மோசமான வானிலை காரணமாக, கொழும்பு - கண்டி பிரதான வீதியின் கீழ் கடுகண்ணாவ பகுதி மறு அறிவித்தல் வரை தற்காலிகமாக மூடப்பட்டுள்ளது.
களனிவௌி ரயில் மார்க்கத்தில் நாராஹென்பிட்டி மற்றும் பேஸ்லைன் ரயில் நிலையங்களுக்கு இடையில் இரண்டு இடங்களில் ரயில் பாதையில் மரங்கள் விழுந்ததால், அந்த மார்க்கத்தில் ரயில் சேவைக்கு இடையூறு ஏற்பட்டுள்ளதாக ரயில்வே திணைக்களம் தெரிவித்துள்ளது.
Tags:
News