பாடசாலை வடிகாலில் வீழ்ந்த 6ஆம் வகுப்பு மாணவனின் சிறுநீரகம் அகற்றப்பட்டது!

 பலப்பிட்டிய கல்விப் பிரிவுக்குட்பட்ட கந்தேகொட மகா வித்தியாலயத்தில் பாதுகாப்பற்ற வடிகாலில் வீழ்ந்தமையினால், அந்தப் பாடசாலையில் ஆறாம் தரத்தில் கல்வி கற்கும் மாணவனொருவனின் சிறுநீரகம் சத்திரசிகிச்சை மூலம் அகற்றப்பட்ட துரதிர்ஷ்டவசமான செய்தி பதிவாகியுள்ளது. வத்துகெதர குருந்துவத்தையில் வசிக்கும் இந்தச் சிறுவன்

கடந்த மாதம் 27ஆம் திகதி இந்த விபத்துக்குள்ளாகியுள்ளான். நோய் நிலைமை தீவிரமடைந்ததையடுத்து பலப்பிட்டிய ஆதார வைத்தியசாலையில் அனுமதிக்கப்பட்ட பின்னர் மருத்துவர்களால் இந்த சத்திரசிகிச்சை மேற்கொள்ளப்பட்டுள்ளது.

சம்பவத்தை எதிர்கொண்ட சிறுவனின் அத்தை, பலப்பிட்டிய பிரதேச சபை உறுப்பினர் நிலுகா குமாரி அம்மையார் தெரிவித்ததாவது, விபத்துக்குப் பின்னர் வகுப்பறையில் அழுதுகொண்டிருந்த சிறுவனிடம் விசாரித்தபோது, வகுப்பாசிரியரிடம் இது பற்றிக் கூறியுள்ளான். பின்னர் பாடசாலையின் அறிவித்தலுக்கு அமைய வந்த சிறுவனின் தாயார், அவனை அம்பலாங்கொட பொல்வத்த வைத்தியசாலைக்கு அழைத்துச் சென்றுள்ளார். மேலதிக சிகிச்சைக்காக அங்கிருந்து பலப்பிட்டிய ஆதார வைத்தியசாலைக்கு மாற்றப்பட்டுள்ளான். அங்கு மேற்கொள்ளப்பட்ட மருத்துவப் பரிசோதனைகள் மற்றும் ஸ்கேன் பரிசோதனைகளின் பின்னர் சிறுநீரகங்களுக்கு கடுமையான பாதிப்பு ஏற்பட்டுள்ளமை அவதானிக்கப்பட்டதால், சிறுவனின் உயிரைப் பாதுகாக்கும் பொருட்டு ஒரு சிறுநீரகத்தை அகற்ற மருத்துவர்கள் பரிந்துரைத்துள்ளனர்.

சிறுவனின் தந்தை தொழிலால் ஒரு மெக்கானிக் என்றும், குடும்பத்தில் ஒன்றரை வயதுடைய மற்றொரு குழந்தை இருப்பதாகவும் குடும்ப உறவினர்கள் தெரிவிக்கின்றனர். இந்த பாரதூரமான சம்பவத்திற்குப் பிறகு, பாடசாலையின் அதிபர் சிறுவனின் நலம் விசாரிக்க வரவோ அல்லது தொலைபேசி அழைப்பு மேற்கொள்ளவோ இல்லை என்று உறவினர்கள் குற்றம் சாட்டுகின்றனர். பாடசாலை வளாகத்தில் உள்ள கட்டிடங்களைச் சுற்றியுள்ள வடிகால் அமைப்பு மிகவும் பாதுகாப்பற்ற நிலையில் இருப்பதாகவும், அது குறித்து புகைப்படங்கள் எடுக்க பாடசாலைக்குள் நுழைய அனுமதி மறுக்கப்படுவதாகவும் நிலுகா குமாரி அம்மையார் மேலும் குறிப்பிட்டார்.

இது குறித்து விசாரிப்பதற்காக கந்தேகொட மகா வித்தியாலயத்தின் அதிபர் வை.

அமரசிங்கவை தொடர்புகொள்ள முயற்சித்தபோது, தம்மால் ஒரு அறிக்கையை வெளியிட முடியாது என்றும், சம்பந்தப்பட்ட தகவல்களை அம்பலாங்கொட வலயக் கல்விப் பணிப்பாளர் அலுவலகத்திலிருந்து பெற்றுக்கொள்ளுமாறும் அவர் அறிவித்துள்ளார். எவ்வாறாயினும், பலப்பிட்டிய பிரதேச செயலகத்தில் நடைபெற்ற ஒருங்கிணைப்புக் குழுக் கூட்டத்தில் இந்த பிரச்சினை தீவிரமாக விவாதிக்கப்பட்டது. அங்கு கருத்துத் தெரிவித்த அம்பலாங்கொட வலயக் கல்விப் பணிப்பாளர் அநுருத்திகா கலஹேவத்த அம்மையார், பலப்பிட்டிய கோட்டக் கல்விப் பணிப்பாளர் இது குறித்து விசாரித்து வருவதாகத் தெரிவித்தார்.

காலி மாவட்டத்தில் உள்ள பாடசாலைகளில் காணப்படும் இவ்வாறான ஆபத்தான இடங்களை அடையாளம் கண்டு தீர்வுகளை வழங்குவதற்காக மாவட்ட உபகுழு நியமிக்கப்பட்டுள்ளதாக பலப்பிட்டிய பிரதேச ஒருங்கிணைப்புக் குழுவின் தலைவரும், காலி மாவட்ட பாராளுமன்ற உறுப்பினருமான சட்டத்தரணி ஹசாரா லியனகே அம்மையார் அங்கு சுட்டிக்காட்டினார். கந்தேகொட வித்தியாலயத்தில் உள்ள இந்த பாதுகாப்பற்ற வடிகால் குறித்த தகவல்கள் சம்பந்தப்பட்ட உபகுழுவுக்கு அறிவிக்கப்பட்டிருந்தால் இவ்வாறான ஒரு துயரத்தை தவிர்த்திருக்க முடியும் என்றும் அவர் குறிப்பிட்டார். அதன்படி, இந்த சம்பவம் குறித்து முறையான விசாரணை நடத்தி அறிக்கை சமர்ப்பிக்குமாறு அம்பலாங்கொட வலய மற்றும் பலப்பிட்டிய கோட்டக் கல்விப் பணிப்பாளர்களுக்கு பாராளுமன்ற உறுப்பினர் அறிவுறுத்தியுள்ளார்.