அவசர அனர்த்த நிலைமை காரணமாக சேதமடைந்த கைத்தொழில்களை மீண்டும் கட்டியெழுப்புவதற்காக அரசாங்கத்தினால் வழங்கப்படும் இரண்டு இலட்சம் ரூபா ஆரம்ப நிவாரண நிதி இந்த வாரத்திற்குள்ளேயே பிரதேச செயலகங்கள் ஊடாக விநியோகிக்க ஏற்பாடுகள் செய்யப்பட்டுள்ளன. அனர்த்தத்தினால் பாதிக்கப்பட்டுள்ள உற்பத்திப் பொருளாதாரத்தை விரைவாக மீட்டெடுப்பதே அரசாங்கத்தின் பிரதான நோக்கம் என கைத்தொழில் மற்றும் தொழில்முனைவோர் அபிவிருத்தி பிரதி அமைச்சர் சதுரங்க அபேசிங்க நேற்று (10) நடைபெற்ற ஊடகவியலாளர் சந்திப்பில் தெரிவித்தார்.
வியாபார இடங்கள் அல்லது கட்டிடங்களுக்கு ஏற்பட்ட பௌதீக சேதங்களை ஈடுசெய்வதற்காக 50 இலட்சம் ரூபா நிதி ஒதுக்கீடு செய்யவும் நடவடிக்கை எடுக்கப்பட்டுள்ளது.
இந்த நிவாரணச் செயல்முறைக்காக சேதமடைந்த வணிகங்கள் தொடர்பான தகவல்கள் தற்போது சேகரிக்கப்பட்டு வருகின்றன, இதுவரை 4,860 வணிகங்களின் தரவுகள் அமைப்புக்குக் கிடைத்துள்ளன. இதில் அதிகபட்ச தகவல்கள் கம்பஹா மாவட்டத்திலிருந்து பதிவாகியுள்ளன.
இவ்வாறு பதிவாகியுள்ள வணிகங்களில் 1,874 நுண் அளவிலான வணிகங்களும், 1,735 சிறிய வணிகங்களும், 1,059 நடுத்தர அளவிலான வணிகங்களும், 192 பெரிய அளவிலான வணிகங்களும் அடங்கும். இவற்றில் 122 வணிகங்கள் ஏற்கனவே மீண்டும் தொடங்கப்பட்டுள்ளன, மேலும் 147 வணிகங்கள் இந்த வாரத்திற்குள் செயல்பட முடியும் என்று அறிவிக்கப்பட்டுள்ளது. அனர்த்தத்தினால் பாதிக்கப்பட்ட பதிவு செய்யப்பட்ட ஒவ்வொரு கைத்தொழிலுக்கும் அரசாங்கத்தின் கொள்கை ரீதியான முடிவாக இந்த ஆரம்ப உதவி வழங்கப்படும்.
சம்பந்தப்பட்ட சலுகைகளைப் பெறுவதற்காக, கைத்தொழில் உரிமையாளர்கள் எதிர்வரும் டிசம்பர் 16 ஆம் திகதி பிற்பகல் 2.00 மணிக்கு முன்னர் www.industry.gov.lk இணையத்தளம் ஊடாகவோ அல்லது பிரதேச செயலகங்களில் உள்ள சம்பந்தப்பட்ட அதிகாரிகளினூடாகவோ விண்ணப்பங்களைச் சமர்ப்பிக்க வேண்டும். காப்புறுதிப் பாதுகாப்புப் பெற்றுள்ள வணிகங்களுக்கு அந்த இழப்பீட்டுத் தொகையை விரைவாகப் பெற்றுக்கொள்வதற்கு அமைச்சு தலையிடும் என்றும், வருமான வரிப் பதிவேடுகளைப் பராமரிப்பதில் அனர்த்தத்தினால் ஏற்பட்ட பிரச்சினைகளைத் தீர்ப்பதற்கு அரசாங்கம் உதவும் என்றும் பிரதி அமைச்சர் மேலும் தெரிவித்தார்.
Tags:
News