இலங்கை கிரிக்கெட் அணியின் முன்னாள் தலைமைப் பயிற்சியாளர் சண்டிக ஹத்துருசிங்க, இலங்கை கிரிக்கெட் நிறுவனத்திற்கு எதிராக சுவிட்சர்லாந்தின் லொசானில் அமைந்துள்ள சர்வதேச விளையாட்டு தீர்ப்பாய நீதிமன்றத்தில் வழக்குத் தாக்கல் செய்துள்ளார். தனது ஒப்பந்தக் காலம் முடிவடைவதற்கு முன்னர் நியாயமற்ற முறையில் பதவியில் இருந்து நீக்கப்பட்டதால் ஏற்பட்ட நிதி இழப்பு மற்றும் நற்பெயருக்கு ஏற்பட்ட பாதிப்புக்கு இழப்பீடு பெறுவதை நோக்கமாகக் கொண்டு ஹத்துருசிங்க இந்த வழக்கைத் தாக்கல் செய்திருந்தார்.
இலங்கை கிரிக்கெட் நிறுவனத்தின் சார்பில் ஆஜரான ஜனாதிபதி சட்டத்தரணி ரொமேஷ் டி சில்வா உள்ளிட்ட சட்ட வல்லுநர்கள் குழு, இலங்கை கிரிக்கெட் நிறுவனம் ஒரு ஒருங்கிணைக்கப்பட்ட அமைப்பு (Incorporated Body) அல்ல என்று நீதிமன்றத்தில் சுட்டிக்காட்டியது. கிரிக்கெட் நிறுவனம் ஒரு ஒருங்கிணைக்கப்பட்ட அமைப்பு இல்லாத நிலையில், அதற்கு எதிராக சர்வதேச விளையாட்டு தீர்ப்பாய நீதிமன்றத்தில் இத்தகைய வழக்கை தொடர சட்டரீதியான சாத்தியம் இல்லை என்பதே அவர்களின் வாதமாக இருந்தது.
இந்த சட்டரீதியான வாதத்தின் காரணமாக ஹத்துருசிங்க தனது வழக்கை முன்னர் வாபஸ் பெற்றிருந்தாலும், அவர் அதை மீண்டும் வேறு வழியில் தாக்கல் செய்துள்ளார்.
சண்டிக ஹத்துருசிங்க இலங்கை கிரிக்கெட் நிறுவனத்திடம் கோரிய இழப்பீட்டுத் தொகை 5 மில்லியன் அமெரிக்க டாலர்கள் என முன்னர் அறிவிக்கப்பட்டது. இலங்கை கிரிக்கெட் நிறுவனத்தின் செயலாளர் மோகன் டி சில்வா குறிப்பிட்டபடி, ஹத்துருசிங்க தனது ஒப்பந்தத்தில் எஞ்சியிருந்த 18 மாத காலத்திற்கான முழுச் சம்பளம் மற்றும் தவறான முறையில் பணிநீக்கம் செய்யப்பட்டதால் சர்வதேசப் பயிற்சியாளராக தனது தொழில்முறை நற்பெயருக்கு ஏற்பட்ட பாதிப்பைக் கருத்தில் கொண்டு ஒரு கடிதம் மூலம் இந்த இழப்பீட்டுக் கோரிக்கையை முன்வைத்துள்ளார். எஞ்சிய காலத்திற்கான சம்பளம் மட்டும் ஒரு மில்லியன் டாலர்களைத் தாண்டும் என்று குறிப்பிடப்பட்டுள்ளது.
கடந்த உலகக் கோப்பை கிரிக்கெட் போட்டியில் இலங்கை அணி ஆறாவது இடத்தைப் பிடித்ததைத் தொடர்ந்து, ஹத்துருசிங்க மற்றும் அவரது உதவிப் பணியாளர்களை நீக்க அதிகாரிகள் நடவடிக்கை எடுத்தனர். அப்போதைய விளையாட்டுத்துறை அமைச்சர் ஹரின் பெர்னாண்டோ, முடிவுகளை வழங்கத் தவறிய ஹத்துருசிங்கவுக்கு மாதத்திற்கு 60,000 டாலர் போன்ற அதிக சம்பளம் வழங்கப்படுவதாகவும், அந்தத் தொகையில் பாதியைக் கொண்டு ஒரு வெளிநாட்டுப் பயிற்சியாளரை நியமித்திருக்க முடியும் என்றும் குற்றம் சாட்டினார்.
எவ்வாறாயினும், அவர் பணிநீக்கம் செய்யப்பட்டபோது, கிரிக்கெட் நிறுவனம் ஆறு மாத சம்பளத்தை மட்டுமே இழப்பீடாக வழங்க ஒப்புக்கொண்டதாக ஐலண்ட் நாளிதழ் செய்தி வெளியிட்டிருந்தது.
இதற்கிடையில், ஹத்துருசிங்க தாக்கல் செய்த இந்த வழக்கிற்காக இலங்கை கிரிக்கெட் நிறுவனம் சுமார் 20 மில்லியன் ரூபாய் வழக்குச் செலவாகச் செலவிட நேரிட்டது கோப் குழுவில் தெரியவந்தது. கிரிக்கெட் நிறுவனத்திற்கு ஏற்பட்ட இந்த நிதி இழப்பை ஈடுசெய்ய, ஹத்துருசிங்கவிடம் இருந்து சம்பந்தப்பட்ட வழக்குச் செலவுகளை வசூலிக்க இலங்கை கிரிக்கெட் நிறுவனம் ஒரு தனி வழக்கை தாக்கல் செய்ய முடிவு செய்துள்ளதாகவும் தெரிவிக்கப்பட்டது.