புயலால் தவித்தவர்களுக்குப் புகலிடம் அளித்த ஆலயங்களும் தேவாலயங்களும்

 டெட்வா சூறாவளியால் இலங்கை முழுவதும் ஏற்பட்ட கடும் மழை, வெள்ளம் மற்றும் மண்சரிவு நிலைமைகளால் பாதிக்கப்பட்ட ஆயிரக்கணக்கான மக்களுக்கு அடைக்கலம் அளிப்பதற்காக, நாடு முழுவதும் உள்ள தேவாலயங்களும் விகாரைகளும் அவசர நிவாரண முகாம்களாக மாற்றப்பட்டுள்ளன. அனர்த்த முகாமைத்துவ மத்திய நிலையம் டிசம்பர் 3ஆம் திகதி வெளியிட்ட அறிக்கையின்படி, இந்த அனர்த்தத்தால் 474 பேர் உயிரிழந்துள்ளதுடன், 350க்கும் மேற்பட்டோர் காணாமல் போயுள்ளனர்.

இரத்தினபுரி மறைமாவட்டத்தைச் சேர்ந்த குருகுல்ல, புனித பிரான்சிஸ் சேவியர் தேவாலயத்தின் பங்குத்தந்தை டென்சில் பிரியங்கர அடிகளார், சூறாவளி தாக்கிய மறுநாள் முதல் சுமார் 175 பௌத்த, முஸ்லிம் மற்றும் கிறிஸ்தவ பக்தர்களுக்கு தனது தேவாலயத்தில் அடைக்கலம் வழங்கப்பட்டுள்ளதாகத் தெரிவித்தார். நவம்பர் 28 அன்று நிலப்பகுதியை அடைந்த இந்த சூறாவளி, 2000களின் முற்பகுதிக்குப் பிறகு இலங்கையில் பதிவான மிக மோசமான வெள்ளப் பெருக்கை ஏற்படுத்தியதுடன்,

டிசம்பர் 7ஆம் திகதி நடைபெறவிருந்த பங்குத்திருவிழாவையும் இடம்பெயர்ந்தவர்களுக்கு இடமளிக்கும் வகையில் ஒத்திவைக்க அடிகளார் நடவடிக்கை எடுத்துள்ளார்.

கேகாலை மாவட்டத்தின் குருகுல்ல பிரதேசத்தில் உள்ள பௌத்த விகாரையிலும் தேவாலயத்திலும் இரண்டு நிவாரண முகாம்கள் அமைக்கப்பட்டுள்ளன. தற்போது வெள்ளம் வடிந்துள்ள நிலையில், தன்னார்வக் குழுக்களும் உள்ளூர் மக்களும் இணைந்து சேறு மற்றும் அசுத்தமான நீரால் நிரம்பிய வீடுகளை சுத்தம் செய்யத் தொடங்கியுள்ளனர். பாதிக்கப்பட்ட குடும்பங்களுக்கு உலர் உணவுப் பொருட்கள் வழங்கப்பட்டாலும், பலரும் தங்கள் உடைகள், வீட்டு உபயோகப் பொருட்கள் மற்றும் சமையலறை உபகரணங்கள் உட்பட அனைத்தையும் இழந்துள்ளதால், அவர்களுக்கு மீண்டும் வாழ்க்கையை கட்டியெழுப்ப உதவுவது ஒரு பெரிய சவாலாக இருப்பதாக பங்குத்தந்தை பிரியங்கர சுட்டிக்காட்டுகிறார்.

சிலாபம் மறைமாவட்டத்தின் கார்மல் மாதா பேராலயத்தில் சுமார் 800 பேர் தங்கியுள்ளதாகவும், நைனாமடம புனித அந்தோனியார் தேவாலயத்தில் மேலும் 250 பேர் அடைக்கலம் பெற்றுள்ளதாகவும் அதன் பங்குத்தந்தை பீட்டர் பொத்தேஜு அடிகளார் தெரிவித்தார். கொழும்பு பேராயர் மறைமாவட்டத்தில் நான்கு தேவாலயங்களில் 600க்கும் மேற்பட்டோர் தங்க வைக்கப்பட்டுள்ளனர். பதுளை மத்திய வைத்தியசாலையின் பணிப்பாளர் டிலெக்ஸ் சாந்த பெர்னாண்டோ அடிகளார், பதுளை பங்கு நாரங்கல தோட்டத்தில் பாதிக்கப்பட்ட மக்களுக்காக டிசம்பர் 2ஆம் திகதி விசேட மருத்துவ முகாமை ஏற்பாடு செய்திருந்தார்.

இடம்பெயர்ந்த குடும்பங்களுக்கு விநியோகிப்பதற்காக கொழும்பு புனித தெரேசா பங்கு, 3 மில்லியன் ரூபாய்க்கும் அதிகமான (சுமார் 10,000 அமெரிக்க டாலர்கள்) பெறுமதியான பொருள் உதவிகளைச் சேகரித்துள்ளது. காரித்தாஸ் அமைப்பின் 'செத் சரண' பாதிக்கப்பட்ட பங்குகளின் அடிப்படை நிவாரண சேவைகளுக்காக ஒரு மில்லியன் ரூபாய் பண உதவியை வழங்கியுள்ளது. பல பௌத்த விகாரைகளும் அவசர நிவாரண முகாம்களாகச் செயல்படுகின்றன. பதுளை பஸ்ஸர, பெலவத்த ஸ்ரீ போதிராஜாராம விகாரையின் விகாராதிபதி வண. எஸ். அமரஜோதி தேரர், கனமழை பெய்தபோது தாம் வீடுகளுக்குச் சென்று மக்களை எழுப்பி விகாரைக்கு அழைத்து வந்து சுமார் 150 குடும்பங்களின் உயிர்களைக் காப்பாற்றியதாகத் தெரிவித்தார்.

தென்கிழக்கு ஆசிய நாடுகள் வழியாக வீசிய டெட்வா சூறாவளி இந்தோனேசியா உட்பட பல நாடுகளுக்கு பெரும் அழிவை ஏற்படுத்தியுள்ளது. டிசம்பர் 3ஆம் திகதி நிலவரப்படி, இந்தோனேசியாவில் மட்டும் உயிரிழந்தவர்களின் எண்ணிக்கை 1,300ஐத் தாண்டியுள்ளதாக சர்வதேச ஊடகங்கள் தெரிவிக்கின்றன.