இலங்கைக்குப் பல நாடுகளிலிருந்து குவியும் மனிதாபிமான உதவிகள்

'தித்வா' சூறாவளி காரணமாக நாட்டில் பத்து இலட்சத்திற்கும் அதிகமானோர் பாதிக்கப்பட்டுள்ள நிலையில், வெள்ளம் மற்றும் மண்சரிவுகளில் காணாமல் போனவர்களைத் தேடும் நடவடிக்கைகளுக்கும், பாதிக்கப்பட்டவர்களுக்கு உதவுவதற்கும் அமெரிக்கா, ஜப்பான், இந்தியா, பாகிஸ்தான், மாலைதீவு மற்றும் சீனா ஆகிய நாடுகள் முன்வந்துள்ளன.

இலங்கை எதிர்கொண்டுள்ள இந்த கடுமையான அனர்த்த நிலைமையால் உட்கட்டமைப்புகள் சேதமடைந்து ஆயிரக்கணக்கானோர் பாதிக்கப்பட்டுள்ள இந்த நேரத்தில் சர்வதேச சமூகம் தனது ஆதரவைத் தெரிவித்துள்ளது.

இந்த அனர்த்த நிலைமை குறித்து கருத்து தெரிவித்த இலங்கையிலுள்ள அமெரிக்கத் தூதுவர் ஜூலி சங் அம்மையார், பாதிக்கப்பட்ட மக்களுக்கு உடனடியாக உதவுவதற்காக அமெரிக்க அரசாங்கம் 2 மில்லியன் டொலர்கள் அதாவது சுமார் 62 கோடி ரூபாவை ஒதுக்கியுள்ளதாகத் தெரிவித்தார். சர்வதேச ஒத்துழைப்பு நிறுவனங்கள் மூலம் இந்த உதவிகள் மக்களுக்குக் கிடைக்கும் என்றும், இலங்கை எதிர்கொண்டுள்ள இந்த கடினமான சூழ்நிலையில் இரு நாடுகளுக்கும் இடையிலான வலுவான, உடைக்க முடியாத கூட்டாண்மையை இது பிரதிபலிப்பதாகவும் அவர் மேலும் கூறினார்.

'சாகர் பந்து' நடவடிக்கை திட்டத்தின் கீழ் இந்தியாவும் தனது மனிதாபிமான உதவிகளை அதிகரித்துள்ளதுடன், இந்திய விமானப்படைக்குச் சொந்தமான இரண்டு விமானங்கள் மூலம் 21 டன் நிவாரணப் பொருட்களும், தேசிய அனர்த்தப் பதிலளிப்புப் படையின் 80 உறுப்பினர்களும் இலங்கைக்கு அனுப்பப்பட்டுள்ளனர். மேலும், இந்திய கடற்படையின் விக்ராந்த் கப்பலுக்குச் சொந்தமான இரண்டு சீடாக் ரக ஹெலிகொப்டர்களைப் பயன்படுத்தி இலங்கை விமானப்படையுடன் இணைந்து நான்கு வெற்றிகரமான மீட்பு நடவடிக்கைகள் மேற்கொள்ளப்பட்டுள்ளதாகவும், மேலும் இரண்டு ஹெலிகொப்டர்கள் மற்றும் அத்தியாவசிய உதவிகளுடன் கூடிய குழுக்கள் இலங்கைக்கு வந்துள்ளதாகவும் இந்திய உயர்ஸ்தானிகராலயம் உறுதிப்படுத்தியுள்ளது.

அனர்த்த நிலைமை மற்றும் சுகாதாரத் தேவைகளை ஆராய்வதற்காக, ஜப்பான் அரசாங்கம் சர்வதேச ஒத்துழைப்பு நிறுவனத்தின் (JICA) அதிகாரிகள் மற்றும் மருத்துவக் குழுக்களை உள்ளடக்கிய ஒரு விசேட அனர்த்த நிவாரணக் குழுவை நேற்று (30) தீவுக்கு அனுப்பியுள்ளது. பாதிக்கப்பட்ட மக்களுக்கு கூடாரங்கள், போர்வைகள் உள்ளிட்ட அத்தியாவசியப் பொருட்களை வழங்குவதற்கும்,

பாதிக்கப்பட்ட பகுதிகளில் தேடுதல் மற்றும் மீட்பு நடவடிக்கைகளில் தீவிரமாகப் பங்களிப்பதற்கும் ஜப்பான் நடவடிக்கை எடுத்துள்ளதாக ஜப்பான் தூதரகம் தெரிவித்துள்ளது.

அண்டை நாடான மாலைதீவு அரசாங்கமும், பாதிக்கப்பட்ட இலங்கையர்களுக்காக 50,000 அமெரிக்க டொலர் நிதி நன்கொடையையும், 25,000 டின் டூனா மீன்களையும் வழங்கத் தீர்மானித்துள்ளது, இது இரு நாடுகளுக்கும் இடையிலான நட்புறவை மேலும் உறுதிப்படுத்துகிறது. இதற்கிடையில், பாகிஸ்தான் அனுப்பிய மனிதாபிமான உதவிகளை ஏற்றி வந்த அந்நாட்டு கடற்படைக்குச் சொந்தமான 'சைஃப்' கப்பல் கொழும்பு துறைமுகத்தை வந்தடைந்துள்ளதுடன், அந்த உதவிகள் இலங்கை கடற்படையிடம் உத்தியோகபூர்வமாக ஒப்படைக்கப்பட்டன.

இலங்கையின் நெருங்கிய நண்பனாக சீனாவும் இந்த நேரத்தில் முழு ஆதரவையும் வழங்கத் தீர்மானித்துள்ளதாக கொழும்பிலுள்ள சீனத் தூதரகம் தெரிவித்துள்ளதுடன், சம்பந்தப்பட்ட உதவிகளும் நிவாரணக் குழுக்களும் தற்போது நாட்டிற்கு வந்துகொண்டிருப்பதாகவும் அவர்கள் குறிப்பிட்டனர்.