இலங்கை முழுவதும் ஏற்பட்ட மோசமான வானிலை காரணமாக ஏற்பட்ட பாரிய உயிர் மற்றும் சொத்து இழப்புகள் தொடர்பில் ரஷ்ய ஜனாதிபதி விளாடிமிர் புடின் அவர்கள், ஜனாதிபதி அனுர குமார திசாநாயக்க அவர்களுக்கு தனது ஆழ்ந்த இரங்கலைத் தெரிவித்துள்ளார்.
தீவை பாதித்த இந்த பயங்கரமான வெள்ளம் மற்றும் மண்சரிவு நிலைமைகளுக்கு மத்தியில் ரஷ்ய அரசாங்கமும் மக்களும் இலங்கையுடன் ஒத்துழைப்புடன் செயற்படுவார்கள் என ஜனாதிபதி தனது உத்தியோகபூர்வ இணையத்தளத்தில் ஒரு குறிப்பை இட்டு வலியுறுத்தியுள்ளார்.இந்த திடீர் அனர்த்த நிலைமை காரணமாக உயிரிழந்தவர்களின் குடும்ப உறுப்பினர்களுக்கும் அவர்களது உறவினர்களுக்கும் தனது மனமார்ந்த இரங்கலைத் தெரிவிப்பதாகவும்,
அனர்த்தத்தால் பாதிக்கப்பட்டு காயமடைந்த அனைவருக்கும் விரைவான குணமடைய பிரார்த்திப்பதாகவும் ரஷ்ய ஜனாதிபதி, ஜனாதிபதி அனுர குமார திசாநாயக்க அவர்களுக்கு அனுப்பிய செய்தியில் குறிப்பிடப்பட்டுள்ளது. இந்த கடினமான காலகட்டத்தில் ரஷ்யா இலங்கையுடன் துணை நிற்கும் என்றும் அவர் உறுதியளித்துள்ளார்.
சமீபத்திய வரலாற்றில் இலங்கை எதிர்கொண்ட மிக மோசமான இயற்கை அனர்த்தங்களில் இதுவும் ஒன்றாகக் கருதப்படும் நிலையில், பாரியளவிலான மீட்பு மற்றும் நிவாரண சேவைகள் தொடர்ச்சியாக இடம்பெற்று வரும் ஒரு முக்கியமான தருணத்தில் இந்த செய்தி கிடைத்துள்ளது. இலட்சக்கணக்கான மக்கள் இடம்பெயர்ந்துள்ளதோடு, உட்கட்டமைப்பு வசதிகளுக்கும் பாரிய சேதங்கள் ஏற்பட்டுள்ள பின்னணியில், இலங்கை சர்வதேச சமூகத்தின் உதவியை நாடியுள்ள ஒரு சந்தர்ப்பத்தில் ரஷ்ய ஜனாதிபதி இந்த இரங்கல் செய்தியை அனுப்பியுள்ளார்.
Tags:
News