நேற்று (24) அதிகாலை திருகோணமலையில் முச்சக்கர வண்டியொன்றைத் திருடிச் சென்ற கடற்படை வீரர் ஒருவர், துறைமுகப் பொலிஸாரால் கைது செய்யப்பட்டுள்ளார். இவர் இணைய சூதாட்டத்திற்கு அடிமையானவர் எனத் தெரிவிக்கப்பட்டுள்ளது. திரையரங்கு ஒன்றின் முன்னால் நிறுத்தி வைக்கப்பட்டிருந்த முச்சக்கர வண்டி இவ்வாறு திருடப்பட்டுள்ளதாகத் தெரிவிக்கப்பட்டுள்ளது.
துறைமுகப் பொலிஸாருக்குக் கிடைத்த முறைப்பாட்டின் அடிப்படையில், நிலையப் பொறுப்பதிகாரி பிரதான பொலிஸ் பரிசோதகர் எஸ். கே. சமரசிங்கவின் வழிகாட்டலின் கீழ் செயற்பட்ட பொலிஸ் குழுவொன்று சந்தேகநபரையும் திருடப்பட்ட முச்சக்கர வண்டியையும் துரத்திச் சென்றுள்ளது. கைது செய்யும் நடவடிக்கையின் போது, அந்த முச்சக்கர வண்டி மற்றுமொரு வாகனத்துடன் மோதி கவிழ்ந்ததாகப் பொலிஸார் தெரிவித்தனர்.
கைது செய்யப்பட்ட சந்தேகநபர் திருகோணமலை கடற்படை முகாமில் பணிபுரியும் ஒரு வீரர் ஆவார். பொலிஸ் விசாரணைகளில், அவர் விடுமுறை எடுத்து காலிக்குச் சென்று தனது வீட்டிற்குத் திரும்பி வந்த பின்னர் முகாமில் அறிக்கை செய்யாமல் இந்தத் திருட்டைச் செய்துள்ளார் என்பது தெரியவந்துள்ளது. அவர் மொபைல் போன் செயலி மூலம் இணைய சூதாட்டத்தில் ஈடுபட்டு அதிக கடன் பட்டிருந்ததாகவும், 5,000 ரூபாய் பணத்தைப் பெறுவதற்காக இந்த குற்றத்தைச் செய்ததாகவும் பொலிஸார் தகவல்களை வெளியிட்டுள்ளனர்.
இந்தச் சம்பவம் தொடர்பில் துறைமுகப் பொலிஸ் நிலையப் பொறுப்பதிகாரி பிரதான பொலிஸ் பரிசோதகர் எஸ். கே. சமரசிங்கவின் வழிகாட்டலின் கீழ் குற்றப் பிரிவின் நிலையப் பொறுப்பதிகாரி பிரதான பொலிஸ் பரிசோதகர் என். பி. சி. கே. நாணாயக்கார மேலதிக விசாரணைகளை மேற்கொண்டு வருகிறார்.