பாடசாலைகள், பல்கலைக்கழகங்கள் திறப்பு மற்றும் பரீட்சைத் திகதிகள் குறித்த முக்கிய தீர்மானங்கள்

‍

 நாடு முழுவதும் நிலவிய சீரற்ற காலநிலை காரணமாக தற்காலிகமாக இடைநிறுத்தப்பட்டிருந்த கல்வித் துறை நடவடிக்கைகளை மீண்டும் செயற்படுத்துவது தொடர்பாக கல்வி அமைச்சு பல விசேட தீர்மானங்களை எடுத்துள்ளது. இதன்படி, அனர்த்த நிலைமையால் பாதிக்கப்படாத பல்கலைக்கழகங்கள், தேசிய கல்வி பீடங்கள் மற்றும் தொழிற்கல்வி நிறுவனங்கள் எதிர்வரும் டிசம்பர் மாதம் 08 ஆம் திகதி முதல் மீண்டும் திறக்கப்படும் என கல்வி, உயர் கல்வி மற்றும் தொழிற்கல்வி அமைச்சின் செயலாளர் நாலக கலூவெவ தெரிவித்துள்ளார்.

தற்போது நிலவும் அனர்த்த நிலைமை காரணமாக இடையில் நிறுத்தப்பட வேண்டியிருந்த கல்விப் பொதுத் தராதர உயர்தரப் பரீட்சை நடவடிக்கைகள் தொடர்பாகவும் இன்றைய ஊடகவியலாளர் சந்திப்பில் செயலாளர் கருத்துத் தெரிவித்தார். பரீட்சையின் நடத்தப்பட முடியாத எஞ்சிய பாடங்களுக்கான திகதிகளை 2026 ஆம் ஆண்டு ஜனவரி மாதத்தின் முதல் வாரத்தில் நிர்ணயம் செய்ய நடவடிக்கை எடுக்கப்பட்டு வருவதாக அவர் அங்கு வலியுறுத்தினார்.

பாடசாலை முறைமையை மீண்டும் ஆரம்பிக்கும் போது மாகாண மற்றும் மாவட்ட மட்டங்களில் நிலவும் நிலைமைகள் குறித்து விரிவான ஆய்வை மேற்கொள்ள அதிகாரிகள் நடவடிக்கை எடுத்துள்ளனர். போக்குவரத்து வசதிகள், தொடர்பாடல் சேவைகள் மற்றும் மின்சாரம் சீராக உள்ள அனர்த்தங்களால் பாதிக்கப்படாத மாவட்டங்கள் மற்றும் மாகாணங்களில் பாடசாலைகள் டிசம்பர் மாதம் 16 ஆம் திகதி ஆரம்பிக்கப்படவுள்ளதுடன், ஏனைய பாடசாலைகளைத் திறப்பது குறித்து சம்பந்தப்பட்ட பிரதேச அதிகாரிகளுடன் கலந்துரையாடி விரைவான தீர்மானம் எடுக்கப்படும் என செயலாளர் தெரிவித்தார்.

உயர் கல்வி நிறுவனங்கள் டிசம்பர் 08 ஆம் திகதி ஆரம்பிக்க பொதுவான தீர்மானம் எடுக்கப்பட்டிருந்தாலும், ஏதேனும் நிறுவனத்தில் நடைமுறைச் சிக்கல்கள் இருந்தால், அது குறித்து நெகிழ்வாகச் செயல்பட அனுமதி வழங்கப்பட்டுள்ளது. அத்தகைய சந்தர்ப்பத்தில், சம்பந்தப்பட்ட நிறுவனம் மீண்டும் ஆரம்பிக்கப்பட வேண்டிய திகதியை தீர்மானிக்கும் அதிகாரம் அந்த நிறுவனத் தலைவர்களுக்கு வழங்கப்பட்டுள்ளதாக நாலக கலூவெவ மேலும் சுட்டிக்காட்டினார்.