அரசு ஊழியர்களுக்கு சம்பளமற்ற விடுமுறை இரத்து!

 அரசாங்க நிர்வாகம், மாகாண சபைகள் மற்றும் உள்ளூராட்சி அமைச்சகம், இதுவரை நடைமுறையில் இருந்த உள்நாட்டு மற்றும் வெளிநாட்டு சம்பளமற்ற விடுமுறை வழங்கும் நடைமுறையை உடனடியாக அமுலுக்கு வரும் வகையில் இடைநிறுத்த நடவடிக்கை எடுத்துள்ளது.

கடந்த நவம்பர் மாதம் 24ஆம் திகதி நடைபெற்ற அமைச்சரவைக் கூட்டத்தில் எடுக்கப்பட்ட தீர்மானத்திற்கு அமையவே இந்த புதிய நடவடிக்கை எடுக்கப்பட்டுள்ளதாக அமைச்சின் செயலாளர் எஸ். அலோக்க பண்டார தெரிவித்துள்ளார்.

இந்தத் தீர்மானத்துடன், புதிய விடுமுறை விண்ணப்பங்களைப் பெறுவதையோ அல்லது ஏற்கனவே பெறப்பட்ட விடுமுறைகளை நீடிப்பதற்கான விண்ணப்பங்களைப் பெறுவதையோ உடனடியாக நிறுத்த வேண்டும் என்று அமைச்சின் செயலாளர் அனைத்து அமைச்சுச் செயலாளர்கள், மாகாண பிரதம செயலாளர்கள் மற்றும் திணைக்களத் தலைவர்களுக்கு சுற்றறிக்கை ஒன்றை வெளியிட்டுள்ளார்.

அரசு ஊழியர்களின் சிரேஷ்டத்துவம் மற்றும் ஓய்வூதியத்திற்கு பாதிப்பு ஏற்படாத வகையில், அதிகபட்சம் ஐந்து வருட காலத்திற்கு உட்பட்டு உள்நாட்டு அல்லது வெளிநாட்டு சம்பளமற்ற விடுமுறைகளைப் பெறுவதற்கு வாய்ப்பளிக்கும் வகையில், 2022 ஜூன் மாதம் 22ஆம் திகதி ஒரு விசேட சுற்றறிக்கை அறிமுகப்படுத்தப்பட்டிருந்தது.

புதிய தீர்மானம் அமுலுக்கு வந்தாலும்,

ஏற்கனவே உள்நாட்டு அல்லது வெளிநாட்டு விடுமுறையில் உள்ள அதிகாரிகளுக்கு, அவர்களுக்கு அங்கீகரிக்கப்பட்ட காலப்பகுதிக்குள் அந்த விடுமுறையை அதேபோன்று அனுபவிக்கும் வாய்ப்பு உள்ளது என்று அந்த சுற்றறிக்கையில் மேலும் குறிப்பிடப்பட்டுள்ளது.

அத்துடன், விடுமுறைக்கு அனுமதி கிடைத்திருந்தும் இதுவரை அந்த விடுமுறையைப் பெறாத அதிகாரிகளுக்கும், அங்கீகரிக்கப்பட்ட காலப்பகுதிக்கு அமைய அந்த விடுமுறையைப் பெறுவதற்கு எந்தத் தடையும் இல்லை என்று அரச நிர்வாக அமைச்சு உறுதிப்படுத்தியுள்ளது.