நியூசிலாந்தின் பிரபல சகலதுறை வீரர் டக் பிரேஸ்வெல், சர்வதேச மற்றும் உள்ளூர் கிரிக்கெட்டின் அனைத்து வடிவங்களிலிருந்தும் ஓய்வுபெற தீர்மானித்துள்ளதாக அறிவித்துள்ளார். 35 வயதான அவர், 2023 இல் நியூசிலாந்துக்காக தனது கடைசி டெஸ்ட் போட்டியில் பங்கேற்றார்.
அவரது ஓய்வு முடிவுக்கு முக்கிய காரணம் தொடர்ச்சியான விலா எலும்பு தொடர்பான காயம் ஆகும். இந்தக் காயம் காரணமாக, இந்த சீசனில் சென்ட்ரல் டிஸ்ட்ரிக்ஸ் அணிக்காக விளையாட அவரால் முடியவில்லை. கடந்த காலங்களில் அவர் கிரிக்கெட் களத்திலிருந்து விலகி இருக்கவும் இந்த உடல்நலப் பிரச்சினை காரணமாக அமைந்தது.
2011 முதல் 2023 வரை நீடித்த சர்வதேச கிரிக்கெட் வாழ்க்கையில், பிரேஸ்வெல் 28 டெஸ்ட் போட்டிகள், 21 ஒருநாள் போட்டிகள் மற்றும் 20 இருபதுக்கு 20 போட்டிகளில் விளையாடியுள்ளார். அவரது விளையாட்டு வாழ்க்கையின் மிகவும் மறக்கமுடியாத தருணம் 2011 டிசம்பரில் ஹோபார்ட்டில் ஆஸ்திரேலியாவுக்கு எதிராக நடந்த அவரது மூன்றாவது டெஸ்ட் போட்டியில் பதிவானது. அதில் அவர் மொத்தம் 9 விக்கெட்டுகளை வீழ்த்தி (இரண்டாவது இன்னிங்ஸில் 40 ஓட்டங்களுக்கு 6 விக்கெட்டுகள் உட்பட), 26 ஆண்டுகளுக்குப் பிறகு ஆஸ்திரேலிய மண்ணில் நியூசிலாந்துக்கு டெஸ்ட் வெற்றியைப் பெற்றுக்கொடுத்தார். ஒட்டுமொத்தமாக அவர் 74 டெஸ்ட் விக்கெட்டுகளையும், வரையறுக்கப்பட்ட ஓவர் போட்டிகளில் 46 விக்கெட்டுகளையும் வீழ்த்தியுள்ளார்.
தனது ஓய்வு குறித்து கருத்து தெரிவித்த பிரேஸ்வெல், "இது என் வாழ்க்கையின் மிகவும் பெருமைமிக்க காலம். சிறுவயதிலிருந்தே நான் கண்ட கனவை நனவாக்க கிடைத்த வாய்ப்பு ஒரு பாக்கியம்" என்று கூறினார். நியூசிலாந்து தேசிய அணி மற்றும் சென்ட்ரல் டிஸ்ட்ரிக்ஸ் அணிக்காக விளையாட கிடைத்த வாய்ப்புகளுக்காக தான் எப்போதும் நன்றியுள்ளவனாக இருப்பேன் என்றும் அவர் மேலும் தெரிவித்தார்.
டக் பிரேஸ்வெல் நியூசிலாந்தின் புகழ்பெற்ற கிரிக்கெட் குடும்பத்தைச் சேர்ந்தவர். அவரது தந்தை பிரெண்டன் மற்றும் மாமா ஜான் ஆகியோரும் டெஸ்ட் கிரிக்கெட் விளையாடியவர்கள். ஜான் நியூசிலாந்து அணியின் பயிற்சியாளராகவும் பணியாற்றியுள்ளார், மேலும் டக் தனது உறவினர் மைக்கேல் பிரேஸ்வெல்லுடன் சர்வதேச போட்டிகளில் இணைந்து விளையாடியுள்ளார். அடுத்த மாதம் இந்தியாவில் நடைபெறவுள்ள ஒருநாள் தொடரில் மைக்கேல் நியூசிலாந்து அணியின் தலைவராக செயல்படவுள்ளார்.
சர்வதேச மற்றும் உள்ளூர் கிரிக்கெட்டுடன் கூடுதலாக, 2012 IPL தொடரில் டெல்லி டேர்டெவில்ஸ் அணிக்காக டக் பிரேஸ்வெல் விளையாடும் வாய்ப்பைப் பெற்றார். அவர் தென்னாப்பிரிக்க லீக் தொடர் உட்பட பல வெளிநாட்டு லீக் போட்டிகளிலும் பங்கேற்றுள்ளார். நியூசிலாந்து முதல் தர கிரிக்கெட் வரலாற்றில் 4000 ஓட்டங்கள் மற்றும் 400 விக்கெட்டுகளை எடுத்த சில அரிய வீரர்களில் ஒருவராக அவர் பெருமைப்படுகிறார். 137 முதல் தரப் போட்டிகளில் 437 விக்கெட்டுகளை வீழ்த்தி, மூன்று சதங்களுடன் 4505 ஓட்டங்களை குவித்து, சகலதுறை வீரராக பிரேஸ்வெல் சிறந்த ஆட்டத்தை வெளிப்படுத்தியுள்ளார்.
